’دور کے ممالک میں موجود معزز سامعین‘، تین مئی 1953ء کو ڈوئچے ویلے سے پہلی آواز وفاقی صدر تھیوڈور ہوئس کی ان افتتاحی کلمات کے ساتھ نشر کی گئی تھی۔ اس وقت ڈی ڈبلیو کے پروگرام کا مقصد بیرونی ممالک کے صارفین کو جرمنی کے سیاسی، معاشی اور ثقافتی حالات سے آگاہی فراہم کرنا تھا۔

مائیکرو فون پر امہاری سروس کی نیوز کاسٹر لیڈٹ آڈیبے ہیں۔ سابق وفاقی دارالحکومت بون میں واقع ڈی ڈبلیو ریڈیو اسٹیشن سے دنیا کی 30 مختلف زبانوں میں پروگرام نشر کیے جاتے ہیں۔ امہاری زبان میں پیش کیے جانے والے پروگرام ایتھوپیا میں بہت مقبول ہیں۔

ڈوئچے ویلے میں آج کے اہم ترین موضوعات کیا ہیں؟ آج دنیا کے کس خطے سے لائیو کوریج کی جائے گی؟ آج ویب سائٹ کی ٹاپ اسٹوری کون سی ہونی چاہیے؟ ڈی ڈبلیو کے ملٹی میڈیا ڈیسک پر ہر وقت پرائم ٹائم کی صورتحال ہوتی ہے۔ جس وقت بون میں سورج ڈوبتا ہے تو سڈنی میں دن کا آغاز ہو رہا ہوتا ہے۔

ڈی ڈبلیو کے چینی زبان کے شعبے کے سربراہ ماتھیاس فان ہائن مصنفLiao Yiwu کا انٹرویو کر رہے ہیں۔ ڈی ڈبلیو ان لوگوں کی آواز بنتا ہے، جن کی آواز ان کے آبائی ملکوں میں دبا دی جاتی ہے۔

ایک رپورٹ میں صرف اہم اور موضوع سے متعلق بیانات ہی استعمال کیے جاتے ہیں۔ شعبہء اردو کی ایڈیٹر کشور مصطفیٰ ڈیجیٹل سافٹ ویئر کے ذریعے ایک طویل انٹرویو سے غیر اہم نکات نکال رہی ہیں۔

پیا کاسترو، کارلوس ڈیگاڈو اور ان کی ٹیم کو وقفے کا وقت کم ہی ملتا ہے۔ ہسپانوی زبان کے ٹی وی پروگرام لاطینی امریکا میں روزانہ 20 گھنٹے نشر کیے جاتے ہیں۔ مجموعی طور پر دنیا بھر میں ڈی ڈبلیو کے ٹی وی پروگرام جرمن، انگریزی، ہسپانوی اور عربی زبان میں چھ مختلف چینلز سے نشر کیے جاتے ہیں۔

ڈی ڈبلیو کے پروگرام ’الشباب ٹاک‘ کو عرب دنیا میں شوق سے دیکھا جاتا ہے۔ جعفر عبدالکریم پروگرام میں وہ تمام اہم موضوعات شامل کرتے ہیں، جو نوجوانوں کی دلچسپی کا باعث ہوتے ہیں۔

ترک زبان کے شعبے کی Özlem Coskun یورپ سے متعلق رپورٹوں اور تجزیوں پر مشتمل میگزین ’ڈی ڈبلیو اور یورپ‘ پیش کر رہی ہیں۔ سن 2012ء سے یہ پروگرام ترکی کے سرکاری ٹیلی وژن TRT Türk پر پیش کیا جاتا ہے۔ اسی طرح کے ٹی وی میگزین پولینڈ، رومانیہ، البانیہ، کروشیا، بوسنیا، مقدونیہ اور بلغاریہ میں بھی پیش کیے جاتے ہیں۔

نشریات آپ تک پہنچانے کے لیے اسٹوڈیو میں نیوز کاسٹر کے ساتھ ساتھ پوری تکنیکی ٹیم موجود ہوتی ہے۔ تکنیکی ٹیم ٹرانسمشن کی منصوبہ بندی کے ساتھ ساتھ میزبان کو اس بارے میں بھی آگاہ رکھتی ہے کہ کب بولنا ہے اور کب نئی رپورٹ نشر کی جائے گی۔

ڈی ڈبلیو اکیڈمی میں سالانہ 20 نوجوانوں کو صحافتی ٹریننگ دی جاتی ہے، جیسے کہ پاکستان سے آنے والے امتیاز احمد کو۔ صحافتی انٹرن شپ کے لیے دس نوجوانوں کا انتخاب جرمنی اور دس کا دنیا بھر کے مختلف ممالک سے کیا جاتا ہے۔ اس کے علاوہ ڈی ڈبلیو اکیڈمی مقامی یونیورسٹیوں کے تعاون سے انٹرنیشنل میڈیا اسٹڈیز میں ماسٹرز بھی کرواتی ہے۔

