چاند پر پہلا قدم رکھنے والے انسان نیل آرمسٹرانگ سے بہت پہلے کئی مصور اور مصنف خلائی سفر کی عکاسی تصاویر اور ادب پاروں میں کر چکے تھے۔ آج کے اسپیس ہیروز جیسے کردار جرمن کہانیوں کی سیریز پیری رہوڈن میں موجود ہیں۔ ایسی کہانیوں کو جدید ادب کے ابتدائی فن پاروں میں پڑھا جا سکتا ہے۔

یورپ میں لیونارڈو ڈا وِنچی اور کئی دیگر مصور نشاة ثانیہ کی تحریک کے دوران خلا کو موضوع بنا چکے ہیں۔ اطالوی فلسفی جوردانو برونو نے نظام شمسی اور کائنات میں اس کی ماہیت کو موضوع بنایا تھا۔ اسی بنیاد پر انہیں سن 16 سو میں کیتھولک چرچ نے سزائے موت سنا دی تھی۔

کلیسا ان تمام تر اقدامات کے باوجود سائنس کو دبانے میں ناکام رہا۔ محقق اپنے راستے پر جتے رہے اور لکھاری بھی ان موضوعات پر قلم اٹھاتے رہے۔ 1638 میں انگریز مصنف فرانسس گوڈوِن نے مشہور زمانہ ناول ’مین ان دا مون‘ یا ’انسان چاند پر‘ تحریر کیا۔

اسی موضوع پر سن 1828ء تا 1905ء تک زندہ رہنے والے فرانسیسی لکھاری ژولے ویرنے نے اپنا ناول ’فروم ارتھ ٹو دا مُون‘ یا ’زمین سے چاند تک‘ لکھا۔ انہیں اسی ناول کے تناظر میں سائنس فکشن ادب کے بانیوں میں سے ایک قرار دیا جاتا ہے۔

سن 1902ء میں خلا کے موضوع کو پہلی مرتبہ بڑی اسکرین پر منتقل کیا گیا۔ اس فلم میں زمین سے چاند تک کے تصوراتی سفر کی عکاسی کی گئی۔ اس فلم میں خلا نوردوں کو ایک کیپسول کے ذریعے چاند تک پہنچتے دکھایا گیا۔ اس فلم کے مناظر بعد میں بار بار مختلف حوالوں کے لیے بھی استعمال ہوتے رہے۔

روسی مصور کاسیمیر مالیوِچ نے سن 1914 اور 1915 کے درمیان ایک تجریدی پینٹنگ بنائی، جس میں تمثیلی انداز میں بے وزنی کی کیفیت دکھائی گئی تھی۔

سن 1929ء میں شہرہ آفاق ہدایت کار فریٹس لانگ نے ’عورت چاند پر‘ کے موضوع پر فلم بنائی۔ اس فلم کے بعد جرمنی میں خلا میں سفر کا بے انتہا جنون پیدا ہوا اور خلائی تحقیق پر توجہ دی جانے لگی، تاہم دوسری عالمی جنگ نے جرمنی میں چاند کے سفر کی امیدوں کو خاک میں ملا دیا۔

امریکا میں سن 1969ء میں چاند پر اترنے سے قبل سٹار ٹریک نامی فلم منظرِ عام پر آ چکی تھی، تاہم چاند پر انسانی قدم پڑ جانے کے باوجود آگے سے آگے کی خواہش مزید بڑھتی چلی گئی۔ اپالو گیارہ کے ذریعے چاند تک انسان کو لے جانے اور واپس زمین پر پہنچا دینے کے کامیاب سفر کے بعد انسانی نگاہ دیگر سیاروں کی طرف بڑھتی چلی گئی۔ تاہم مصنفین اور مصوروں کے قلم یہاں بھی سائنسدانوں سے آگے ہی رہے۔

1968ء فن لینڈ کے ماہر تعمیرات ماتی سرونن نے سائنس فکشن سے متاثر ہوتے ہوئے دائرہ نما مکان تعمیر کیا، جسے یو ایف او ہاؤس کا نام دیا گیا۔ جرمن فنکار اور خلا ئی موضوعات پر تخیل دوڑانے والے چارلس ویلپ اسی عمارت میں بیٹھا کرتے تھے۔

