افغانستان نے اسرائیل کے قیام سے لے کر اب تک نہ تو اسرائیل کو تسلیم کیا ہے اور نہ ہی دونوں ممالک کے مابین سفارتی تعلقات ہیں۔ سن 2005 میں اُس وقت کے افغان صدر حامد کرزئی نے عندیہ دیا تھا کہ اگر الگ فلسطینی ریاست بننے کا عمل شروع ہو جائے تو اس کے بعد اسرائیل کے ساتھ سفارتی تعلقات ممکن ہیں۔

عرب لیگ کے رکن شمالی افریقی مسلم اکثریتی ملک الجزائر اسرائیل کو بطور ملک تسلیم نہیں کرتا اس لیے دونوں کے مابین سفارتی تعلقات بھی نہیں ہیں۔ الجزائر سن 1962 میں آزاد ہوا اور اسرائیل نے اسے فوری طور پر تسلیم کر لیا، لیکن الجزائر نے ایسا کرنے سے گریز کیا۔ اسرائیلی پاسپورٹ پر الجزائر کا سفر ممکن نہیں۔ سن 1967 کی جنگ میں الجزائر نے اپنے مگ 21 طیارے اور فوجی مصر کی مدد کے لیے بھیجے تھے۔

انڈونیشیا اور اسرائیل کے مابین باقاعدہ سفارتی تعلقات نہیں ہیں تاہم دونوں ممالک کے مابین تجارتی، سیاحتی اور سکیورٹی امور کے حوالے سے تعلقات موجود ہیں۔ ماضی میں دونوں ممالک کے سربراہان باہمی دورے بھی کر چکے ہیں۔ سن 2012 میں انڈونیشیا نے اسرائیل میں قونصل خانہ کھولنے کا اعلان بھی کیا تھا لیکن اب تک ایسا ممکن نہیں ہو سکا۔

اسرائیل کے قیام کے وقت ایران ترکی کے بعد اسرائیل کو تسلیم کرنے والا دوسرا مسلم اکثریتی ملک تھا۔ تاہم سن 1979 میں ایران میں اسلامی انقلاب کے بعد صورت حال یکسر بدل گئی۔ ایران اسرائیل کو اب تسلیم نہیں کرتا اور مشرق وسطیٰ میں یہ دونوں ممالک بدترین حریف سمجھے جاتے ہیں۔

برونائی کا شمار بھی ان قریب دو درجن ممالک میں ہوتا ہے جنہوں نے اسرائیل کے قیام سے لے کر اب تک اسے تسلیم نہیں کیا اور نہ ہی دونوں ممالک کے باہمی سفارتی تعلقات ہیں۔

بنگلہ دیش نے بھی اعلان کر رکھا ہے کہ جب تک آزاد فلسطینی ریاست نہیں بن جاتی تب تک ڈھاکہ حکومت اسرائیل کو تسلیم نہیں کرے گی۔ اسرائیل نے بنگلہ دیش کی آزادی کی جنگ کی حمایت کی تھی اور اس کے قیام کے بعد اسے تسلیم کرنے والے اولین ممالک میں اسرائیل کا شمار بھی ہوتا ہے۔

بھوٹان کے اسرائیل کے ساتھ سفارتی تعلقات بھی نہیں اور نہ ہی وہ اسے تسلیم کرتا ہے۔ بھوٹان کے خارجہ تعلقات بطور ملک بھی کافی محدود ہیں اور وہ چین اور اسرائیل سمیت ان تمام ممالک کو تسلیم نہیں کرتا جو اقوام متحدہ کے رکن نہیں ہیں۔

پاکستان نے اسرائیل کو تسلیم نہیں کیا اور نہ ہی دونوں ممالک کے مابین سفارتی تعلقات ہیں۔ پاکستانی پاسپورٹ پر یہ بھی درج ہے کہ یہ اسرائیل کے علاوہ تمام ممالک کے لیے کارآمد ہے۔ عرب اسرائیل جنگ میں پاکستان نے اسرائیل کے خلاف عسکری مدد روانہ کی تھی اور اسرائیل نے مبینہ طور پر پاکستانی جوہری منصوبہ روکنے کی کوشش بھی کی تھی۔ پاکستان نے بھی دو ریاستی حل تک اسرائیل کو تسلیم نہ کرنے کا اعلان کر رکھا ہے۔

