اسلام آباد میں قائم تھنک ٹینک، پاکستان انسٹی ٹیوٹ فار کانفلیکٹ اینڈ سکیورٹی اسٹڈیز نے اتوار کو جاری ایک رپورٹ میں کہا کہ نومبر میں پاکستان بھر میں دہشت گردانہ حملوں اور جھڑپوں میں 68 سکیورٹی اہلکاروں سمیت کم از کم 245 افراد ہلاک ہوئے۔ ہلاک ہونے والوں میں 127 عسکریت پسند اور 50 عام شہری شامل ہیں۔ اس دوران 104 سکیورٹی اہلکاروں اور 119 شہریوں سمیت کم از کم 257 افراد زخمی بھی ہوئے۔

پاکستان میں عسکریت پسندوں کے خلاف فوجی کارروائیاں، ایک جائزہ

اگست کے بعد، نومبر کو رواں سال کا دوسرا مہلک ترین مہینہ قرار دیا گیا ہے۔ اگست میں 254 اموات ہوئیں، جن میں 92 شہری، 108 عسکریت پسند اور 54 سکیورٹی اہلکار شامل تھے۔ سکیورٹی اہلکاروں کی ہلاکتوں کے لحاظ سے، نومبر 2024 کا سب سے مہلک مہینہ تھا، جس نے اکتوبر کو پیچھے چھوڑ دیا، جس میں سکیورٹی فورسز کے 62 اہلکار ہلاک ہوئے تھے۔

مزید برآں، جھڑپوں اور بم دھماکوں میں 257 افراد زخمی ہوئے، جن میں 104 سکیورٹی اہلکار اور 119 عام شہری شامل ہیں۔ یہ عرصہ حالیہ برسوں میں ملک بھر میں دہشت گردانہ حملوں میں تیزی سے اضافے کی عکاسی کرتا ہے۔

حکومت بلوچستان میں دہشت گردی پر قابو پانے میں ناکام کیوں؟

نومبر میں دہشت گردی کی سرگرمیوں میں اضافہ دیکھا گیا، اکتوبر میں 68 کے مقابلے 71 حملے ریکارڈ کیے گئے۔

دہشت گردی سے ہلاکتیں 1000 سے تجاوز

خیبر پختونخواہ سب سے زیادہ متاثرہ خطہ تھا، جہاں 50 دہشت گرد حملے ہوئے جن میں 71 افراد ہلاک اور 85 زخمی ہوئے۔

رپورٹ میں کہا گیا ہے کہ کرم ضلع نے حالیہ تاریخ کی بدترین قبائلی جھڑپوں میں سے ایک کا مشاہدہ کیا، جس میں 120 سے زائد افراد ہلاک ہوئے۔

پاکستان: تشدد کے تین مختلف واقعات میں فوجیوں سمیت متعدد افراد ہلاک

رپورٹ کے مطابق، بلوچستان میں 20 دہشت گرد حملوں کی اطلاع ملی، جس میں 60 افراد ہلاک ہوئے، جن میں 26 سکیورٹی اہلکار، 25 عام شہری اور 9 عسکریت پسند شامل تھے۔ نومبر میں ہونے والی 127 عسکریت پسندوں کی ہلاکتیں فروری 2017 کے بعد سب سے زیادہ ماہانہ تعداد ہے، جب 148 عسکریت پسند مارے گئے تھے۔

پاکستانی سکیورٹی فورسز کو بھی بڑے نقصانات کا سامنا کرنا پڑا، جس میں 68 اہلکار ہلاک ہوئے، جو جنوری 2023 کے بعد سب سے زیادہ تعداد ہے، جب سکیورٹی فورس کے 114 ارکان ہلاک ہوئے تھے۔

پاکستان: آپریشن کے دوران تین فوجی اور آٹھ عسکریت پسند ہلاک

اعداد و شمار سے یہ بھی انکشاف ہوا ہے کہ 2024 میں دہشت گردی سے متعلقہ ہلاکتیں 1,000 سے تجاوز کر گئی ہیں، جو کہ پچھلے 11 مہینوں میں 1,082 تک پہنچ گئی ہیں۔ اس سال اب تک 856 دہشت گرد حملے رپورٹ ہوئے ہیں، جبکہ 2023 میں 645 حملے ہوئے تھے۔ حملوں کی تعداد میں اضافہ جو سکیورٹی کی بگڑتی ہوئی صورتحال کی عکاسی کرتا ہے۔

پچھلے دو دن میں انیس عسکریت پسند ہلاک

ملک کے تین صوبوں، خیبرپختونخوا، بلوچستان اور پنجاب میں ہفتہ اور اتوار کو الگ الگ مسلح تصادم میں کم از کم انیس عسکریت پسند ہلاک اور دو فوجی جوانوں سمیت چار قانون نافذ کرنے والے اہلکار اپنی جان سے گئے۔

اتوار کو فوج نے کہا کہ خیبر پختونخواہ میں گزشتہ 48 گھنٹوں کے دوران الگ الگ آپریشنز میں عسکریت پسندوں کا مقابلہ کرتے ہوئے ایک افسر سمیت دو سکیورٹی اہلکار ہلاک ہو گئے۔ اس دوران آٹھ عسکریت پسند مارے گئے۔

دریں اثنا، ضلع لکی مروت کے قصبے درہ پیزو میں ایک پولیس اسٹیشن پر حملہ آور مسلح حملہ آوروں کے ساتھ فائرنگ کے تبادلے میں ایک پولیس اہلکار ہلاک ہو گیا۔

اس کے علاوہ، میانوالی پولیس نے پنجاب کے چپری تھانے پر حملہ پسپا کیا اور فائرنگ کے تبادلے میں چار عسکریت پسندوں کو ہلاک کر دیا۔

وزیر اعظم شہباز شریف اور صدر آصف زرداری نے سکیورٹی اہلکاروں کی ہلاکت پر تعزیت کا اظہار کیا ہے۔

ج ا ⁄ ص ز ( خبر رساں ادارے)