سوئنگ کے سلطان وسیم اکرم کو پاکستان سپر لیگ کا برانڈ ایمبیسڈر مقرر کیا گیا ہے۔ وسیم پی ایس ایل کی تقریب رونمائی میں اپنی آسٹریلوی اہلیہ شنیرا کے ہمراہ شریک ہوئے۔

پاکستان کرکٹ ٹیم کے اوپنر احمد شہزاد نے اپنی شادی کے اگلے ہی روز تقریب میں شریک ہوئے۔ احمد شہزاد کے غیرملکی کوچنگ اسٹاف کے ساتھ اختلافات کی خبریں گز شتہ دنوں گرم رہیں لیکن وہ اس تقریب میں پاکستانی ٹیم کے زمبابوے سے تعلق رکھنے والے بیٹنگ کوچ گرانٹ فلاور احمد کے ساتھ ساتھ نظر آئے۔

کرکٹرز اور فلمی دنیا کا چولی دامن کا ساتھ رہا ہے۔ یہاں بھی فلمی اداکاروں علی ظفر اور فواد خان سمیت متعدد مدعو تھے۔ علی طفر نے پاکستان سپر لیگ کا آفیشل ترانہ بھی گا کر سنایا۔

عبدالقادرجو اپنی گگلی باؤلنگ کی وجہ سے دنیا بھر میں جانے جاتے ہیں، کافی عرصے کے بعد پاکستان کرکٹ بورڈ کی دعوت پر کسی فنکشن میں شریک ہوئے۔ عبدالقادر پی سی بی کی پالیسیز کے سخت ترین ناقدین میں شمار ہوتے ہیں اور حالیہ برسوں میں ان اختلافات میں اور اضافہ ہوا لیکن اب برف پگھل رہی ہے۔

پی ایس ایل لانچ میں سابق کپتان امتیاز احمد بھی توجہ کا مرکز رہے۔ پاکستان کے معمر ترین کرکٹرز میں سے ایک امتیاز احمد کافی عرصے بعد منظر عام پر آئے۔ ستاسی سالہ امتیاز احمد ڈبل سینچری بنانے والے ٹیسٹ کرکٹ کی تاریخ کے پہلے وکٹ کیپر تھے۔ انہوں نے یہ کارنامہ 1955 میں نیوزی لینڈ کے خلاف باغ جناح لاہور میں انجام دیا اور دو سو نو رنز کی اننگز کھیلی۔

فلمی ستاروں کی شرکت نے تقریب کو چار چاند لگا دیے ۔

پی ایس ایل لانچ میں پاکستان کرکٹ ٹیم کے نئے کھلاڑیوں عمران خان جونیر، بابر اعظم اور بلال آصف کو بھی مدعو کیا گیا تھا۔ عمران خان جونیر سوات سے پاکستان ٹیم میں شامل ہونے والے پہلے کھلاڑی ہیں اور اور ٹوئنٹی ٹوئنٹی میں اپنی باؤلنگ میں رفتار بدل کر دھوکا دینے کے لیے مشہور ہیں۔

چیرمین پی سی بی شہریارخان اور پاکستان کرکٹ کی خاتون اول بیگم شہریار نے بھی تقریب میں شرکت کی۔ ابتدا میں شہریار خان نے پی ایس ایل کی مخالفت کی تھی لیکن اب اس معاملے میں وہ لیگ کے سربراہ نجم سیٹھی کے ساتھ ایک پیج پر نظر آتے ہیں۔

تقریب کی نظامت کے فرائض پی ایس ایل کے برانڈ ایمبیسڈر اور مشہور ٹی وی کمنٹیٹر رمیز راجہ نے کی اور ا پنے چٹکلوں اور مخصوص انداز میں تقریب کو زعفران زار بنا دیا۔

پی ایس ایل کی تقریب نے ٹو ڈبلیوز وسیم اکرم اور وقار یونس کو ایک طویل عرصے کے بعد ایک اسٹیج پر پھر اکٹھا کر دیا۔ وسیم اور وقار کو کرکٹ کی تاریخ میں سب سے کامیاب اور خطرناک فاسٹ باؤلنگ پییر تسلیم کیا جاتا ہے۔ دونوں نے نوے کے عشرے میں اپنی ریورسنگ سوئنگ باؤلنگ کے ذریعہ پاکستان کو بے شمار فتوحات دلوائیں لیکن کیریر کے دوران دونوں کی دوستی اختلافات میں بدل گئی تھی۔