یہ بارہ سپرم وہیلز وانگیروگے، ہیلگولانڈ، بریمرہافن اور ٹیکسل کے ساحلوں سے ملی ہیں۔ تاہم یہ ابھی تک معلوم نہیں ہو سکا ہے کہ ان کی ہلاکت کی کیا وجہ تھی؟ اس وجہ کا پتہ چلانے کے لیے حکام اب قریب دس دس میٹر لمبی ان لاشوں کا پوسٹ مارٹم کر رہے ہیں۔

ساحلوں پر پڑی وہیل مچھلیوں کے مردہ اجسام کو اٹھانے کے لیے بھاری مشینری استعمال کی گئی۔ اسی طرح کے بڑے بڑے ٹرالروں کے ذریعے انہیں ایک سے دوسری جگہ منتقل کیا گیا۔ ایک مادہ سپرم وہیل کا وزن پندرہ ٹن جبکہ نر کا ساٹھ ٹن تک ہوتا ہے۔

سب سے پہلے ان وہیل مچھلیوں کی کھال کو کاٹا گیا اور پھر کھدائی کے لیے استعمال ہونے والی مشین کے ذریعے اسے جسم سے کھینچ کر اتارا گیا۔ اسی طرح ایک مشکل مرحلے سے گزرتے ہوئے دیگر حصوں کو بھی الگ کیا گیا۔ اس عمل کی نگرانی پر مامور ایک شخص نے ڈی ڈبلیو کو بتایا، ’’اتنے خوبصورت جانور کے ساتھ ایسا ہوتا دیکھ کر دل کو دکھ پہنچتا ہے۔‘‘

ان وہیل مچھلیوں کے کچھ حصے جرمنی کی گیسن یورنیورسٹی میں پہنچا دیے گئے ہیں۔ یہ ایک وہیل مچھلی کا جبڑا ہے۔ ماہرین ان اجسمام پر بہت احتیاط سے کام کر رہے ہیں تاکہ بعد ازاں ہڈیوں کو جوڑ کر وہیل کا ڈھانچہ دوبارہ سے تیار کیا جا سکے۔ وہیل کے ڈھانچے اکثر عجائب گھروں کی زینت بنتے ہیں۔

اب تک کی تحقیقات سے یہ پتہ چلا ہے کہ ان بارہ میں سے کچھ وہیلز کو خوراک کی کمی کا سامنا تھا۔ ایک ماہر ایلموٹ کووٹز کے مطابق،’’معدہ اور آنتیں بالکل خالی تھیں۔‘‘ سکویڈ یعنی انتہائی بڑا جھینگا (قیر ماہی) سپرم وہیل کی مرغوب ترین غذا ہے، جو شمالی سمندر میں نہیں پائے جاتے۔ ایسے میں یہ بھی ہو سکتا ہو کہ ان وہیل مچھلیوں نے خوراک کی تلاش میں ساحلوں کا رخ کیا ہو۔

جرمن شہر ہینوور میں جانوروں کی ایک ڈاکٹر ارزولا زیبرٹ نے بتایا کہ ان میں سے کچھ بظاہر مکمل طور پر صحت یاب دکھائی دیں:’’ان چند وہیلز کے پیٹ بھرے ہوئے تھے‘‘۔ ساحل پر پہنچنے کے بعد شاید یہ وہیل مچھلیاں اپنے وزن کی وجہ سے دوبارہ گہرے پانی میں پہنچ نہ سکیں اور یہ اس دوران پھیپھڑوں اور خون کی نالیوں پر پڑنے والے دباؤ کی وجہ سے ہلاک ہوئیں۔

سپرم وہیل صرف ایک سو میٹر گہرے بحیرہٴ شمال کے لیے نہیں ہیں۔ یہ مچھلیاں کئی سو میٹر گہرائی میں رہنے اور شکار کرنے کی عادی ہیں۔ بحیرہٴ شمال میں ان وہیل مچھلیوں کو بازگشت کی مدد سے اپنا راستے تلاش کرنے میں مشکلات کا سامنا کرنا پڑتا ہے۔ اسی وجہ سے اگر یہ ایک مرتبہ شمالی سمندر یا وَیڈن سی میں داخل ہو جائیں تو ان کی گہرے پانیوں میں واپسی تقریباً ناممکن ہوتی ہے۔

اسی طرح کا ایک واقعہ گزشتہ دنوں بھارت میں بھی رونماہوا۔ اس دوران بھارتی ریاست تامل ناڈو کے ساحلوں پر لمبے پروں والی اسّی پائلٹ وہیلز پہنچیں، جن میں سے چھتیس کو بچا لیا گیا تاہم بقیہ ہلاک ہو گئیں۔ اس سے قبل اسی ساحل پر 1973ء میں 147 وہیل مچھلیاں ہلاک ہو گئی تھیں۔

ایک ماہر فابیان رٹر کے مطابق پائلٹ وہیلز میں یکجہتی کا احساس کُوٹ کُوٹ کر بھرا ہوتا ہے۔ یہ جانور بالکل ایک مثالی خاندان کی طرح مل کر رہتے ہیں:’’اگر گروپ لیڈر بیمار ہو جائے یا کسی اور وجہ سے راستہ بھٹک کر غلط سمت میں ساحل کی جانب تیرنے لگے تو دیگر ساتھی یکجہتی کے طور پر بھی اس کے پیچھے ہو لیتے ہیں۔‘‘

تحفظ ماحول کے علمبردار سمندروں میں رواں دواں جہازوں، فوجی مشقوں اور دیگر بحری سرگرمیوں سے خبردار کر رہے ہیں۔ ان کا کہنا ہے کہ یہ تمام سرگرمیاں سمندری حیات کو بری طرح سے نقصان پہنچا رہی ہیں۔ فابیان رٹر کے مطابق ’’سماعت کے معاملے میں وہیل مچھلیاں انتہائی حساس ہوتی ہیں۔ سمندروں میں شور بڑھتا جا رہا ہے، جس سے وہیل مچھلیاں پریشان ہو رہی ہیں۔ شاید یہ بھی ان کی ساحلوں تک پہنچنے کی ایک وجہ ہے۔‘‘

2015ء میں دسمبر کے اواخر میں سورج کی سطح پر زمین کی سمت میں تین بڑے طوفان آئے۔ سورج کی سطح پر آنے والے ایسے طوفان زمینی مقناطیسیت میں خلل ڈالتے ہیں جبکہ وہیل مچھلیاں اسی مقناطیسیت کو اپنا راستہ تلاش کرنے کے لیے استعمال کرتی ہیں۔ تاہم جب مقناطیسیت کے سلسلے میں کوئی رکاوٹ پیدا ہوتی ہے تو پھر ان مچھلیوں کے راستہ بھٹک جانے اور ساحلوں تک پہنچنے کے امکانات بڑھ جاتے ہیں۔