ڈی ڈبلیو اکیڈمی میں دنیا بھر کے ذرائع ابلاغ سے منسلک افراد تربیت حاصل کر سکتے ہیں۔ اس تصویر میں کرغزستان کے دارالحکومت بشکیک میں ڈی ڈبلیو اکیڈمی کے سمر کورس میں شامل ایک خاتون صحافی کو دیکھا جا سکتا ہے۔

نکولائی آندرشتشینکو کو روسی شہر سینٹ پیٹرزبرگ میں سرعام ایک سڑک پر تشدد کا نشانہ بنایا گیا۔ انیس اپریل 2017ء کو وہ زخموں کی تاب نہ لاتے ہوئے چل بسے۔ آندرشتشینکو انسانی حقوق کی خلاف ورزیوں اور جرائم کے خلاف لکھتے تھے۔ انہوں نے اپنی ایک رپورٹ میں لکھا تھا کہ صدر ولادیمیر پوٹن جرائم پیشہ گروہوں اور کے جی بی کے جانشین روسی خفیہ ادارے کے ساتھ تعلقات کی وجہ سے اقتدار میں آئے تھے۔

میروسلاوا بریچ کو تئیس مارچ 2017ء کو ان کے گھر کے سامنے سر میں آٹھ گولیاں مار کر قتل کیا گیا تھا۔ میکسیکو کی یہ صحافی منشیات فروش گروہوں کے راز فاش کیا کرتی تھی۔ وہ مارچ میں میکسیکو میں قتل ہونے والی تیسری صحافی تھیں۔

شیفا گہ ردی پچیس فرروی 2017ء کو شمالی عراق میں ایک بارودی سرنگ کے دھماکے میں ہلاک ہوئیں۔ ایران میں پیدا ہونے والی شیفا اربیل میں قائم کرد خبر رساں ادارے ’روودوا‘ کے لیے کام کرتی تھیں۔ انہیں عراق میں ملکی دستوں اور ’اسلامک اسٹیٹ‘ کے مابین جاری جنگ کے بارے میں رپورٹنگ کے دوران اپنی جان سے ہاتھ دھونا پڑے۔

امریکی شہریت کے حامل اویجیت رائے اپنے بلاگ ’مکتو مونا‘ یعنی’کھلا ذہن‘ کی وجہ سے خاصی شہرت رکھتے تھے۔ وہ خاص طور پر سائنسی حقائق اور مذہبی انتہا پسندی کے بارے میں لکھتے تھے۔ وہ فروری 2015ء میں ایک کتاب میلے میں شرکت کے لیے ڈھاکہ آئے تھے۔ مذہبی انتہا پسندوں نے تیز دھار چاپٹروں سے ان پر حملہ کرتے ہوئے انہیں قتل کر دیا تھا۔

24 سالہ پاکستانی صحافی زینت شہزادی کو انیس اگست 2015ء کو مسلح افراد نے اس وقت اغوا کر لیا تھا جب وہ ایک رکشے میں سوار ہو کر اپنے دفتر جا رہی تھیں۔ وہ لاپتہ ہونے والے ایک شخص کے بارے میں حقائق جاننے کی کوشش کر رہی تھیں۔ ہیومن رائٹس کمیشن آف پاکستان کا دعویٰ ہے کہ زینت پاکستانی افواج کی طرف سے تعاقب کا شکار بنیں۔

عبدالرحمانوف 2008 ء سے منشیات رکھنے کے الزام میں جیل کی سلاخوں کے پیچھے ہیں۔ صحافیوں کی تنظیم رپورٹرز ودآؤٹ بارڈرز کے مطابق حکومتی اہلکاروں نے عبدالرحمانوف کو خاموش کرانے کے لیے ان پر یہ جھوٹا الزام عائد کیا۔

ترک نژاد جرمن صحافی ڈینز یوچیل فروری 2017ء سے ترکی میں زیر حراست ہیں۔ جرمن جریدے دی ویلٹ کے اس صحافی پر دہشت گردی کا پرچار کرنے اور عوام میں نفرت پھیلانے کے الزامات عائد کیے گئے ہیں۔ انقرہ حکومت ابھی تک ان کے خلاف کوئی ثبوت پیش نہیں کر سکی۔

گاؤ یُو ماضی میں ڈوئچے ویلے کے لیے کام کر چکی ہیں۔ وہ 2014ء سے سرکاری راز افشا کرنے کے جرم میں قید میں ہیں۔ انہیں سات سال کی سزا سنائی گئی تھی۔ بین الاقوامی دباؤ کے بعد گاؤ کو جیل سے رہا کر کے ان کے گھر پر نظر بند کر دیا گیا۔

حسینوف ایک آن لائن سماجی اور سیاسی میگزین کے مدیر ہیں۔ وہ انسانی حقوق کی خلاف ورزیوں اور بدعنوانیوں سے پردہ اٹھاتے ہیں۔ اپنے ملک کے اس سب سے معروف ویڈیو بلاگر کو بہتان تراشی کے الزام میں مارچ 2017ء میں دو سال قید کی سزا سنائی گئی تھی

