اس بارے میں تل ابیب سے ڈوئچے ویلے کی خاتون نامہ نگار دانیئلا چَیسلو نے اپنے ایک جائزے میں لکھا ہے کہ بدھ کو رات گئے اسرائیل کی انتہائی دائیں بازو کی چند سیاسی جماعتوں نے بینجمن نیتن یاہو کی حمایت کا اعلان کر کے موجودہ وزیر اعظم کو کنیسٹ کہلانے والی ملکی پارلیمان میں وہ لازمی اکثریت مہیا کر دی، جو نیتن یاہو کو آئندہ بھی اقتدار میں رہنے کے لیے لازمی طور پر درکار تھی۔

نئی اسرائیلی حکومت کو 120 رکنی پارلیمان میں 61 ارکان کی حمایت حاصل ہو گی۔ اس کا مطلب یہ ہے کہ نیتن یاہو نے صرف وہ کم سے کم ہدف حاصل کیا ہے، جو نئی حکومت سازی کے لیے لازمی تھا، محض ایک ووٹ کی اکثریت۔ نئی حکومت میں شامل جماعتوں کو دیکھا جائے تو یہ اندازہ لگانا مشکل نہیں کہ ملک کی نئی منتخب قیادت ممکنہ طور پر آئندہ بھی اسرائیل کے سب سے بڑے اتحادی ملک امریکا کے ساتھ تصادم کے راستے پر ہی گامزن رہے گی اور ان اصلاحات کے حوالے سے بھی غالباﹰ واپسی کا سفر شروع ہو جائے گا، جن کے تحت الٹرا آرتھوڈوکس یہودیوں کے اختیارات کو محدود کر دیا گیا تھا۔

نئی حکومت سازی کے لیے بینجمن نیتن یاہو کو جو وقت دیا گیا تھا، وہ بدھ اور جمعرات کی درمیانی رات بارہ بجے ختم ہونا تھا اور نیتن یاہو اس مدت کے پورا ہونے سے محض ایک گھنٹہ پہلے اپنی اگلی حکومت کے لیے انتہائی دائیں بازو کی تین سیاسی جماعتوں کی تائید حاصل کرنے میں کامیاب ہوئے۔

اپنی اس سیاسی کامیابی کے لیے نیتن یاہو فلسطینی علاقوں میں اسرائیلی آباد کاری کی حامی جماعت ’جِیُوئش ہوم پارٹی‘ کو وزارت انصاف کا قلمدان دینے پر مجبور ہو گئے۔ اس کے علاوہ یہودی مذہبی جماعتوں ’شاس‘ اور ’یونائیٹڈ ٹورہ جُوڈاازم‘ یا ’متحدہ توریتی یہودیت‘ کی نئی مخلوط حکومت میں شمولیت کی شرط یہ تھی کہ بینجمن نیتن یاہو وہ تمام اصلاحاتی فیصلے منسوخ کر دیں گے جو گزشتہ حکومت نے مذہبی طور پر انتہائی قدامت پسند یہودی آبادی کے بارے میں کیے تھے۔

مارچ کے مہینے میں ہونے والے اسرائیلی عام انتخابات میں نیتن یاہو کی پارٹی کو جو کامیابی ملی تھی، نئی حکومت سازی کے لیے کی جانے والی ان کی کوششیں اس کے بالکل برعکس تھیں۔ ملکی صدر کی طرف سے حکومت سازی کی دعوت ملنے کے بعد طویل عرصے تک کی جانے والی سیاسی کوششیں، مخلوط حکومت کو حاصل پارلیمانی اکثریت کی یقین دہانی اس مدت کے پورا ہونے سے صرف ایک گھنٹہ پہلے اور کنیسٹ میں یہ اکثریت صرف ایک ووٹ کی۔

نئی کثیرالجماعتی مخلوط حکومت کے قیام پر اتفاق ہو جانے کے بعد بہت تھکے ہوئے بینجمن نیتن یاہو نے آدھی رات کے وقت ایک پریس کانفرنس سے خطاب کرتے ہوئے کہا کہ انہیں جو پارلیمانی اکثریت ملی ہے، وہ انتہائی معمولی ہے لیکن آئندہ ہفتوں اور مہینوں میں وہ اس اکثریت میں اضافے کی کاوشیں جاری رکھیں گے۔ انہوں نے کہا، ’’120 میں سے 61 ایک اچھا عدد ہے۔ لیکن 61 سے بڑا کوئی بھی دوسرا عدد اس سے بھی بہتر ہو گا۔ آغاز کے لیے 61 کا ہدف لازمی تھا۔ ہم اپنا کام شروع کر سکتے ہیں۔ ہمارے پاس کرنے کو بہت سے کام ہیں۔‘‘

فلسطینی ریاست کے قیام سے انکار

انتہائی دائیں بازو کی اسرائیلی جماعت ’یہودی وطن پارٹی‘ کے رہنما نفتالی بَینیٹ ایک شاطر سیاستدان ہیں۔ انہوں نے اپنی پارٹی کے لیے وزارت تعلیم اور وزارت انصاف کے قلمدان مانگے تھے۔ ملکی کابینہ میں اِس نمائندگی کے ساتھ اب انہیں اسرائیل کی اُس سات رکنی سکیورٹی کابینہ میں ممکنہ طور پر دو نشستیں حاصل ہوں گی، جو جنگ اور امن سے متعلق ہر قسم کے فیصلے کرتی ہے۔ اس سے بھی زیادہ قابل غور بات یہ ہے کہ بَینیٹ مغربی کنارے کے کئی حصوں کے باقاعدہ طور پر اسرائیل میں شامل کیے جانے کی وکالت اور ایک آزاد اور خود مختار فلسطینی ریاست کے قیام کی سخت مخالفت کرتے ہیں۔

الٹرا آرتھوڈوکس یہودیوں کا اضافی اثر و رسوخ

معروف سیاسی تجزیہ کار تال شنائیڈر کہتے ہیں کہ اسرائیل میں نئی حکومت سازی کی کوششوں میں خود مختار فلسطینی ریاست کے قیام کے معاملہ قطعی طور پر نظر انداز کر دیا گیا۔ اس کے علاوہ داخلی طور پر نئی ملکی حکومت الٹرا آرتھوڈوکس یہودیوں کے اثر و رسوخ میں واضح اضافے کا اعلان بھی ہے۔

اسرائیل میں ہر دس میں سے ایک یہودی اسی طرح کی مذہبی سوچ کا حامل ہے۔ اب نیتن یاہو ہی کی گزشتہ حکومت کے وہ فیصلے زیادہ تر منسوخ کر دیے جائیں گے، جن کا مقصد مذہبی احکامات پر سختی سے عمل کرنے والے الٹرا آرتھوڈوکس یہودی شہریوں کی فوج میں بھرتی اور روزگار کی منڈی میں شمولیت کو یقینی بنانا تھا۔

بینجمن نیتن یاہو نے اپنی نئی مخلوط حکومت میں شامل سیاسی جماعتوں کی فہرست ملکی صدر کو بھجوا چکے ہیں اور قوی امکان ہے کہ نئی اسرائیلی حکومت کی حلف برداری اگلے ہفتے ہو گی۔