امریکی صدر ڈونلڈ ٹرمپ نے عراق اور افغانستان کے بعد اب شورش زدہ افریقی ملک صومالیہ سے بھی ملکی افواج کے انخلاء کا حکم جاری کیا ہے۔ صومالیہ میں سات سو امریکی فوجی تعینات ہیں۔ ان فوجیوں کی تعیناتی کا مقصد القاعدہ سے وابستگی رکھنے والی انتہا پسند مسلح تنظیم الشباب کی پرتشدد کارروائیوں کو کنٹرول کرنے کی صومالی فوج کی کوششوں کو تقویت دینا ہے۔

صوماليہ ميں دہشت گردوں کا بڑا حملہ

قبل ازیں صدر ٹرمپ افغانستان اور عراق میں بھی متعین فوجیوں میں کمی کرتے ہوئے ایک بڑی تعداد میں اپنے فوجیوں کے انخلاء کا اعلان کر چکے ہیں۔ ٹرمپ مسلسل اپنے فوجیوں کی واپسی کا تذکرہ کرتے رہے ہیں اور اب یہ فیصلہ بھی انہی بیانات کا تسلسل ہے۔ ٹرمپ کے پلان کے تحت عراق میں امریکی فوجیوں کی تعداد تین ہزار سے کم کر کے ڈھائی ہزار اور افغانستان سے پانچ ہزار فوجیوں کی تعداد نصف کرنے کے فیصلے کیے جا چکے ہیں۔

امریکی فوج کا صومالی مشن

یہ امر اہم ہے کہ امریکی عوام اور تجزیہ کاروں میں صومالی مشن پر کوئی زیادہ توجہ مرکوز نہیں کی گئی لیکن ملکی وزارتِ دفاع کے نزدیک یہ مشن خاصا اہمیت کا حامل ہے۔ صومالی مشن بھی القاعدہ اور اس کے نیٹ ورک کے خلاف پینٹاگون (امریکی وزارتِ دفاع کا صدر دفتر) کی بین الاقوامی عسکری عملی کوششوں کا ایک اہم باب خیال کیا جاتا ہے۔

صومالیہ اور اس کے ہمسایہ ممالک میں دہشت گرد تنظیم الشباب نے اپنے خونی حملوں سے خوف و ہراس کی فضا قائم کر رکھی ہے۔ اس تنظیم کے عسکریت پسندوں کے خلاف صومالی فوج کی معاونت اور مدد امریکی فوجیوں کی ذمہ داری تھی۔

کينيا اور امريکا کے مشترکہ فوجی اڈے پر جہاديوں کا حملہ

صومالیہ سے انخلاء اور ہمسایہ ملکوں میں تعیناتی

صومالیہ سے امریکی فوج کے انخلاء کے صدارتی حکم میں یہ واضح کیا گیا ہے کہ کچھ فوجی شورش زدہ ملک کے ہمسایہ ملکوں میں رکھے جائیں گے تا کہ وہ کسی فوجی کارروائی کی ضرورت میں سرحد عبور کر کے صومالی فوج کی مدد کر سکیں۔ یہ نہیں بتایا گیا کہ امریکی فوجی صومالیہ کے کن ہمسایہ ممالک میں متعین کیے جائیں گے۔

رواں برس نومبر میں وزیرِ دفاع کے منصب سے برخاست کیے جانے والے مارک ایسپر صومالیہ میں امریکی فوجیوں کے انخلاء کے مخالف تھے۔ اس کے علاوہ امریکی عسکری انسپیکٹرز نے بھی اس انخلاء کے منصوبے کی مخالفت کی تھی۔ صومالیہ سے نکلنے والے فوجیوں کی اگلی تعیناتی کا وقت قریب وہی ہو گا جب ٹرمپ مسند صدارت سے فارغ ہو کر جا رہے ہوں گے۔ نومنتخب صدر جو بائیڈن اگلے سال بیس جنوری کو صدارتی منصب سنبھالیں گے۔

فوجیوں کا انخلاء پالیسی میں تبدیلی نہیں

امریکی عسکری ہیڈ کوارٹرز پینٹاگون کے اعلان کے مطابق صومالیہ سے فوج اور ساز و سامان کی نئی تعیناتی سن دو ہزار اکیس کے اوائل میں مکمل ہو گی اور یہ اس ملک کے لیے طے شدہ امریکی پالیسی میں تبدیلی کا باعث نہیں ہو گی۔ اس اعلان میں کہا گیا کہ پرتشدد انتہا پسندی کو کنٹرول کرنے کی پالیسی میں بھی کسی تبدیلی کا کوئی امکان نہیں ہے کیونکہ اس میں تبدیلی سے امریکا کی داخلی صورت حال پر منفی اثرات مرتب ہو سکتے ہیں۔

پینٹاگون کے مطابق اب تک حاصل کی گئی اسٹریٹیجک برتری کو کسی بھی صورت میں ضائع نہیں کیا جائے گا۔ دوسری جانب ماہرین کا کہنا ہے کہ صومالیہ سے امریکی فوجیوں کی واپسی سے اس ملک میں طاقت کا توازن خراب ہونے کا قوی امکان ہے اور قرن افریقہ میں مسلح عسکریت پسندی کو فروغ حاصل ہو سکتا ہے۔

ع ح، ع آ (روئٹرز)