پاکستان امریکہ کے ساتھ تجارتی مذاکرات میں پیش رفت کا خواہاں
22 فروری 2023![Flagge Pakistan und USA](https://static.dw.com/image/42038552_800.webp)
پاکستان کے وفاقی وزیر تجارت سید نوید قمر نے بتایا کہ پاکستان امریکہ تجارتی اور سرمایہ کاری فریم ورک معاہدے (ٹیفا) کے تحت امریکی تجارتی نمائندہ کیتھرین تائی اور دیگر اعلیٰ امریکی حکام کے ساتھ پاکستانی عہدیداروں کی جمعرات کے روز اسلام آباد میں وزارتی میٹنگ ہو گی۔
سید نوید قمر نے کہا ہے کہ پاکستان، امریکہ کے ساتھ زراعت اور انفارمیشن ٹیکنالوجی کے شعبوں میں پیش رفت کا خواہاں ہے۔
پاکستان کے وفاقی وزیر تجارت نے کہا کہ اس ملاقات سے دونوں ملکوں کے درمیان تعلقات مضبوط ہوں گے، جو حالیہ برسوں میں سیاسی تناو کے باعث کشیدہ تھے۔ اس ملاقات سے اشیاء اور خدمات میں دو طرفہ تجارت کو فروغ دینے میں مدد مل سکتی ہے۔
پاکستان اور امریکہ کے مابین دفاعی مذاکرات کے دوسرے دور کا آغاز
پاکستانی سفارت خانے کے مطابق دونوں ملکوں کے درمیان باہمی تجارت 12ارب ڈالر کی ہے۔
سید نوید قمر نے کہا، "یہ ضروری ہے کہ ہم بات شروع کریں۔ یہ میٹنگ ہر سال منعقد ہونی تھی، لیکن کسی نہ کسی وجہ سے، وہ اتنے لمبے عرصے سے پس پشت پڑے ہوئے ہیں۔ اب جب کہ ہم آغاز کر رہے ہیں تو بہت سے ایسے شعبے ہیں، جن میں ہمیں کچھ پیش رفت کی توقع ہے۔"
امریکی تجارتی نمائندہ کیتھرین تائی کے دفتر سے اس میٹنگ کے حوالے سے کوئی تبصرہ فوری طورپر نہیں مل سکا۔
سرد مہری کے بعد تعلقات بہتری کی جانب
دونوں ممالک کے درمیان تعلقات میں سرد مہری کی بڑی وجہ امریکہ کے پاکستان کی جانب سے افغان طالبان کی مبینہ حمایت کے بارے میں خدشات ہیں، تاہم پاکستان نے ہمیشہ اس حمایت سے انکار کیا ہے۔
پاکستان میں انسداد دہشت گردی میں مدد کی امریکی پیشکش
نوید قمر نے کہا کہ پاکستان امریکہ کو آم کی برآمدات میں اضافے اور انفارمیشن ٹیکنالوجی اور کمپیوٹر پروگرامنگ سروسز میں تجارت کو یقینی بنانے کا خواہاں ہے جبکہ امریکہ بیف اور سویابین کی برآمدات کو فروغ دینا چاہتا تھا۔
انہوں نے کہا، "جب ہم تجارت کی بات کرتے ہیں، تو ہم پورے منظر نامے کی بات کرتے ہیں، لیکن ہم ان چیزوں پر توجہ مرکوز کر رہے ہیں کیونکہ یہ فوری طور پر ہونا شروع ہو جائیں گی۔"
ان کا کہنا تھا کہ پاکستان کو یہ بھی امید ہے کہ آئی ٹی اور فارماسیوٹیکل پر خصوصی توجہ سے ایک طویل عرصے بعد مزید امریکی سرمایہ کاری لائی جا سکے گی۔ جب کہ اس عرصے میں چین غالب سرمایہ کار بن گیا ہے۔
پاکستان امریکہ کی مخالفت کی استطاعت نہیں رکھتا، مبصرین
انہوں نے کہا، "ہم نہیں چاہتے کہ ایک ملک کو کھلا میدان مل جائے۔ ہم چاہتے ہیں کہ یہ ایک کھلا مسابقتی ماحول ہو۔"
نوید قمر نے مزید کہا کہ پاکستان کووڈ انیس کی وبا سے قبل چین پر انحصار کرنے والی امریکی سپلائی چینز کو متنوع بنانے میں مدد کرنے کے لیے اچھی پوزیشن میں تھا، لیکن اب دوسرے علاقائی سپلائرز کی طرف منتقل ہونا شروع ہو گیا ہے۔ یہ وسطی ایشیا کے لیے داخلی دروازے کے طور پر کام کرسکتا ہے۔
ج ا/ ص ز (روئٹرز)