انگلینڈ کی کرکٹ ٹیم کے کپتان کرس براڈ نے ٹاس جیت کر پاکستانی ٹیم کو بیٹنگ کی دعوت دی۔ پاکستانی ٹیم مقررہ بیس اوورز میں 144 رنز بنا سکی۔ ٹارگٹ کے تعاقب میں انگریز ٹیم صرف 136 رنز بنانے میں کامیاب رہی۔

انگلش ٹیم کی جانب سے کیون پیٹرسن اور وکٹ کیپر کیزویٹر نے 48 رنز کی شاندار شراکت قائم کی اور ایسا دکھائی دیتا تھا کہ اس میچ کو انگلش ٹیم آسانی سے جیت جائے گی لیکن شاہد آفریدی کے اوورز کے ایک بال پر چھکا لگانے کے بعد پیٹر سن نے اگلی گیند پر پھر چھکا لگانے کی کوشش کی مگر وہ باؤنڈری پر اسد شفیق کو کیچ دے بیٹھے۔ پیٹرسن 33 رنز بنا سکے۔ یہی وکٹ میچ کا ٹرننگ پوائنٹ ثابت ہوئی۔

بعد میں روی بوپارا نے بھی اپنی ٹیم کی امیدوں کو بلند کیا لیکن عمر گل کا دوسرا اور آخری بالنگ اسپیل انتہائی کامیاب رہا۔ انہوں نے تین وکٹیں لے کر انگریز ٹیم کو گھٹنے ٹیکنے پر مجبور کردیا۔ چار اوورز میں صرف 18 رنز دے کر تین وکٹیں حاصل کرنے پر عمر گل کو میچ کا بہترین کھلاڑی قرار دیا گیا۔ محمد حفیظ بھی دو کھلاڑی آؤٹ کرنے میں کامیاب رہے۔ جنید خان سب سے مہنگے بالر رہے۔ انہوں نے چار اوورز میں 42 رنز دیے۔

پاکستان کی ٹیم میں نئے کھلاڑی اویس ضیا کی آمد کا بہت شور تھا۔ نوجوان کھلاڑی کو پاکستان میں ینگ بوم بوم کہا جاتا ہے۔ بوم بوم آفریدی کرکٹ کا مشہور استعارہ ہے۔ وہ شاہد خان آفریدی کے انداز میں دھواں دھار بیٹنگ کرنے کی شہرت رکھتے ہیں۔ اویس ضیا نے بارہ گیندوں پر 18 رنز بنائے۔ پاکستانی ٹیم کو 65 کے اسکور پر خاصے بڑے سیٹ بیک کا سامنا کرنا پڑا۔ صرف آٹھ اسکور کے اضافے سے چار کھلاڑیوں کی وکٹیں گر گئیں۔ انگریز اسپنز سوان نے اس دوران تین پاکستانی کھلاڑیوں کو آؤٹ کیا۔

تہتر کے اسکور سے کپتان مصباح الحق اور شعیب ملک نے ٹیم کو اکہتر رنز کا مضبوط اسٹینڈ فراہم کیا۔ یہی شراکت میچ میں پاکستانی ٹیم کی فتح کی ضمانت بنی۔ شعیب ملک اننگز کی آخری گیند پر آؤٹ ہوئے۔ وہ 39 رنز بنانے میں کامیاب رہے۔

پاکستان اور انگلینڈ کی کرکٹ ٹیموں کے درمیان یہ میچ دبئی میں کھیلا گیا۔ اس سیریز کا اگلا میچ 25 فروری کو کھیلا جائے گا۔ متحدہ عرب امارات میں پاکستانی کرکٹ ٹیم انگلش ٹیم کے خلاف ہوم سیریز کھیل رہی ہے۔ ٹیسٹ سیریز میں پاکستانی ٹیم کو فتح حاصل ہوئی تھی جب کہ چار ایک روزہ میچوں کی سیریز کے تمام میچ انگلش ٹیم جیتنے میں کایامب رہی تھی۔

رپورٹ: عابد حسین

ادارت: عدنان اسحاق