ڈبلن میں یورپی یونین کے وزرائے خزانہ کے اجلاس میں یورپی یونین کی چھ بڑی اقتصادیات کے حامل ممالک نے ٹیکس فراڈ کے خلاف متحد ہو کر کوششیں شروع کرنے کا عزم ظاہر کیا ہے۔ اس مناسبت سے ٹیکس چھپانے والوں کی جنت تصور کیے جانے والے ملکوں آسٹریا اور لکسمبرگ پر خاصا دباؤ بڑھ جائے گا۔ ٹیکس چھپانے کے حوالے سے بینکوں میں پائے جانے والے سیکرٹ نظام کو فرانسیسی وزیرخزانہ پیئر ماسکوویسی (Pierre Moscovici) نے بوسیدہ طریقہ قرار دیا ہے۔ ڈبلن میں میڈیا سے بات کرتے ہوئے ماسکوویسی کا کہنا تھا کہ ٹیکس بچانے کے خلاف کارگزار حکمت عملی کو متعارف کروانا ازحد ضروری ہو گیا ہے۔ فرانسیسی وزیرخزانہ نے اس مناسبت سے متحرک اور بروقت کارروائی کے عزم کا بھی اظہار کیا۔

ڈبلن میں چھ بڑی یورپی اقتصادی قوتوں کے اعلان سے آسٹریا پر بھی مزید دباؤ بڑھ گیا ہے اور اب اسے یورپی یونین کے ضوابط کو تسلیم کرنا ہو گا۔ ان ضوابط کے تحت سن 2015 سے یورپی بینکوں کے کھاتہ داروں کی تفصیلات یورپی یونین کی حکومت کو فراہم کرنا ہوں گی۔ لکسمبرگ اس سلسلے ميں اپنی رضامندی کا اظہار کر چکا ہے اور سن 2015 سے وہاں قائم بینک اپنے کھاتہ داروں کی تفصیلات يورپی يونين ميں شامل ديگر ممالک کو فراہم کريں گے۔ دوسری جانب آسٹریا کی وزیر خزانہ ماریا فیکٹر (Maria Fekter) کا کہنا ہے کہ ان کا ملک بینک سیکریسی کی پالیسی کا حامی ہے۔ آج ہفتے کے روز بینک سیکریسی کا موضوع ڈبلن میں جاری وزرائے خزانہ کے اجلاس کا اہم ترین بلکہ انتہائی گرما گرم موضوع قرار دیا گیا ہے۔ ماریا فیکٹر نے بیس ابھرتی اور ترقی یافتہ اقوام کے گروپ جی ٹوئنٹی پر بھی تنقید کی ہے کہ وہ ٹیکس ہیون کے مقامات کے خلاف کوئی بھرپور کارروائی کرنے سے قاصر ہے۔

یورپی یونین کی چھ بڑی اقتصادی قوتوں کے حامل ملکوں برطانيہ، جرمنی، فرانس، اٹلی، اسپين اور پولينڈ کے وزرائے خزانہ نے يورپی يونين کے بقيہ رکن ممالک سميت ديگر ملکوں پر بھی زور ديا کہ وہ ٹيکس چوری کے مسئلے سے سنجيدگی سے نمٹيں۔ اُدھر يورپی کونسل کے صدر ہرمان فان رامپوئے نے کہا ہے کہ ٹيکس چوری کے نتيجے ميں يورپی يونين بلاک کو قريب ايک ٹريلين يورو سالانہ کا نقصان اٹھانا پڑتا ہے اور اس باعث اگلے مہينے برسلز ميں ہونے والے يورپی يونين کے سربراہی اجلاس ميں ٹيکس چوری کا معاملہ زير بحث لایا جائے گا۔

یورو زون کے وزرائے خزانہ نے باضابطہ طور پر قبرص کے لیے بیل آؤٹ پیکج کی شرائط کی منظوری دے دی ہے۔ اس پیکج کی حتمی منظوری کے لیے اب یورو زون کے رکن ممالک کی پارلیمانوں سے منظوری لی جائے گی۔ یورو زون کے وزرائے خزانہ نے آئر لینڈ اور پرتگال میں اصلاحاتی اقتصادی عمل کی پذیرائی کرتے ہوئے قرضے کی واپسی کے لیے مزید سات سال کا عرصہ دے دیا ہے۔ ان دونوں ملکوں کو بھی امدادی پیکج فراہم کیے جا چکے ہیں۔ یورو زون کے وزرائے خزانہ کے گروپ کے سربراہ ولندیزی وزیر خزانہ ژیرون ڈائشل بلوم نے قرض واپس کرنے کی مدت میں توسیع کے حوالے سے کہا کہ یہ ڈبلن اور لزبن پر پیدا شدہ اقتصادی دباؤ کم کرنے کا باعث بنے گا۔

(ah/as(AFP, Reuters