اٹھارہ ماہ قبل ایپل پہلی ایسی امریکی کمپنی بنی، جس کے شیئرز کی مالیت دو ٹریلین ڈالرز ہوئی تھی۔ انتہائی مختصر وقت میں ہی اس کے شئیرز کی مالیت اب تین ٹریلین ڈالرز ہو گئی ہے۔ کووڈ انیس کی عالمی وبا میں اس کمپنی کی مصنوعات بالخصوص آئی فونز کی فروخت میں بہت زیادہ اضافہ ہوا، وجہ، لوگ اپنے پیاروں کے ساتھ ورچوئل رابطے میں رہنا چاہتے تھے۔

امریکی کمپنی ایپل کی چھلانگ کا کوئی مقابلہ نہیں کر سکا، حتیٰ کہ اس کی ہم وطن کمپنیاں مائیکروسافٹ، ایلفابیٹ (گوگل) اور ایمازون تو اس دوڑ میں کہیں دکھائی ہی نہیں دے رہیں۔ یہ الگ بات ہے کہ ان کمپنیوں نے بھی کووڈ انیس کی عالمی وبا میں خوب کمائی کی۔ ان کمپنیوں کے مالی اثاثوں کی قدر بالتریب ڈھائی ٹریلین، دو ٹریلین اور ایک اعشاریہ سات پانچ ٹریلین ڈالرز بنتی ہے۔

ایپل کمپنی کے مالی اثاثوں میں اس قدر اضافے کی وجہ سے اس کمپنی کے سی ای او ٹِم کُک بھی ارب پتی افراد کی فہرست میں شامل ہو گئے ہیں۔ انہوں نے سن 2011 میں یہ عہدہ سنبھالا تھا، تب اس کمپنی کے اثاثوں کی مالیت 350 بلین تھی۔ تب کئی حلقوں کو شک تھا کہ آیا وہ اس کمپنی کو سنبھال بھی سکیں گے؟ کک نے اپنی زیادہ تر دولت چیرٹی میں دینے کا عہد کیا ہے۔

ایپل کمپنی کا پہلا دفتر اس کے بانی اسٹیو جابز کے گھر کا ایک گیراج تھا۔ اسٹیو جابز نے اپنے ہائی سکول کے زمانے کے دوست اسٹیو ووزنیئک کے ساتھ مل کر سن 1974ء میں اس کمپنی کی بنیاد رکھی تھی۔ پرسنل کمپیوٹر کے حوالے سے یہ پہلی کامیاب کمپنی ثابت ہوئی۔ چار سال بعد یعنی 1980ء میں ایپل نے عوام کے لیے اپنی مصنوعات مارکیٹ میں متعارف کرائیں۔

میکنٹوش (میک) ایپل کی تہلکہ خیز پراڈکٹ ثابت ہوئی، اَسّی کی دہائی میں گرافیکل یوزر انٹرفیس کے ساتھ یہ کمپیوٹر ٹیکنالوجی کی دنیا میں ایک بڑی پیشرفت قرار دی گئی۔ تاہم محدود میموری اور ایک کھلونے کی طرح نظر آنے والا یہ کمپیوٹر مارکیٹ میں زیادہ جگہ نہ بنا سکا۔ اس ناکامی پر 1985ء میں جابز کو اس کمپنی سے الگ ہونا پڑ گیا۔

سن انیس سو ستانوے میں اپیل کمپنی دیوالیہ ہونے کے دہانے پر پہنچ چکی تھی، تب ایک مشکل وقت میں اسٹیو جابز ایک مرتبہ پھر اس کمپنی سے وابستہ ہوئے۔ اس کے بعد ایپل کمپنی نے ایک نیا جنم لیا۔ جابز کی تخلیقات آئی پوڈ اور پھر آئی فون نے انسان کے دیکھنے اور سوچنے کا طریقہ ہی بدل دیا۔

ایپل کمپنی کی سب سے اہم اور کامیاب ترین پراڈکٹ آئی فون ثابت ہوئی۔ ایسا پہلا فون، جس میں میوزک بھی بجایا جا سکتا تھا۔ یہ بات شاید اب آپ کو عجیب لگے کیونکہ اب تو میوزک کے بغیر کسی سمارٹ فون کا تصور بھی ممکن نہیں۔

نہ صرف میوزک بلکہ یہ ایک ایسا فون تھا، جس میں ویب براؤزنگ کی سہولت کے علاوہ ای میل کی ایپس بھی متعارف کرائی گئیں۔ ایک چھوٹی سی ڈیوائس پر سبھی کچھ دستیاب، یہ تھا پہلا آئی فون۔ سن 2007ء میں اس ٹیکنالوجی نے نوکیا، موٹرولا اور بلیک بیری جیسی بڑی موبائل کمپنیوں کو برباد کر دیا۔

ایپل کمپنی کمیونیکشن کی دنیا میں مزید اختراعات کا منصوبہ رکھتی ہے۔ نئی اور جدید ٹیکنالوجی کو مزید بہتر اور تیز بنانے کی خاطر ایپل بڑے پیمانے پر سرمایہ کاری کر رہی ہے جبکہ اپنی سروسز کو مزید بہتر اور کارآمد بنانے کی کوششوں میں بھی جتی ہوئی ہے۔