ڈیلاس کے مقامی وقت کے مطابق دِن 12 بج کر 31 منٹ پر امریکی صدر جان ایف کینیڈی (جے ایف کے) کو متعدد گولیاں ماری گئیں۔ یہ منظر کیمروں نے ریکارڈ کر لیا۔ صدر کے دِل اور سر پر گولیاں لگیں۔ اس وقت ان کی اہلیہ جیکی کینیڈی اور ان کے میزبان، ٹیکساس کے گورنر جان کونیلی اپنی اہلیہ نیلی کے ساتھ وہاں موجود تھے۔ کونیلی بھی شدید زخمی ہوئے۔ آج بھی اس بات کا پتہ نہیں کہ صدر کو کتنی گولیاں لگیں۔

وہ جمعے کا روشن دِن تھا جب امریکی صدر اور خاتون اوّل ڈیلاس ایئرپورٹ پر پہنچے۔ قدامت پسند ریاست ٹیکساس میں ان کی انتخابی مہم کا یہ دوسرا دِن تھا۔ شہر سے کارواں گزرنے سے پہلے انہوں نے خود ہی اپنی لیموزِن کا اوپری حصہ کھولنے کی تجویز دی تھی۔

اپنی آمد کے ایک گھنٹہ بعد، امریکا کے 35ویں صدر کو ڈیلے پلازہ کے قریب گولیاں ماری گئیں۔ انہیں پارک لینڈ میموریل ہسپتال پہنچایا گیا تو ان کے دِل کی دھڑکن باقی تھی، لیکن ان کے سر پر لگنے والی گولی نے ان کا بچنا مشکل بنا دیا اور وہ دم توڑ گئے۔ اس وقت ان کی عمر 46 برس تھی۔

نائب صدر لِنڈن بی جانسن نے ایئرفورس وَن پر ہی صدر کے عہدے کا حلف اٹھایا۔ اس وقت جیکی کینیڈی بھی ان کے ساتھ کھڑی تھیں جب کہ جان ایف کینیڈی کا جسدِ خاکی بھی طیارے پر ہی تھا، جسے پوسٹ مارٹم کے لیے واشنگٹن لے جایا جا رہا تھا۔ اس کے چار روز بعد، جانسن نے قتل کی تفتیش کے لیے ایک کمیشن تشکیل دیا۔ تاہم وارن کمیشن کی جانب سے پیش کیے گئے تفتیش کے نتائج متنازعہ رہے۔

صدر پر گولیاں بظاہر ایک پبلیشنگ ہاؤس کی چھٹی منزل سے چلائی گئی تھیں۔ اس میں استعمال ہونے والی بندوق لی ہاروی اوسویلڈ کی تھی جسے دراصل صدر پر حملے سے ڈیڑھ گھنٹہ بعد ایک پولیس اہلکار کے قتل کے الزام میں گرفتار کیا گیا تھا۔ اوسویلڈ سے تفتیش کے دوران پولیس نے اس پر صدر کے قتل کا شبہ ظاہر کیا۔ تاہم اس نے قتل کی دونوں وارداتوں میں ملوث ہونے کے الزام سے انکار کیا۔

24 نومبر اوسویلڈ کو ایک دوسری جیل میں منتقل کیا جا رہا تھا۔ایک ٹیلی وژن کا عملہ اس کارروائی کو ریکارڈ کر رہا تھا کہ ایک نائٹ کلب کا مالک جیک رُوبی نے مشتبہ قاتل کے سامنے آ کر اسے گولی مار دی۔ لاکھوں لوگوں نے یہ منظر ٹیلی وژن پر دیکھا۔ اوسویلڈ کو بھی پارک میموریل ہسپتال لے جایا گیا، جہاں وہ چل بسا۔

آرلنگٹن کے نیشنل قبرستان میں 25 نومبر کو صدر کی تدفین ہوئی۔ ان کے اس آخری سفر میں لاکھوں لوگ قبرستان جانے والے راستوں پر موجود تھے۔ ان کی میموریل سروس کو دنیا بھر میں ٹیلی وژن پر دیکھا گیا۔

جے ایف کے کی موت کے بعد، جیکی اپنے شوہر سے جدائی کے غم میں ڈوبی ہوئی تھیں جب کہ امریکی قوم ایسے سیاسی رہنما کے بچھڑنے کا سوگ منا رہی تھی جس نے بہت سے لوگوں کو متاثر کیا۔ واشنگٹن کے سینٹ میتھیوکیتھیڈرل میں میموریل سروس کے بعد کینیڈی کے دو بھائی اور ان کی بیوہ تابوت کے ساتھ قبرستان روانہ ہوئے۔ پانچ سال بعد رابرٹ کینیڈی بھی ایک قاتلانہ حملے کا نشانہ بنے۔

جرمنی میں بھی جان ایف کینیڈی کی موت کا سوگ منایا گیا۔ بالخصوص مغربی برلن میں، جہاں جے ایف کے نے اگست 1963ء میں ایک دورے میں خود کو برلن کا شہری قرار دیا تھا۔ اس بناء وہ برلن میں خاصے مقبول تھے۔

کینیڈی کی مدت صدارت 1961ء تا 1963ء سرد جنگ کے عروج کا زمانہ تھا۔ اس زمانے میں ہی دیوارِ برلن، کیوبا کے میزائل کا تنازعہ اور ویت نام کی جنگ سامنے آئی۔ بہت سے لوگوں کے لیے وہ ایک نوجوان اور کرشماتی صدر تھے اور وہ انہیں ’جیک‘ کہہ کر پکارتے تھے۔ انہیں امریکا کے لیے ایک نئے دَور بھی بھی تعبیر کیا جاتا تھا۔ ان کا قتل امریکی شعور کے لیے ایک خوفناک دھچکا تھا۔