زیادہ تر پاکستانی طلبا کو اپنی تعلیم مکمل کرنے کے لیے گزشتہ برس کے آخری مہینوں میں واپس چین پہنچ جانا چاہیے تھا لیکن ایسا نہیں ہو سکا۔ تاخیر کی وجہ سے ان میں شدید بے چینی پائی جاتی ہے۔ ان طلبا نے پاکستانی اور چینی حکام سے درخواست کی ہے کہ وہ ان کی واپسی کے نظام الاوقات کو حتمی شکل دیں لیکن ابھی تک دونوں جانب سے کوئی پیش رفت دیکھی نہیں گئی۔

چین میں کنڈرگارٹن کا کیا معمول ہوتا ہے؟

وظیفے بھی روک دیے گئے

زیادہ تر پاکستانی طلبا چینی حکومت کے وظیفوں پر تعلیم مکمل کرنے چین گئے ہوئے ہیں۔ اب ان کے وظیفے بھی بیجنگ حکومت نے گزشتہ ایک برس سے روک رکھے ہیں۔ ایک پاکستانی طالب علم کو چین کی جانب سے ستر ہزار سے نوے ہزار پاکستانی روپے (تین سو بہتر سے چار سو ترپن امریکی ڈالر) بطور وظیفہ دیا جاتا ہے۔

پاکستانی شہر لاہور کی ایک طالبہ حنا فاطمہ نے ڈی ڈبلیو کو بتایا کہ اس نے اپنی پاکستان میں ملازمت چھوڑ کر بیجنگ ٹیکنالوجی اور بزنس یونیورسٹی میں اسکالرشپ پر فوڈ سائنسز میں پی ایچ ڈی شروع کر رکھی ہے اور اب وہ پاکستان میں پھنس کر رہ گئی ہے۔ فاطمہ کے مطابق ایک طرف وہ کوئی نوکری نہیں حاصل کر پا رہی تو دوسری جانب چینی حکومت نے وظیفہ بھی روک دیا ہے، اس طرح اس کو شدید مالی مشکلات کا سامنا ہے۔

چین میں چار پاکستانی طلبہ کورونا وائرس سے متاثر

تعلیم نامکمل رہنے پر اضطراب

چین میں تعلیم حاصل کرنے والے پاکستانی طلبا میں تعلیمی سلسلہ ادھورا رہنے پر شدید اضطرابی کیفیت پیدا ہو چکی ہے۔ ایسے کئی طالب علموں نے مختلف سطح پر اپنی گہری تشویش کا اظہار بھی کیا ہے۔ ندا نواز نے ڈی ڈبلیو کو بتایا کہ وہ گزشتہ برس اپنی ڈگری کا فرسٹ سمیسٹر مکمل کر کے پاکستانی لوٹی تھیں اور اس کے بعد ابھی تک واپس چین جانے کی کوئی امید دکھائی نہیں دے رہی۔ ندا نواز کے مطابق اب ان کو پاکستانی یونیورسٹیوں میں بھی داخلہ نہیں مل رہا اور انہیں تعلیم نامکمل رہنے کی پریشانی لاحق ہے۔

ایک پاکستانی سرکاری ملازم نے نام مخفی رکھنے کی شرط پر بتایا کہ وہ دفتر سے طویل رخصت حاصل کر کے انجینیئرنگ کی تعلیم کے لیے چین گئے اور اب وہ اپنا پراجیکٹ مکمل کرنے کی راہ دیکھ رہے ہیں اور اگر سفری پابندیاں یونہی رہی تو وہ مقررہ وقت میں اسے مکمل نہیں کر سکیں گے۔

اندازوں کے مطابق سفری پابندیاں رواں برس ستمبر سے قبل اٹھائے جانے کا کوئی امکان نہیں ہے۔

حکام کا ردعمل بہت سست

ایسے طلبا پاکستانی اور چینی حکام کے رویے پر بھی شاکی دکھائی دیتے ہیں۔ ایک طالب علم احمد علی کے مطابق اس گھمبیر مسئلے پر بیجنگ میں پاکستانی سفارت خانے نے ایک کھلی میٹنگ کا اہتمام کیا تو ہے لیکن یہ بھی زیادہ مفید ثابت نہیں ہوئی۔ ایک طالب علم کا کہنا ہے کہ انہوں نے اپنی چینی یونیورسٹی اور پاکستانی حکام کو خط لکھے ہیں لیکن جواب میں صرف اتنا کہا گیا کہ اس معاملے پر غور کیا جا رہا ہے۔

چین: لاکھوں اعلی تعلیم یافتہ نوجوان مناسب روزگار کی تلاش میں

سن 2018 کے اعداد و شمار کے مطابق چین میں ایک سو چھیانوے ملکوں کے چار لاکھ بانوے ہزار سے زائد طلبا تعلیم حاصل کر رہے ہیں۔ ان میں سے بارہ فیصد کو چین کی جانب سے اسکالر شپ دیا جاتا ہے اور بقیہ خود سے تعلیم کے اخراجات برداشت کرتے ہیں۔

ایس خان (ع ح / ا ا)