نیٹو کے حملے کی مذمت، ڈیل پر دستخط کھٹائی میں
30 نومبر 2013![SHAH MARAI/AFP/Getty Images](https://static.dw.com/image/17044368_800.webp)
نیٹو کے زیر انتظام آئی سیف کی طرف سے جاری ہونے والے ایک بیان کے مطابق ان کے ایک حالیہ فضائی حملے میں ایک عسکریت پسند مارا گیا ہے تاہم نیٹو کا کہنا ہے کہ اسی واقعے میں ایک بچے کی ہلاکت کی خبر کی تحقیقات شروع کی جا رہی ہیں۔ قبل ازیں اس واقعے پر افغانستان میں موجود ایک اعلیٰ امریکی کمانڈر جوزف ڈن فورڈ نے معافی مانگی تھی۔
افغان صدر حامد کرزئی کی جانب سے اس واقعے کی مذمت سامنے آئی ہے۔ یہ مذمت ایک ایسے وقت سامنے آئی ہے جب کرزئی اور امریکی انتظامیہ کے درمیان تعلقات کشیدگی کا شکار دکھائی دے رہے ہیں۔ نیٹو افواج اگلے برس کے اختتام تک افغانستان سے رخصت ہو جائیں گی۔ گزشتہ ہفتے افغان دارالحکومت کابل میں ہونے والے لویہ جرگہ کے شرکاء نے امریکا کے ساتھ ایک سکیورٹی معاہدے کی حمایت کی تھی اور صدر کرزئی کو مشورہ دیا تھا کہ وہ اس معاہدے پر جلد دستخط کریں۔ اس معاہدے کی رُو سے امریکا سن دو ہزار چودہ کے بعد بھی افغانستان میں اپنی بعض افواج رکھ سکے گا۔ کرزئی اس معاہدے پر فوری دستخط سے انکار کر رہے ہیں۔ ان کا کہنا ہے کہ اس پر دستخط اگلے برس اپریل میں ہونے والے افغان صدارتی انتخابات کے بعد کیے جانے چاہییں۔ اس صورت حال میں نیٹو کے فضائی حملے میں مبینہ طور ایک بچے اور ایک خاتون کی ہلاکت نے امریکا اور افغانستان کے تعلقات کو مزید مشکل سے دوچار کر دیا ہے۔
افغان صدارتی محل کی طرف سے جاری کردہ ایک بیان میں کہا گیا ہے: ’’صدر کرزئی اس حملے کی شدید مذمت کرتے ہیں۔ اس سے ثابت ہوتا ہے کہ امریکی افواج افغان شہریوں کی زندگیوں کی قدر نہیں کر رہی۔ جب تک اس طرح کے واقعات جاری رہے ہم امریکا کے ساتھ دو طرفہ سکیورٹی معاہدے پر دستخط نہیں کریں گے۔‘‘
خیال رہے کہ یہ حملہ بغیر پائلٹ کے امریکی ڈرون طیارے سے کیا گیا تھا۔ اس حملے کا نشانہ ایک طالبان کمانڈر تھا۔
ڈرون حملوں کے خلاف پڑوسی ملک پاکستان میں بھی شدید ردعمل پایا جاتا ہے۔ پاکستان کے شمال مغربی صوبے خیبر پختون خواہ کی حکمران جماعت تحریک انصاف نے ان حملوں کے احتجاج کے طور پر پاکستان کے راستے افغانستان جانے والی ایک نیٹو سپلائی لائن بند کر رکھی ہے۔
پاکستان اور افغانستان کے کئی ماہرین ڈرون حملوں کو افغانستان اور پاکستان میں موجود طالبان اور القاعدہ کے عسکریت پسندوں کے خلاف ایک مؤثر ہتھیار بھی قرار دیتے ہیں۔ ان کا کہنا ہے کہ ان حملوں سے اسلامی عسکریت پسندوں کو شدید نقصان پہنچا ہے۔