اس بات کے قوی امکانات ہیں کہ ٹویٹر ٹیکنیکل اپ ڈیٹ کے بعد زیادہ آسان ہو جائے گا اور صارفین کو استعمال میں الجھاؤ یا پریشانی کا سامنا نہیں ہو گا۔ ٹیکنیکل اپ ڈیٹ کے بعد صارف کے پروفائل پیج پر زیادہ آپشنز دستیاب ہوں گے۔ اس تکنیکی سہولت کی فراہمی کے ساتھ ساتھ ٹویٹر بہت ساری کمپنیوں کو ترغیب دے رہا ہے کہ وہ اس کے ساتھ بطور اشتہارکنندہ شامل ہو جائیں۔ اب تک بیس کے قریب بڑی کمپنیوں کو ٹویٹر اس نیٹ ورک میں شامل کر چکا ہے۔ ان میں امریکن ایکسپریس، کوکا کولا اور والٹ ڈزنی بھی شامل ہے۔

ٹویٹر کی انتظامیہ نے اسی جمعرات کو اعلان کیا کہ ٹیکنیکل استعدادا میں اضافے کے بعد ٹویٹر سمارٹ فونز اور ٹیبلٹ کمپیوٹرز کے لیے بھی جدت کے ساتھ دستیاب ہو گا۔ اس سلسلہ میں ٹویٹر کی ویب سائٹ مسلسل تبدیلی کے عمل سے گزرتی رہے گی اور اس میں چند ہفتے درکار ہوں گے۔

ٹویٹر اس دور میں مواصلات کا ایک انتہائی برق رفتار ذریعہ بن گیا ہے۔ اس پر کئی موضوعات پر ہمہ وقت بحث کا سلسلہ بھی جاری رہتا ہے۔ اس کے ساتھ اسپورٹس اور انٹرٹینمنٹ کی دنیا سے تازہ ترین خبریں بھی دستیاب ہوتی ہیں۔ اس وقت ٹویٹر کے صارفین کی تعداد ایک سوملین سے تجاوز کر چکی ہے۔ گزشتہ اکتوبر سے اس پر نیا اکاؤنٹ کھولنے والوں کی تعداد میں پچیس فیصد اضافہ ریکارڈ کیا گیا ہے۔

نئی تکنیکی سہولت کے بعد ٹویٹر دنیا کے دور دراز علاقوں میں دستیاب ہو گا۔ اس کے ذریعے پیغام رسانی کا عمل پانچ فیصد زیادہ تیز ہو جائے گا۔ ٹویٹر پر پیش کی جانے والی تبدیلیوں کو ایک صارف آسانی کے ساتھ اپنے استعمال میں لا سکے گا۔ ٹویٹر انتظامیہ کا خیال ہے کہ نئی تبدیلیوں کے ساتھ ٹویٹر کے صارفین کی مختلف معلومات تک رسائی بہت آسان ہو جائے گی۔

رپورٹ: عابد حسین

ادارت: ندیم گِل