جمہوریہ جبوتی عرب لیگ کا حصہ ہے اور اس کے اسرائیل کے ساتھ سفارتی تعلقات نہیں ہیں۔ تاہم 50 برس قبل دونوں ممالک نے تجارتی تعلقات قائم کر لیے تھے۔

سعودی عرب کے اسرائیل کے ساتھ نہ تو باقاعدہ سفارتی تعلقات ہیں اور نہ ہی اب تک اس نے اسرائیل کو تسلیم کیا ہے۔ حالیہ برسوں کے دوران تاہم دونوں ممالک کے باہمی تعلقات میں بہتری دکھائی دی ہے۔ سعودی شاہ عبداللہ نے سن 2002 میں ایک ہمہ جہت امن منصوبہ تجویز کیا لیکن تب اسرائیل نے اس کا جواب نہیں دیا تھا۔ سعودی عرب نے اسرائیل اور یو اے ای کے تازہ معاہدے کی حمایت یا مخالفت میں اب تک کوئی بیان جاری نہیں کیا۔

ہمسایہ ممالک اسرائیل اور شام عملی طور پر اسرائیل کے قیام سے اب تک مسلسل حالت جنگ میں ہیں اور سفارتی تعلقات قائم نہیں ہو پائے۔ دونوں ممالک کے مابین تین جنگیں لڑی جا چکی ہیں۔ علاوہ ازیں شام کے ایران اور حزب اللہ کے ساتھ بھی قریبی تعلقات ہیں۔ اسرائیل خود کو لاحق خطرات کا حوالہ دیتے ہوئے شام میں کئی ٹھکانوں کو نشانہ بناتا رہا ہے۔

شمالی کوریا نے بھی اسرائیل کو تسلیم نہیں کیا بلکہ اس کے برعکس شمالی کوریا نے سن 1988 میں فلسطینی ریاست تسلیم کرنے کا اعلان کر دیا تھا۔

افریقی ملک صومایہ بھی اسرائیل کو تسلیم نہیں کرتا اور نہ ہی دونوں کے باہمی سفارتی تعلقات وجود رکھتے ہیں۔

عراق نے بھی اب تک اسرائیل کو تسلیم نہیں کیا اور نہ ہی دونوں ممالک کے مابین سفارتی تعلقات ہیں۔ اسرائیلی ریاست کے قیام کے بعد ہی عراق نے اسرائیل کے خلاف اعلان جنگ کر دیا تھا۔ عراقی کردوں نے تاہم اپنی علاقائی حکومت قائم کرنے کا اعلان کرتے ہوئے اسرائیل کے ساتھ سفارتی تعلقات قائم کرنے کا عندیہ بھی دیا تھا۔

عرب لیگ کے دیگر ممالک کی طرح عمان بھی اسرائیل کو تسلیم نہیں کرتا تاہم سن 1994 میں دونوں ممالک نے تجارتی تعلقات قائم کیے تھے جو سن 2000 تک برقرار رہے۔ دو برس قبل نیتن یاہو کی قیادت میں اسرائیل وفد نے عمان کا دورہ کیا تھا۔ عمان نے اماراتی اسرائیلی معاہدے کی بھی حمایت کی ہے۔ اسرائیلی حکام نے امید ظاہر کی ہے کہ عمان بھی جلد ہی اسرائیل کے ساتھ ایسا معاہدہ کر لے گا۔

قطر اور اسرائیل کے مابین سفارتی تعلقات نہیں ہیں اور نہ ہی اس نے اب تک اسرائیل کو تسلیم کیا ہے۔ لیکن دونوں ممالک کے مابین تجارتی تعلقات رہے ہیں۔ اسرائیلی پاسپورٹ پر قطر کا سفر نہیں کیا جا سکتا لیکن سن 2022 کے فٹبال ورلڈ کپ کے لیے اسرائیلی شہری بھی قطر جا سکیں گے۔ اماراتی فیصلے کے بارے میں قطر نے اب تک کوئی بیان جاری نہیں کیا۔