جرمن مصورہ اُلریکے آرنولڈ نے خلا کو اپنے فن کا موضوع بنایا۔ انہوں نے سیارچوں کی گرد اور کائناتی مادوں کو اپنی پینٹنگز کا حصہ بنایا۔ انہوں نے ریت کو رنگوں میں شامل کر کے جنت اور جہنم اور خلا و کائنات کے دیگر کئی مناظر کی عکاسی بھی کی۔

ہوائی کے جزیرے پر آتش فشاں ماؤنا لوآ کی سنگلاخ چٹانوں پر مریخ کا ایک ’مصنوعی تجرباتی سفر‘ کرنے کی تیاری کی گئی ہے۔ اٹھائیس اگست سے شروع ہونے والے اس غیر حقیقی سفر میں ایک سال کے دوران چھ مختلف افراد تجربات کریں گے۔ یہ سائنسدان ایک ایسے گنبد نما خیمے میں رہیں گے، جس کے ارد گرد پتھروں کے علاوہ کچھ نہیں ہو گا۔

اس مصنوعی مشن HI-SEAS 4 میں جرمن خاتون سائنسدان کرسٹیانے ہائینِکے بھی خدمات سر انجام دے رہی ہیں۔ امریکی خلائی ادارے ناسا کی مالی معاونت سے تیار کردہ اس مشن میں متعدد خلا باز مختلف قسم کی سرگرمیاں مکمل کریں گے۔ اس مشن کا مقصد یہ جاننا ہے کہ مستقبل میں مریخ پر جانے والے خلا بازوں کے مشترکہ مسائل کی وجہ سے ان کا مشن کس حد تک متاثر ہو سکتا ہے۔

پانچ امریکی اور یورپی سائنسدانوں کے ہمراہ جرمن سائنسدان کرسٹیانے ہائینِکے بھی اس خیمے میں وقت گزاریں گی۔ اس آرام دہ رہائش گاہ کا قطر گیارہ میٹر ہے۔ ہفتے میں دو مرتبہ یہ سائنسدان اپنا خلائی لباس پہن کر مصنوعی حالات میں اپنے خیمے سے باہر نکل کر تجربات کریں گے۔ باقی تمام وقت یہ اسی خیمے میں ہی گزاریں گے۔ یہ باہر کی دنیا سے صرف ریکارڈ شدہ پیغامات اور ای میل کے ذریعے ہی رابطہ کر سکیں گے۔

ہوائی یونیورسٹی کے سائنسدانوں کے مطابق آتش فشاں ماؤنا لوآ مریخ کے اس خیالی مشن کے لیے ایک بہترین مقام ہے۔ ان دونوں مقامات پر نباتات نہ ہونے کے برابر ہیں۔ جنگلی حیات بھی موجود نہیں اور آپ کہیں پانی بھی نہیں دیکھ سکتے۔

حقیقی مشن کے دوران سرخ سیارے پر پہنچنے کے لیے ہی آٹھ ماہ درکار ہوں گے۔ سائنسدان ایسے کسی مشن سے پہلے بھرپور تیاری کے علاوہ یہ بھی جاننا چاہتے ہیں کہ یہ طویل سفر خلا بازوں پر کس طرح کے ممکنہ اثرات مرتب کر سکتا ہے۔ خلا باز تنہائی کا مقابلہ کیسے کریں گے؟ کوئی باہمی تنازعہ پیدا ہوا تو کیا کریں گے؟ سائنسدانوں کو تحفظات کا سامنا ہے کہ اس طویل مشن سے خلا بازوں میں ڈپریشن اور سستی بھی پیدا ہو سکتے ہیں۔

’مارس 500‘ نامی ایک اسٹڈی ماسکو میں کی گئی تھی۔ 2010ء اور 2011ء کے دوران کیے گئے اس مطالعے میں بھی مریخ کا ایک مصنوعی مشن مکمل کیا گیا تھا۔ 520 دنوں کے اس طویل مشن میں مریخ سے واپسی کی تصوراتی پرواز بھی شامل تھی۔ خلا بازوں کی تنہائی کے حوالے سے یہ طویل ترین مطالعہ تھا۔ نتائج کے مطابق چند خلا باز مصنوعی حالات کی وجہ سے کچھ ڈپریشن کا شکار ہو گئے تھے۔

