نیوزی لینڈ کے شہر ہیملٹن میں اتوار کو کھیلے گئے دوسرے ٹی ٹوئنٹی میچ میں پاکستان نے ٹاس جیت کر پہلے کھیلنے کا فیصلہ کیا اور میزبان ٹیم کو یہ میچ جیتنے کے لیے 164 رنز کا ہدف دیا۔ کیوی بلے بازوں نے بیسویں اوور میں ایک وکٹ کے نقصان پر مطلوبہ اسکور بنا لیا۔ یوں میزبان ٹیم نو وکٹوں سے یہ میچ جیت گئی۔

تین ٹی ٹوئنٹی میچوں کی سیریز کے سلسلے میں کھیلے گئے اس دوسرے میچ میں بھی کامیابی حاصل کرنے کے بعد نیوزی لینڈ نے اس سیریز میں دو صفر سے فیصلہ کن برتری حاصل کر لی ہے۔ آک لینڈ میں کھیلے گئے پہلے میچ میں نیوزی لینڈ نے پاکستان کو پانچ وکٹوں سے مات دی تھی۔ اس سیریز کے سلسلے میں تیسرا اور آخری میچ بائیس دسمبر کو نیپئر میں کھیلا جائے گا۔

ہیملٹن میچ میں مایہ ناز بلے باز بابر اعظم کی عدم موجودگی میں دیگر پاکستانی بلے باز کوئی خاص کارکردگی کا مظاہرہ نہ کر سکے۔ سابق کپتان محمد حفیظ کے علاوہ کوئی کھلاڑی متاثر کن کھیل کا مظاہرہ نہ کر سکا۔

چالیس سالہ حفیظ نے اس میچ میں ننانوے ناٹ آؤٹ کی متاثر کن اننگز کھیلی، جو ٹی ٹوئنٹی میں ان کا بہترین اسکور بھی بن گیا۔ انہوں نے ستاون گیندوں پر پانچ چھکوں اور دس چوکوں کی مدد سے یہ انفرادی اسکور بنایا۔

نیوزی لینڈ کی طرف سے فاسٹ بولر ٹم ساؤتھی نے بہترین بولنگ کا مظاہرہ کیا۔ انہوں نے چار اوورز میں اکیس رنز دے کر چار کھلاڑیوں کو آؤٹ کیا۔ اس کارکرگی پر انہیں اس میچ کا بہترین کھلاڑی قرار دیا گیا۔

بظاہر ایک آسان ہدف کے تعاقب میں نیوزی لینڈ کے بلے بازوں نے شاندار کھیل کا مظاہرہ کیا۔ اگرچہ اوپنر مارٹن گپٹل گیارہ گیندوں پر اکیس رنز بنا کر فہیم اشرف کی گیند پر آؤٹ ہو گئے لیکن ان کے ساتھی اوپنر ٹم سائفرٹ اور ون ڈاؤن اسٹار کھلاڑی اور کپتان کین ولیمسن نے میچ مکمل کر دیا۔ سائفرٹ نے چوراسی جبکہ ولیمسن نے ستاون رنز کی ناقابل شکست اننگز کھیلی۔

ٹی ٹوئنٹی سیریز میں پاکستان کو ناکامی تو ہو گئی ہے لیکن ناقدین کے مطابق پاکستانی ٹیم کا اصل امتحان ٹیسٹ سیریز میں ہو گا۔ دو ٹیسٹ میچوں کی سیریز کے سلسلے میں پہلا میچ چھبیس دسمبر جبکہ دوسرا دو جنوری سے شروع ہو گا۔

ع ب/ ا ا / خبر رساں ادارے