ٹیموسلاف کیزاروفسکی کو جنوب مشرقی یورپ کا واحد سیاسی قیدی کہا جاتا ہے۔ کیزاروفسکی ایک صحافی کے قتل کے واقعے میں اصل حقائق تک پہنچنے کی کوششوں میں تھے اور اس دوران انہوں نے پولیس کی خفیہ دستاویزات کا بھی حوالہ دیا تھا۔ اکتوبر 2013ء کی ایک متنازعہ عدالتی کارروائی کے اختتام پر انہیں ساڑھے چار سال قید کی سزا سنائی گئی، جسے بعد میں دو سالہ نظر بندی میں تبدیل کر دیا گیا۔

صدر بشار الاسد کے خلاف شروع ہونے والی بغاوت سے اب تک متعدد صحافی اور بلاگرز یا تو مار دیے گئے ہیں یا تعاقب کا نشانہ بنے ہوئے ہیں۔ رپورٹرز ود آؤٹ بارڈرز کئی سالوں سے شام کو پریس کی آزادی کا دشمن ملک کہتی آئی ہے۔ شام میں حکومت ہی نہیں بلکہ اسلامک اسٹیٹ کے جنگجو اور النصرہ فرنٹ، جو اسد کے خلاف لڑ رہے ہیں، بھی شامی حکومتی میڈیا کے صحافیوں پر حملے کرتے رہتے ہیں۔

رپورٹرز ود آؤٹ بارڈرز کے مطابق چین صحافیوں اور بلاگرز کے لیے سب سے بڑی جیل کے مانند ہے۔ آمرانہ حکومت رائے کی آزادی کی سخت دشمن ہے۔ وہاں غیر ملکی صحافیوں پر دباؤ بھی روز بروز بڑھ رہا ہے۔ ملک کے کچھ حصے ان کے لیے بند ہیں۔ صحافیوں کی سرگرمیوں پر کڑی نظر رکھی جاتی ہے اور انٹرویو دینے والوں اور معاونین کو اکثر و بیشتر حراست میں لے لیا جاتا ہے۔

ویت نام میں آزاد میڈیا کا کوئی تصور نہیں پایا جاتا۔ واحد حکمران جماعت کمیونسٹ پارٹی صحافیوں کو بتاتی ہے کہ انہیں کیا شائع کرنا چاہیے۔ ناشر، مدیر اور صحافیوں کا پارٹی ممبر ہونا لازمی ہے۔ بلا گرز حکام کی توجہ کا مرکز ہوتے ہیں۔ کمیونسٹ پارٹی کی اجارہ داری کے خلاف لکھنے والے بلاگرز کو سنگین نتائج کا سامنا ہوتا ہے۔

ترکمانستان کے صدر سرکاری میڈیا پر قابض ہیں۔ استثنا محض اخبار’ریسگال‘ کو حاصل ہے، تب بھی اس کا ہر ایڈیشن صدر کے حکم سے شائع ہوتا ہے۔ اس ملک میں میڈیا پر اجارہ داری کے خلاف ایک نیا قانون بھی جاری ہو گیا ہے، جس کے بعد سے ترکمانستان کے عوام کی غیر ملکی خبر ایجنسیوں تک رسائی ممکن ہو گئی ہے۔ انٹرنیٹ حکومت کے کنٹرول میں ہے اور زیادہ تر ویب سائٹس بلاک کر دی گئی ہیں۔

’پریس کی صحافت‘ کی اصطلاح سے شمالی کوریا کا کوئی واستہ نہیں۔ اس ریاست میں آزاد رپورٹننگ صحافیوں کے لیے ناممکن ہے۔ ساری دنیا سے کٹے ہوئے آمر حکمران کم یونگ اُن اپنے میڈیا پر کڑی نظر رکھتے ہیں۔ یہاں محض حکومتی نشریاتی ادارہ ریڈیو اور ٹیلی وژن چینلز چلا رہا ہے، جس نے اپنی آزاد رائے کا اظہار کیا وہ اپنی فیملی سمیت سنگین مشکلات سے دو چار ہوا۔

رپورٹرز ود آؤٹ بارڈرز نے افرقیہ کے آمر حکمرانی والے ملک اریتریا کو اپنی اس فہرست میں سب سے آخری نمبر پر رکھا ہے۔ اس تنظیم کے مطابق دنیا کے کسی دوسرے ملک میں صحافت کے ساتھ اتنا بُرا سلوک نہیں ہو رہا ہے، جتنا اس افریقی ریاست میں۔ بمشکل ہی اس بارے میں مقامی میڈیا کی کوئی رپورٹ سامنے آتی ہے۔ بہت سے صحافیوں کو ملک چھوڑنے پر مجبور کر دیا گیا ہے۔