گلیشیئر پر مصنوعی تجرباتی مریخ مشن Amadee-15 کے دوران نتائج کچھ مختلف رہے۔ اس مشن کے دوران خلا بازوں نے آسٹریا میں ایلپس کے پہاڑی سلسلے میں انتہائی اونچائی پر واقع برفانی تودوں میں وقت گزارا۔ دو ہفتے طویل اس مصنوعی مشن کو موسم سرما میں مکمل کیا گیا تھا۔

خلائی امور کے حوالے سے آگاہی کے منصوبے چلانے والی ’مارس سوسائٹی‘ نامی غیر سرکاری تنظیم نے تجربات کے لیے تین سینٹرز بنائے ہیں۔ ان میں سے ایک صحرائی تحقیقی مرکز امریکا کی ریاست یُوٹاہ کے صحرائی علاقوں میں بھی بنایا گیا ہے۔ ایسا ہی ایک چوتھا سینٹر آسٹریلیا کے شمالی ایڈیلڈ علاقے میں قائم کرنے کا منصوبہ بھی بنایا جا رہا ہے۔

مریخ کو بے جان، سرد اور انتہائی الگ تھلگ سیارہ قرار دیا جاتا ہے۔ یہی خصوصیات انٹارکٹیکا کی بھی ہیں۔ اسی لیے مریخ کے سفر کی تیاریوں کے سلسلے میں اس براعظم پر بھی ایک سینٹر بنایا گیا ہے۔ وہاں زندگی انتہائی مشکل ہے، بالخصوص تاریخ موسم سرما کے دوران۔ سائنسدان وہاں قائم تجربہ گاہ میں خلا بازوں پر تنہائی کے اثرات کے علاوہ نفسیاتی دباؤ کی کیفیت اور نیند کے اوقات میں خلل کا معائنہ بھی کرتے ہیں۔

ٹیکنالوجی کے بغیر کوئی انسان نہ تو مریخ پر رہ سکتا ہے اور نہ ہی پانی میں۔ اسی لیے سائنسدانوں نے سمندر کی گہرائیوں میں بھی تجربہ گاہیں قائم کی ہیں، جہاں نہ روشنی ہے اور نہ ہی ہوا۔ ناسا نے فلوریڈا میں کی لارگو نامی جزیرے سے منسلک پانیوں میں 62 فٹ کی گہرائی میں ایک تجرباتی اسٹیشن قائم کیا ہے۔ وہاں تین ہفتوں کے لیے مختلف افراد کو بھیجا جاتا ہے اور ان پر مصنوعی ماحول کا اثر جانچنے کی کوشش کی جاتی ہے۔

مریخ کے سفر پر تجربات کے علاوہ محققین یہ جاننے کی کوشش میں بھی ہیں کہ اس سرخ سیارے پر قیام کے دوران انسانوں پر کیا اثرات مرتب ہو سکتے ہیں۔ جرمن ایئر سپیس سینٹر میں Envihab نامی ایک ایسی طبی تجربہ گاہ بھی بنائی گئی ہے جہاں یہ معلوم کرنے کی کوشش کی جا رہی ہے کہ کسی دوسرے سیارے کا ماحول انسان پر کیا کیا اثرات مرتب کر سکتا ہے۔

مریخ پر کاشت کاری ممکن نہیں ہے۔ تو سوال یہ پیدا ہوتا ہے کہ اگر انسان اس بے جان سیارے پر طویل قیام کرتے ہیں تو وہ کیا کھائیں گے؟ Envihab میں سرگرم سائنسدان اپنے تجربات میں یہ جاننے کی کوشش میں ہیں کہ وہ ایسا کون سا پودا ہے، جو گلاس کے مرتبان میں نشو ونما پا سکتا ہے، تاکہ مریخ پر قیام کرنے والوں کو تازہ خوراک فراہم ہو سکے۔

ترقی یافتہ ممالک مریخ مشن کو عملی جامہ پہننانے کے حوالے سے ایک دوسرے پر سبقت لے جانے کی خواہش رکھتے ہیں۔ شاید 2030ء یا 2035ء تک مریخ پر جانا ممکن ہو سکتا ہے۔ تاہم فی الحال انسانوں کو اپنی اس خواہش کی تکمیل کے لیے زمین پر ہی تجربات جاری رکھنا ہوں گے۔