امریکی صدر اور 81 سالہ ڈیموکریٹ لیڈر جوبائیڈن  پانچ نومبر کے صدارتی انتخابات سے قبل خود امریکہ کے ڈیموکریٹک حلقوں اور امریکہ سے باہر بھی پائے جانے والے اُن خدشات کو سختی سے رد کر رہے ہیں جن کے مطابق وہ آئندہ صدارتی الیکشن میں ڈونلڈ ٹرمپ کا مقابلہ کرنے کی جسمانی اور ذہنی صلاحیتیں رفتہ رفتہ کھو رہے ہیں۔

جمعہ پانچ جولائی کو امریکی ریاست وسکونسن کے دارالحکومت میڈسن میں اپنے حمائتیوں کے سامنے تقریر کرتے ہوئے  بائیڈن  نے کہا، ''میں الیکشن کی دوڑ میں حصہ لے رہا ہوں اور دوبارہ جیتوں گا۔‘‘ اس کے بعد انہوں نے اے بی سی نیوز کو دیے گئے اپنے ایک انٹرویو میں انہوں نے دلیل دیتے ہوئے کہا تھا کہ وہ ڈونلڈٹرمپ کو دوبارہ وائٹ ہاؤس میں آنے سے روکنے کے لیے بہترین ڈیموکریٹ امیدوار ہیں۔  بائیڈن کا مزید کہنا تھا، پانچ نومبر کے صدارتی انتخابات میں حصہ لینے سے انہیں ''خدا کے سوا کوئی قائل نہیں کر سکتا۔‘‘

بائیڈن کی پارٹی کے اندر مخالفت

جوبائیڈن  کو اس وقت اپنی ہی پارٹی کے اندر بھی مخالفت کا سامنا ہے۔ خاص طور سے 27  جون کو  ڈونلڈ ٹرمپ   کے ساتھ ہونے والے مباحثے کے بعد سے جس میں وہ جسمانی اور ذہنی طور پر کافی کمزور نظر آ رہے تھے اوران کے بیانات  متزلزل اور بحث رکاوٹ سے متاثر ہو رہی تھی۔ ان کے مخالفین میں ڈونرز، قانون ساز، چند ڈیموکریٹ حکام اور حکمت عملی ساز بھی شامل ہیں۔

زبان سے غلط ادائیگی گلے پڑ گئی

ستائیس جون کے مباحثے کے بعد سونے پر سہاگا جمعہ کو ہونے والے واقعات ثابت ہوئے۔ وہ اپنے حامیوں سے خطاب کر رہے تھے اور 2024 ء کے صدارتی الیکشن لڑنے کے اپنے عزم مصمم کا اظہار کر رہے تھے کہ ان کی زبان سے نکلا، ''میں ٹرمپ کو شکست دوں گا، 2020 ء میں دوبارہ ٹرمپ کو ہراؤں گا۔‘‘ گرچہ  بائیڈن  نے اپنے بیان کی اصلاح کر لی اور کہا، ''2024 ء میں میں ٹرمپ کو دوبارہ شکست دوں گا۔‘‘

عوامی رائے اور دیگر اندازوں کے مطابق جو بائیڈن پر ڈونلڈ ٹرمپ کی برتری نظر آ رہی ہے۔ ڈیموکریٹس کے لیے آئندہ صدارتی انتخابات کے بارے میں خدشات بڑھ رہے ہیں۔ ورجینیا سے تعلق رکھنے والے سینیٹرز، بائیڈن کی امیدواری کے بارے میں تبادلہ خیال کے لیے پیر کو ایک میٹننگ کی منصوبہ بندی کر رہے ہیں۔

 نائب صدر کی بائیڈن کے لیے سپورٹ

آج ہفتہ چھ جولائی کو امریکہ کی نائب صدر کملا ہیرس نیو اورلینز میں منعقدہ ایک سالانہ ثقافتی اور موسیقی کے میلے کے دوران خطاب کرنے والی۔ جمعے کو انہوں نے جو بائیڈن کی میڈسن ویکونسن میں منعقد ہونے والی ریلی کے بعد سوشل میڈیا پلیٹ فارم ایکس پر جو بائیڈن کی حمایت میں ایک پیغام پوسٹ کیا جس میں انہوں نے لکھا، ''صدر بائیڈن نے اپنی زندگی کو امریکی عوام کے لیے جنگ کرنے میں وقف کر دیا۔ میں جانتی ہو کہ اب ہم سب ان کے لیے لڑنے کے لیے تیار ہیں۔‘‘

اُدھر  جوبائیڈن کی ہفتے کے روز کسی پبلک ایونٹ میں شرکت یا سیاسی مہم کی کوئی سرگرمی طے نہیں ہے لیکن وہ چرچ جائیں گے۔

ک م/ا ب ا (روئٹرز)