چند سال پہلے وادیء سوات میں انتہا پسندوں کے خلاف آپریشن کے دوران بھی لاکھوں افراد کو اپنا گھر بار چھوڑنا پڑا تھا۔ اب شمالی وزیرستان جنگ کا میدان بنا ہوا ہے اور لوگ اپنا تھوڑا بہت مال اسباب سمیٹ کر اپنی جانیں بچا کر ایک انجانے مستقبل کی طرف نکل کھڑے ہوئے ہیں۔ زیادہ تر لوگ ملک کے دیگر صوبوں کا رخ کرنے کی بجائے خیبر پختونخوا ہی کے مختلف حصوں کی طرف نقل مکانی کر رہے ہیں۔

شمالی وزیرستان سے بنّوں اور ملک کے دیگر وسطی علاقوں کی طرف آنے والی شاہراہوں پر آج کل اس طرح کے مناظر نظر آ رہے ہیں۔ اپنا گھر بار چھوڑنے پر مجبور ہو جانے والے لاکھوں افراد اپنے بال بچوں اور مویشیوں کو لے کر محفوظ پناہ گاہوں کی تلاش میں ہیں۔ سخت گرمی میں یہ سفر بھی اُن کے لیے ایک بڑی مصیبت سے کم نہیں ہے جبکہ یہ بے یقینی اس کے علاوہ ہے کہ آگے جا کر ٹھکانہ کہاں ملے گا۔

شمالی وزیرستان کے باسی نقل و حمل کا ہر دستیاب ذریعہ استعمال کرتے ہوئے اپنے آبائی علاقوں سے نکل رہے ہیں۔ ویگنوں، بسوں یا ٹرکوں پر جسے کہیں تھوڑی سی بھی جگہ ملتی ہے، وہ بیٹھ کر ایک اَن دیکھے مستقبل کی طرف رواں دواں ہو جاتا ہے۔

کل تک اپنے گھر کی چار دیواری میں رہنے والی یہ خواتین آج کھلے آسمان کے نیچے ہیں۔ جہاں کئی ایک شہری خیبر پختونخوا میں اپنے اپنے رشتے داروں کے ہاں قیام کر سکیں گے، وہاں زیادہ تر آئی ڈی پیز کو حکومت کی جانب سے خصوصی طور پر تیار کیے کیمپوں میں رہنا پڑے گا۔

شمالی وزیرستان سے نقل مکانی کرنے والوں میں تقریباً ڈیڑھ لاکھ بچے اور ایک لاکھ دَس ہزار خواتین بھی شامل ہیں۔ امدادی کارکنوں کا کہنا ہے کہ شدید گرمی میں بچوں کو مدد کی سب سے زیادہ ضرورت ہوتی ہے۔ گرمیوں میں شمالی علاقوں میں بھی درجہء حرارت اڑتالیس ڈگری سینٹی گریڈ تک پہنچ جاتا ہے۔

اگرچہ آئی ڈی پیز کے رجسٹریشن کے لیے حکومت نے خاطرخواہ انتظامات کر رکھے ہیں، لیکن متاثرین کی کثیر تعداد کی وجہ سے ان کو کئی کئی روز تک سخت گرمی میں طویل قطاروں میں کھڑے ہو کر اپنی اپنی باری کا انتظار کرنا پڑتا ہے۔ رجسٹریشن نہ ہونے کی صورت میں ان کو راشن اور دیگر سہولتیں نہیں مل سکتیں۔

آٹھ سالہ زینب کا کہنا ہے کہ اس نے اپنے گھر والوں کے ساتھ پیدل میرعلی سے بنوں تک کا سفر کیا، راستے میں بھوک اور پیاس کی وجہ سے ان سے چلا نہیں جا رہا تھا۔ ہر وقت اس کے والد اس کو یہ کہہ کر دلاسہ دیتے تھے کہ بس ہم بنوں پہنچنے ہی والے ہیں، لیکن سفر ختم ہونے کا نام ہی نہیں لے رہا تھا۔ اس کا چھوٹا بھائی راستے میں بہت بیمار ہو گیا تھا۔

