ہسپانوی کلب بارسلونا نے فائنل میں اطالوی کلب یووینٹس کو ایک کے مقابلے میں تین گول سے ہرایا۔ اس تصویر میں بارسلونا کے کھلاڑی ٹرافی کے ساتھ خوشیاں مناتے ہوئے۔

گزشتہ چھ برس کے دوران ایف سی بارسلونا نے یورپی فٹ بال کا یہ اہم ٹورنامنٹ تیسری مرتبہ جیتا ہے۔ مجموعی طور پر اس کلب نے یہ یورپی کپ پانچویں مرتبہ جیتا ہے۔

اطالوی کلب یووینٹس ٹیورین ایسا پہلا کلب بن گیا ہے، جو چیمپئنز لیگ کے چھ فائنل مقابلوں میں پہنچنے میں کامیاب تو ہوا، لیکن بد قمستی سے آج تک کوئی ایک بھی فائنل نہیں جیتا۔

برلن کے اولمپک اسٹیڈیم میں کھیلے گئے اس میچ کا پہلا گول کروشیا سے تعلق رکھنے والے بارسلونا کے اسٹرائیکر ایوان راکیٹچ نے چوتھے منٹ میں ہی کر دیا اور ہسپانوی ٹیم کو کھیل کے آغاز میں ہی برتری حاصل ہو گئی۔

یووینٹس کی طرف سے واحد گول الوارو موراٹا نے 55 ویں منٹ میں کیا اور تب میچ ایک ایک گول سے برابر ہو گیا تھا۔ موراٹا ایسے پہلے کھلاڑی بن گئے ہیں، جنہوں نے چیمپئنز لیگ کے سیمی فائنل کے دونوں مرحلوں کے علاوہ فائنل میں بھی گول اسکور کیا۔

بارسلونا کی نمائندگی کرنے والے یوروگوائے کے اسٹرائیکر لوئیس سواریس نے 68 ویں منٹ میں اپنی ٹیم کو ایک مرتبہ پھر برتری دلا دی۔ لیونل میسی کی طرف سے لگائی گئی کک گول کیپر بوفون نے روک تو لی لیکن ری باؤنڈ ملنے پر سورایس نے بال گول کے اندر پھینک دیا۔

اس فائنل کی آخری کک برازیل کے اسٹار نیمار نے لگائی اور بال سیدھا گول پوسٹ میں پہنچ گیا۔ یوں یہ میچ بارسلونا نے ایک کے مقابلے میں تین گول سے جیت لیا۔ نیمار کے بقول یہ ان کے کیریئر کا سب سے زیادہ اہم میچ ثابت ہوا۔

اس میچ کو دیکھنے کے لیے جرمن صدر یوآخِم گاؤک بھی برلن کے اولمپک اسٹیڈیم میں موجود تھے۔

جرمن دارالحکومت برلن میں کھیلے گئے اس فائنل میچ سے قبل وہاں میلے کا سا سماں تھا۔ شائقین کی بہت بڑی تعداد یہ میچ دیکھنے کے لیے اسٹیڈیم پہنچی اور دن بھر وہاں رنگا رنگ ہنگامہ برپا رہا۔