بحر ہند میں چھوٹا سا افریقی ملک جزر القمر نے بھی ابھی تک اسرائیل کو تسلیم نہیں کیا۔ عرب لیگ کے رکن اس ملک کے تل ابیب کے ساتھ سفارتی تعلقات بھی نہیں ہیں۔

کویت نے بھی اب تک اسرائیل کو تسلیم نہیں کیا اور نہ ہی ان کے سفارتی تعلقات ہیں۔ متحدہ عرب امارات اور اسرائیل کے مابین تاریخی امن معاہدے کے بارے میں کویت نے دیگر خلیجی ریاستوں کے برعکس ابھی تک کوئی بیان جاری نہیں کیا۔

اسرائیل کے پڑوسی ملک لبنان بھی اسے تسلیم نہیں کرتا اور نہ ہی ان کے سفارتی تعلقات ہیں۔ لبنان میں ایرانی حمایت یافتہ تنظیم حزب اللہ اور اسرائیل کے مابین مسلسل جھڑپوں کے باعث اسرائیل لبنان کو دشمن ملک سمجھتا ہے۔ اسرائیل نے سن 1982 اور سن 2005 میں بھی لبنان پر حملہ کیا تھا۔

لیبیا اور اسرائیل کے مابین بھی اب تک سفارتی تعلقات نہیں ہیں اور نہ ہی اس نے اسرائیل کو تسلیم کیا ہے۔

ملائیشیا نے اسرائیل کو تسلیم نہیں کیا اور نہ ہی ان کے سفارتی تعلقات ہیں۔ علاوہ ازیں ملائیشیا میں نہ تو اسرائیلی سفری دستاویزت کارآمد ہیں اور نہ ہی ملائیشین پاسپورٹ پر اسرائیل کا سفر کیا جا سکتا ہے۔ تاہم دونوں ممالک کے مابین تجارتی تعلقات قائم ہیں۔

یمن نے بھی اسرائیل کو تسلیم نہیں کیا اور نہ ہی سفارتی تعلقات قائم کیے۔ دونوں ممالک کے مابین تعلقات کشیدہ رہے ہیں اور یمن میں اسرائیلی پاسپورٹ پر، یا کسی ایسے پاسپورٹ پر جس پر اسرائیلی ویزا لگا ہو، سفر نہیں کیا جا سکتا۔

بمباری سے تباہ ہونے والے یہ گھر، رشتہ داروں کی ہلاکتیں یا زخمی دوست، شامی شہر حلب میں جاری خانہ جنگی بھی بچوں کے ذہنوں پر منفی اثر ڈال رہی ہے۔ اس صورتحال نے بہت سے بچوں کو اس تنازعے کا حصہ بننے پر مجبور کر دیا ہے اور اب یہ بھی اپنی زندگی بچانے کے لیے ہتھیار اٹھا کر لڑ رہے ہیں۔

دہشت گرد تنظیم اسلامک اسٹیٹ بھی بچوں کو اپنی درندگی کا نشانہ بنا رہی ہے۔ اقوام متحدہ کے مطابق آئی ایس بچوں کو خود کش بمباروں کے علاوہ اپنے لیے انسانی ڈھال کے طور پر بھی استعمال کر رہی ہے۔

بچوں کی فلاح و بہبود کے ادارے یونیسیف کے مطابق نو عمر بچوں کو باغیوں اور حکومت کی حامی حریف جنگجو تنظیمیں اپنا حصہ بناتی ہیں اور پھر انہیں مسلح تنازعات میں لڑنے کے لیے بھیج دیا جاتا ہے۔ ان میں بچے اور بچیاں دونوں شامل ہوتے ہیں۔ اپنے مقاصد پورا کرنے کے لیے یتیم اور بے سہارا بچوں کو بھی نہیں بخشا جاتا اور کچھ واقعات میں تو بچوں کو والدین سے زبردستی چھین بھی لیا جاتا ہے۔

