پاکستان میں موسلا دھار بارشوں کی وجہ سے آنے والے سیلابوں کی وجہ سے اس ہفتے کم از کم 30 افراد ہلاک ہوگئے۔ حکام کے مطابق جمعہ کو پنجاب کے دارالحکومت  لاہور میں بارشوں نے چار  دہائیوں سے زائد کا ریکارڈ توڑ دیا۔ جنوبی ایشیا کے خطے میں گزشتہ ہفتے مون سون کے موسم کی آمد کی وجہ  سے مختلف ممالک میں سیلابوں اور لینڈ سلائیڈنگ نے حادثات کو جنم دیا۔

 پڑوسی ملک بھارت کی ریاست اتر پردیش میں لینڈ سلایڈنگ کی وجہ  سے کم از کم 195 افراد ہلاک اور تقریباً 200 لاپتہ ہو گئے۔ شدید بارشوں نے پاکستان کے شمالی علاقوں کو بھی اپنی لپیٹ میں لے رکھا ہے، جس سے سیلاب، عمارتیں گرنے اور آسمانی بجلی گرنے کے خطرات بڑھ گئے ہیں۔

صوبہ پنجاب میں حکام کا کہنا ہے کہ لاہور میں بارش کا 44 سال پرانا ریکارڈ ایک بار پھر ٹوٹ گیا۔ صوبے میں بارشوں اور سیلابی صورت حال کی وجہ سے  چھ ہلاکتوں کی بھی اطلاع ہے جبکہ صوبائی حکام نے اس ہفتے جنوبی پنجاب میں سیلاب سے بھی خبردار کیا ہے۔ صوبہ خیبرپختونخوا میں  ڈیزاسٹر مینجمنٹ ایجنسی کے ترجمان انور شہزاد نے روئٹرز کو بتایا کہ  بارشوں اور سیلاب سے گزشتہ تین دنوں میں مرنے والے دو درجن افراد میں بارہ بچے بھی شامل ہیں۔

 اقوام متحدہ، جیسے عالمی ادارے پاکستان کو موسموں کی شدت اور موسمیاتی تبدیلیوں کے حوالے سے سب سے زیادہ خطرات کے شکار ممالک میں سے ایک کے طور پر دیکھتے ہیں۔ پاکستان میں 2022 میں ملک کے مختلف حصوں میں آنے والے سیلاب نے تباہی مچا دی تھی اور اس وقت 1,700 سے زائد افراد ہلاک  جبکہ لاکھوں کی تعداد میں بے گھر بھی ہوئے۔

ش ر⁄ ع ب (روئٹرز)