بنگلہ دیش کی میزبانی میں کھیلے جانے والے کرکٹ کے ٹی ٹوئنٹی ورلڈ کپ کا پہلا سیمی فائنل جمعرات کے روز ڈھاکہ کے نواحی علاقے میرپور میں واقع کرکٹ اسٹیڈیم میں کھیلا گیا۔ بارش سے متاثرہ میچ میں ویسٹ انڈیز کی ٹیم اپنے اعزاز کا دفاع کرنے سے قاصر رہی۔ اب ٹی ٹوئنٹی ورلڈ کپ کے فائنل میچ میں سری لنکا کی ٹیم آج کھیلے جانے والے دوسرے سیمی فائنل میچ کی فاتح سے نبرد آزما ہو گی۔ دوسرا سیمی فائنل میچ جنوبی افریقہ اور بھارت کی ٹیموں کے درمیان کھیلا جائے گا۔

میچ کے بعد ویسٹ انڈیز کرکٹ ٹیم کے کپتان ڈیرن سیمی کا کہنا تھا کہ آسمانی مدد کسی حد تک سری لنکا کے فائنل میں رسائی حاصل کرنے میں شامل رہی ہے۔ سیمی نے بارش سے میچ کے متاثر ہونے پر خاصی مایوسی کا اظہار کرتے ہوئے کہا کہ اُن کی ٹیم ٹارگٹ کے حصول میں کامیاب ہو سکتی تھی لیکن ڈک ورتھ لُوئیس سسٹم نے اُنہیں ٹورنامنٹ سے باہر کر دیا۔ ژالہ باری کے حوالے سے ویسٹ انڈیز ٹیم کے کپتان کا کہنا تھا کہ یہ اُن کے لیے انوکھا تجربہ تھا اور ایسا لگ رہا تھا کہ لوگ اُن پر پتھر برسا رہے ہیں۔

میرپور کے کرکٹ اسٹیڈیم میں جب بارش اور ژالہ باری شروع ہوئی، اُس وقت چودہویں اوور کا کھیل جاری تھا اور ویسٹ انڈیز کی ٹیم 161 اسکور کے ٹارگٹ میں ابھی نصف ہی میں یعنی 80 کے اسکور تک ہی پہنچ پائی تھی۔ بقیہ اوور میں رن ریٹ تقریباً 20 کے قریب پہنچ گیا تھا۔ مبصرین کے مطابق چار اہم کھلاڑیوں کے آؤٹ ہو جانے کے بعد ٹارگٹ کا حصول مشکل ہو چکا تھا اور فی اوور رن ریٹ بھی ویسٹ انڈیز کی دسترس سے قدرے باہر ہو گیا تھا۔

سری لنکا کی ٹیم کے کپتان لاسیتھ ملنگا نے ٹاس جیت کر پہلے کھیلنے کا فیصلہ کیا۔ لاہیرُو تھریمانے 44 رنز کے ساتھ اپنی ٹیم کی جانب سے ٹاپ اسکور کرنے والے تھے۔ تھریمانے کے علاوہ اینجیلو میتھیوز 40 اور تلکرتنے دلشن 39 رنز بنانے میں کامیاب رہے۔ سری لنکن ٹیم نے میچ شروع ہونے پر پہلے چار اووروں میں 40 اسکور کر لیا تھا۔ سیمی فائنل میں سری لنکا کے تجربہ کار بیٹسمین مہیلا جے وردھنے اور کمار سنگاکارا کوئی بڑا اسکور کرنے میں ناکام رہے۔ بیس اوورز میں سری لنکا کی ٹیم 160 رنز بنانے میں کامیاب رہی۔

ویسٹ انڈیز نے ٹارگٹ کے حصول کا آغاز تو بہت عمدہ کیا۔ پہلے اوور میں اسکور 17 پر پہنچ گیا لیکن بعد میں لاسیتھ ملنگا نے ایک ہی اوور میں دھواں دھار بیٹنگ کرنے والے کرِس گیل اور ڈیوائن اسمتھ کو آؤٹ کر کے میچ کا پانسہ پلٹ دیا۔ اس میچ میں سری لنکا کی ٹی ٹوئنٹی ٹیم کے باقاعدہ کپتان دینیش چَندی مَل کی جگہ لاسیتھ ملنگا کپتانی کے فرائض بھی سرانجام دے رہے تھے۔ میچ میں شاندار کارکردگی پر اینجیلو میتھیوز کو بہترین کھلاڑی قرار دیا گیا۔ وہ 23 گیندوں پر 40 رنز بنانے میں کامیاب ہوئے تھے۔