کراچی ایئر پورٹ پر طالبان کی طرف سے کیے جانے والے دہشت گردانہ حملے کے دو روز بعد پاکستانی فوج کی یہ کارروائی قبائلی علاقے خیبر ایجنسی کی وادی تیراہ میں کی گئی۔ کراچی ایئر پورٹ پر کئی گھنٹوں تک جاری رہنے والے حملے میں 12 دہشت گردوں سمیت 35 سے زائد افراد ہلاک ہوئے تھے۔

پاکستانی فوج کی جانب سے جاری کیے جانے والے ایک بیان کے مطابق فضائی کارروائی کے دوران ’’دہشت گردوں کے نو ٹھکانوں کو تباہ کر دیا گیا۔‘‘ خبر رساں ادارے اے ایف پی کے مطابق آج منگل کے روز ہونے والی ہلاکتوں کی تصدیق آزاد ذرائع سے نہیں ہو پائی ہے۔

کراچی ایئر پورٹ پر اتوار اور پیر کی درمیانی شب ہونے والے حملے کے بعد پاکستانی فوج پر دباؤ میں اضافہ ہو گیا تھا کہ وہ دہشت گردوں کے خلاف کارروائی کرے۔ اس حملے کی ذمہ داری طالبان نے قبول کرتے ہوئے اسے اپنے سابق رہنما حکیم اللہ محسود کی ہلاکت کا بدلہ قرار دیا تھا۔ کالعدم تحریک طالبان پاکستان کے ترجمان شاہد اللہ شاہد نے یہ دھمکی بھی دی تھی کہ اس طرح کے مزید حملے بھی کیے جائیں گے۔

تازہ فضائی حملے پاکستانی حکومت اور تحریک طالبان پاکستان کے درمیان مذاکراتی عمل ختم ہونے کے بعد سے طالبان کے خلاف قبائلی علاقوں میں وقفےوقفے سےجاری کارروائیوں کا حصہ ہیں۔ اس سے قبل آخری کارروائی مئی کے آخر میں شمالی وزیرستان میں کی گئی تھی جس کے نتیجے میں کم از کم 75 افراد ہلاک ہوئے تھے۔

افغان سرحد کے قریب پاکستان کے شمال مغربی قبائلی علاقوں کی سات ایجنسیز میں سے ایک خیبر ایجنسی میں قبل ازیں رواں برس اپریل میں پاکستانی فوج کی طرف سے فضائی کارروائی کی گئی تھی۔ تب اس کارروائی میں 37 افراد ہلاک ہوئے تھے۔

خبر رساں ادارے اے ایف پی کے مطابق خیبر ایجنسی کو عسکریت پسندوں کے مختلف گروپوں کا گڑھ تصور کیا جاتا ہے۔ ان میں سے اہم ترین لشکر اسلام ہے جس کی سربراہی منگل باغ کے پاس ہے۔ اس کے علاوہ وسطی ایشیائی ریاستوں سے تعلق رکھنے والے عسکریت پسند بھی اس علاقے میں موجود ہیں۔

پاکستان کے ایک ریٹائرڈ فوجی جنرل اور دفاعی امور کے تجزیہ کار طلعت مسعود کے مطابق پاکستانی حکومت پر دباؤ میں اضافہ ہوتا جا رہا ہے کہ وہ ملک کے قبائلی علاقوں میں موجود طالبان شدت پسندوں کے ٹھکانوں کے علاوہ کراچی سمیت ملک کے دیگر شہروں میں موجود دہشت گردوں کے ’سلیپرز سیلز‘ یا ان کی خفیہ موجودگی کے خلاف کارروائی کرے۔ مسعود کے مطابق شدت پسندوں کے خلاف یہ کارروائی انتہائی اہم اور وقت کی ضرورت ہے۔