امریکی دفتر خارجہ نے اعلان کیا ہے کہ پاکستانی طالبان کے سربراہ مولوی فضل اللہ کی خبر دینے والے کو پانچ ملین  ڈالر جبکہ طالبان کی حامی تنظیم ’جماعت الاحرار‘ کے سربراہ عبدل ولی اور لشکر اسلامی کے سربراہ منگل باغ  کے بارے میں اطلاع دینے والے کو تین تین ملین ڈالر دیے جائیں گے۔

خبر رساں ادارے روئٹرز کے مطابق پاکستان کی سیکرٹری خارجہ تہمینہ جنجوعہ کے دورے کے دوران انسداد دہشت گردی کے لیے تعاون کو بڑھانے اور امریکی صدر ڈونلڈ ٹرمپ کی افغانستان کے لیے نئی پالیسی پر تبادلہ خیال کیا جائے گا۔ امریکا نے جنوری میں پاکستان کو دی جانے والی دو بلین کی عسکری امداد یہ کہتے ہوئے معطّل کر دی تھی کہ اسلام آباد افغان طالبان اور حقانی نیٹ ورک کے خلاف خاطر خواہ کارروائیاں نہیں کر رہا۔

 

ملاّ فضل اللہ، پاکستانی طالبان کا نیا قائد

تحریک طالِبان پاکستان میں پھُوٹ

ملالہ پر حملہ کرنے والا گروپ گرفتار

جماعت الاحرار پر عام شہریوں، اقلیتوں، سلامتی کے اداروں کے اہلکاروں اور مارچ 2016ء میں پشاور میں امریکی سفارت خانے کے ملازمین کو ہلاک کرنے کے الزامات ہیں۔ دفتر خارجہ نے کہا ہے کہ لشکر اسلامی منشیات کے کاروبار، اغوا برائے تاوان اور پاکستان و افغانستان کے مابین تجارت کرنے والوں سے ٹیکس کے نام پر بھتہ وصولی میں ملوث ہے۔

امریکی دفتر خارجہ نے اس بیان میں یہ بھی کہا ہے کہ اس انعامی رقم کا اعلان اس لیے کیا جا رہا ہے کہ یہ تینوں دہشت گرد رہنما پاکستان کے ساتھ ساتھ امریکی سربراہی میں قائم اس اتحاد کے لیے بھی خطرہ ہیں، جو افغانستان میں تعینات ہے۔ اس بیان کے مطابق تحریک طالبان پاکستان امریکا میں بھی حملوں کی دھمکی دے چکا ہے۔ مئی 2010ء میں نیو یارک میں ناکام دہشت گردانہ حملے کی ذمہ داری اسی تنظیم نے قبول کی تھی۔