کیمپوں میں شدید گرمی کے موسم میں مختلف طرح کی وبائیں پھوٹ پڑنے کا خطرہ پیدا ہو گیا ہے۔ ان کیمپوں میں جگہ جگہ ڈاکٹر موجود ہیں، جو بیمار آئی ڈی پیز کا معائنہ کرتے ہیں اور اُنہیں مناسب ادویات دیتے ہیں۔

محکمہ صحت اور دوسرے فلاحی اداروں نے جگہ جگہ پر کیمپ لگائے ہیں، جن میں متاثرین کو فوری اور مفت علاج کی سہولت دی جا رہی ہے۔ ڈاکٹروں کے مطابق ذیادہ تر لوگ تھکاوٹ اور گرمی کی وجہ سے پیٹ کی بیماریوں میں مبتلا ہیں، جبکہ بچوں کو اس صدمے کی کیفیت سے نکالنے کے لیے بہت زیادہ پیار اور توجہ کی ضرورت ہے۔

حاجی گل کا کہنا ہے کہ اس نے اپنے خاندان کے ساتھ میلوں کا سفر پیدل کیا، راستے میں اس کا چار سالہ بیمار پوتا موت کی آغوش میں چلا گیا اورایک جوان بیٹا کرفیو کی وجہ سے میران شاہ میں پھنس چکا ہے۔ اس سے کوئی رابطہ نہیں ہو رہا۔ وہ کہتے ہیں کہ اب وہ تب ہی اپنے گاؤں جائے گا جب فوجی ان کے علاقے کو صاف کر دیں گے کیونکہ ان میں اس طرح باربار گھر چھوڑنے کی ہمت نہیں ہے۔

ڈوئچے ویلے کے نمائندے دانش بابر کے ساتھ گفتگو کرتے ہوئے ستر سالہ جمال وزیر کا کہنا تھا:’’کسی محفوظ جگہ تک پہنچنے کے لیے مَیں نے پورا ایک دن اور پوری ایک رات پیدل سفر کیا ہے۔ میں بوڑھا اور بیمار ہوں۔ جیسے ہی حالات بہتر ہوں گے، مَیں واپس وزیرستان جانا چاہوں گا۔‘‘

متاثرین کی امداد کے لیے سرکاری اور غیر سرکاری ادارے مدد میں مصروف ہیں۔ بنوں میں متاثرین میں راشن تقسیم کرنے کے لیے تین مراکز بنائے گئے ہیں، جہاں ہر متاثرہ خاندان کو 92 سے93 کلو تک اَشیائے ضرورت دی جاتی ہیں، جن میں آٹا، دالیں، چینی، گھی اور دوسری اشیائے خورد و نوش بھی شامل ہیں۔

آئی ڈی پیز کیمپ اور راشن پوائنٹس کے انتظامات کی ذمہ داری پاک فوج کو سونپی گئی ہے۔ فوج کے جوان متاثرین کی مدد کرنے کے ساتھ ساتھ سخت سکیورٹی کے انتظامات بھی سرانجام دے رہے ہیں۔

وقت کے ساتھ ساتھ زیادہ سے زیادہ سرکاری اور غیر سرکاری ادارے شمالی وزیرستان کے بے گھر ہو جانے والے افراد کی امداد کے لیے آگے آ رہے ہیں۔ راشن اور کھانے پینے کی دیگر اَشیاء کے حصول کے لیے متاثرین کو کئی کئی گھنٹے تک طویل قطاروں میں کھڑا ہونا پڑتا ہے۔ متاثرین کی تعداد اتنی زیادہ ہے کہ تمام تر امدادی سرگرمیاں ناکافی محسوس ہو رہی ہیں اور لوگوں کی شکایات بڑھتی جا رہی ہیں۔