امریکہ کے سابق صدر ڈونلڈ ٹرمپ نے اتوار کے روز اس بات کی تصدیق کی کہ وہ بدھ کے روز ٹیلیویژن پر ہونے  والے پہلے ریپبلکن پارٹی کے صدارتی امیدوار کے پرائمری مباحثے میں حصہ نہیں لیں گے۔

ڈونلڈ ٹرمپ نے سوشل میڈیا پلیٹ فارم 'ٹروتھ' پر اپنی ایک پوسٹ میں لکھا، ''عوام کو معلوم ہے کہ میں کون ہوں اور میں نے کس قسم کی کامیاب صدارت پیش کی تھی۔''

سن 2024 کے صدارتی انتخابات سے قبل ریپبلکن ووٹروں میں اپنی مقبولیت کے ثبوت میں حالیہ رائے عامہ کے جائزوں میں اپنی برتری کا ذکر کرتے ہوئے ٹرمپ نے مزید کہا کہ، ''اسی لیے میں مباحثوں میں شرکت نہیں کروں گا۔''

صدارتی امیدواری کے لیے پارٹی کے ابتدائی مباحثوں میں ٹرمپ کی غیر حاضری پر پہلے ہی سے قیاس کیا جا رہا تھا۔ وہ مہینوں سے بار بار اپنا یہ موقف دہراتے رہے ہیں کہ وہ پارٹی میں اپنے دیگر حریفوں کو موقع دینے کی اہمیت کو قطعی اہم نہیں سمجھتے۔

ڈونلڈ ٹرمپ پر انتخابات میں مداخلت کرنے کا الزام، فرد جرم عائد کر دی گئی

واضح رہے کہ آئندہ بدھ کے روز ملواکی میں ریپبلکن پارٹی کے دیگر صدارتی امیدوار کی کوشش کرنے والے امیدوار پہلی بار جمع ہونے والے ہیں اور اس موقع پر وہ انتخابات میں ٹرمپ کی برتری کے پیش نظر ان پر سیاسی حملہ کرنے کی کوشش کریں گے۔

مباحثوں سے ٹرمپ کی غیر موجودگی کا مطلب کیا ہو سکتا ہے؟

اتوار کے روز ہونے والے سی بی ایس کے سروے سے پتہ چلتا ہے کہ ریپبلکن ووٹروں میں سے 62 فیصد کے لیے سابق صدر ٹرمپ پسندیدہ امیدوار ہیں۔ ان کے قریبی حریف فلوریڈا کے گورنر رون ڈی سینٹیس ہیں جنہیں، صرف 16 فیصد ووٹر کی حمایت حاصل تھی۔ اس دوڑ میں شامل دیگر ریپبلکنز کو 10 فیصد سے بھی کم ووٹر کی حمایت حاصل ہے۔

ان رائے شماری میں ٹرمپ کی نمایاں برتری اس بات کی عکاس ہے کہ سابق صدر پر چار معاملات میں فرد جرم عائد ہونے کے باوجود وہ ریپبلکن پارٹی میں اب بھی کافی مقبول ہیں۔

بدھ کے روز ہونے والے اجتماع میں ڈی سینٹس کے علاوہ سابق امریکی نائب صدر مائیک پینس اور جنوبی کیرولائنا کی سابق گورنر نکی ہیلی کی بھی بحث میں حصہ لینے کی توقع ہے۔

اس ہفتے کی بحث میں ٹرمپ کی غیر موجودگی ان کے حریفوں میں ڈی سینٹیس جیسے سیاستدان کو ان کے خلاف سیاسی زمین حاصل کرنے میں مدد حاصل ہو سکتی ہے۔

ڈونلڈ ٹرمپ کے خلاف فوجداری مقدمے میں فرد جرم عام کر دی گئی

مباحثے میں شامل دیگر امیدواروں میں سے نیو جرسی کے سابق گورنر کرس کرسٹی پر سب کی نظریں ہوں گی، جو پورے پروگرام میں ٹرمپ پر مسلسل حملہ کر سکتے ہیں۔ چونکہ سابق صدر اسٹیج پر موجود نہیں ہوں گے اس وجہ سے وہ اپنے خلاف الزامات کا بر وقت دفاع بھی نہیں کر پائیں گے۔

ص ز/ ج ا (ڈی پی اے، روئٹرز، اے پی)