کورونا وائرس کی وجہ سے لگنے والی بیماری کووڈ انیس کے حوالے سے نیوزی لینڈ کی اس نئی حکومتی پالیسی کا اعلان پیر بارہ ستمبر کے روز ملکی وزیر اعظم جیسنڈا آرڈرن نے کیا۔ انہوں نے کہا کہ اب پورے ملک میں صحت کے شعبے اور بزرگ شہریوں کی رہائش گاہوں کے علاوہ ہر جگہ پر چہروں پر حفاظتی ماسک پہننے کی پابندی بھی ختم کی جا رہی ہے۔

وزیر اعظم جیسنڈا آرڈرن نے ویلنگٹن میں ایک پریس کانفرنس میں کہا، ''اب وقت آ گیا ہے کہ ہم کووڈ انیس کے خلاف حفاظتی انتظامات کے حوالے سے اپنی پالیسی کا موجودہ صفحہ پلٹ دیں۔ اب ہمیں ان غیر معمولی اقدامات کی کوئی ضرورت نہیں، جو ماضی میں ہم سب کے لیے لازمی تھے۔‘‘

تقریباﹰ دو سال تک ملکی سرحدوں کی بندش

نیوزی لینڈ کا شمار ان ممالک میں ہوتا ہے، جنہوں نے کورونا وائرس کے خلاف سخت حفاظتی اقدامات کے تحت اپنی قومی سرحدیں مارچ 2020ء میں سربمہر کر دی تھیں۔ یہ سرحدیں اسی سال جولائی میں دوبارہ پوری طرح کھولی گئی تھیں۔

وزیر اعظم آرڈرن کے مطابق اب نیوزی لینڈ کا سیاحتی سفر کرنے والے غیر ملکیوں کے لیے یہ لازمی نہیں ہو گا کہ وہ اس ملک میں داخلے کے بعد اپنا پہلا کورونا ٹیسٹ فوراﹰ اور دوسرا پانچ روز بعد کروائیں۔ انہوں نے کہا کہ اگر کوئی سیاح رضاکارانہ طور پر ایسا کرنا چاہیے، تو اس کی حوصلہ افزائی کی جائے گی۔

وبا کے خلاف ردعمل میں سنگ میل

وزیر اعظم آرڈرن نے صحافیوں کو بتایا، ''کورونا وائرس کی عالمگیر وبا کے خلاف اقدامات اور وبائی مرض سے متعلق ہمارے ردعمل میں آج کا دن ایک اہم سنگ میل ہے۔ اس احساس کے عین برعکس کہ کورونا وائرس ہی ہمیں یہ بتائے گا کہ ہمیں اپنی زندگیاں کیسے گزارنا ہیں اور ہمارا حال اور مستقبل کیسے ہوں گے، آج ہم نے اپنی زندگیاں اور ان کا کنٹرول دوبارہ اپنے ہاتھوں میں لے لیے ہیں۔‘‘

کورونا وائرس:نیوزی لینڈ کا جرمنی کو خراج تحسین

نیوزی لینڈ کی حکومت کی کورونا وائرس سے متعلق حکمت عملی کی خاص بات یہ تھی کہ یہ ملک اس عالمگیر وبا کے دوران زیادہ عرصے تک 'زیرو کووڈ‘ کی پالیسی پر عمل پیرا رہا تھا۔ اس دوران پہلی بار مارچ 2020ء میں اس وائرس کے باعث اور پھر اگست 2021ء میں اسی وائرس کے ڈیلٹا اور اومیکرون ویریئنٹس وہاں پہنچنے کے بعد طویل عرصے تک ملک گیر لاک ڈاؤن بھی نافذ رہے تھے۔

اطلاق نصف شب سے

نیوزی لینڈ میں کورونا وائرس سے متعلق اس نئی قومی پالیسی کا اطلاق پیر بارہ ستمبر کی رات مقامی وقت کے مطابق گیارہ بج کر انسٹھ منٹ سے ہو جائے گا۔ اس کے بعد صرف ایسے افراد کو ہی سات روز تک قرنطینہ میں رہنا ہو گا، جن کے تب تک کیے گئے کورونا ٹیسٹوں کے نتائج مثبت آئے ہوں۔

اس کے علاوہ اگر کسی گھرانے میں کووڈ انیس کا کوئی مریض قرنطینہ میں ہو، تو اس خاندان کے دیگر افراد کے لیے بھی قرنطینہ میں رہنا لازمی نہیں ہو گا بلکہ انہیں صرف احتیاطاﹰ اپنے روزانہ ٹیسٹ کرانا ہوں گے۔

نیوزی لینڈ کی مجموعی آبادی صرف تقریباﹰ پانچ ملین ہے اور وہاں آج تک کورونا وائرس کی 1.7 ملین سے زائد انفیکشنز ریکارڈ کی جا چکی ہیں۔ کووڈ انیس کے سبب اس ملک میں اب تک کی ہلاکتوں کی مجموعی تعداد تقریباﹰ دو ہزار بنتی ہے۔

م م / ع ا (اے پی، ڈی پی اے)