سوڈان، جنوبی سوڈان، صومالیہ اور چاڈ چند ایسے ممالک ہیں، جن میں گزشتہ برسوں کے دوران بچوں کی ایک بڑی تعداد کو خانہ جنگی کی آگ میں جھونکا گیا ہے۔ اقوام متحدہ کے مطابق ان ممالک میں تقریباً ڈھائی لاکھ بچے مختلف افواج اور باغیوں کی طرف جنگ کا حصہ بنائے گئے ہیں۔ عالمی ادارے کی ایک رپورٹ میں تئیس ممالک کی ایسی باون جنگجو تنظیموں کے نام شامل ہیں، جو بچوں کو اپنے مذموم مقاصد کے لیے استعمال کر رہی ہیں۔

یونیسیف کی نِنیا شاربونو کہتی ہیں کہ افسوس کی بات ہے لیکن بچوں کو کسی بھی جنگ میں شامل کرنے کے بڑے فوائد ہیں۔ ’’بچوں کو آسانی سے قابو کیا اور استعمال میں لایا جا سکتا ہے۔ ان پر اخراجات بھی زیادہ نہیں آتے۔ اس کے علاوہ وہ زیادہ تر منشیات کے نشے میں دُھت رہتے ہیں۔‘‘ یہ بچے اس خوف میں زندگی بسر کرتے ہیں کہ حکم عدولی کرنے پر انہیں قتل کر دیا جائے گا۔

ان میں سے کچھ بچے اپنے ناخداؤں کے چنگل سے فرار ہونے میں کامیاب بھی ہو جاتے ہیں۔ یہ کم عمر فوجی اقوام متحدہ کے امن فوجیوں کے سامنے ہتھیار ڈال دیتے ہیں، جس کے بعد انہیں خوراک اور بنیادی طبی سہولیات فراہم کی جاتی ہیں۔ ایسے زیادہ تر بچے کم خوراکی، جنسی، نفسیاتی اور منشیات سے جڑی مختلف بیماریوں کا شکار ہوتے ہیں۔

یہ بچے اپنی بنیاد سے الگ کر دیے جاتے ہیں اور انہیں اپنے ماضی کے واقعات اور ذہنی مسائل پر قابو پانے میں شدید مشکلات کا سامنا کرنا پڑتا ہے۔ اس کے لیے ضروری ہے کہ انہیں دوبارہ سے معاشرے کا حصہ بنایا جائے۔ اقوم متحدہ کے کیمپوں میں انہیں تعلیم بھی دی جاتی ہے۔

شینا کائٹیٹسی یوگنڈا کے ایک جنگجو گروپ سے فرار ہونے والوں میں سے ایک ہیں۔ اب بطور مصنفہ انہوں نے ماضی کے بہیمانہ واقعات کو ایک کتاب کی صورت میں شائع کیا ہے۔ ’فائٹنگ فار مائی لائف‘ نامی یہ کتاب انہوں نے ڈنمارک پہنچنے کے بعد تحریر کی۔

عمانوئل جال کا بچپن بھی تنازعات کی نذر ہوا۔ وہ سوڈان کے ایک مسلح گروپ کا رکن تھا اور اب وہ ایک معروف ہپ ہاپ گلوکار بن چکا ہے۔ اس کے بقول اپنے ماضی کو فراموش کرنا اس کے لیے ممکن نہیں۔

کم عمر بچوں کی مسلح تنازعات میں شمولیت کی روک تھام کے اقوام متحدہ کے کنونشن کی ڈیڑھ سو ممالک توثیق کر چکے ہیں۔ بارہ فروی 2012ء سے اس پر عمل درآمد بھی شروع ہو گیا۔ اسی وجہ سے ہر سال بارہ فروری کو ’ریڈ ہینڈ ڈے‘ منایا جاتا ہے۔

اقوام متحدہ کے 1989ء کے کنونشن کے مطابق پندرہ سال سے کم عمر بچوں کو’چائلڈ سولجر‘ کہتے ہیں۔ انسانی حقوق کی تنظیموں کے مطابق کسی مسلح تنازعے میں شامل یا اس میں تعاون کرنے والے 18 سال سے کم عمر کے تمام بچے ’چائلڈ سولجر‘ کہلاتے ہیں۔