جنوبی پاکستانی صوبے سندھ کے ایک اہم مقام روہڑی کے قریب تیز رفتار ٹرین مسافروں سے بھری ایک بس سے ٹکرا گئی۔ حادثہ ایک ریلوے لائن کراسنگ پر ہوا، جس پر رکاوٹی گیٹ بھی نہیں تھا جبکہ کوئی حفاظتی گارڈ بھی متعین نہیں کیا گیا تھا۔ ٹرین کراچی سے راولپنڈی جا رہی تھی۔ حادثہ اتنا شدید تھا کہ مسافر بس تین ٹکڑوں میں تقسیم ہو گئی۔

سندھ کے شہر سکھر کے ایک ہسپتال کے ڈاکٹر بشیر احمد سولنگی نے نیوز ایجنسی ڈی پی اے کو بتایا کہ حادثے میں زخمی ہونے والے چھبیس افراد اُن کے پاس زیر علاج ہیں۔ انہوں نے یہ بھی بتایا کہ بظاہر حادثہ ڈرائیور کی غفلت کا نتیجہ ہے اور وہ اس کوشش میں تھا کہ ٹرین گزرنے سے پہلے ہی ریلوے لائن عبور کر لے لیکن اُسے تیز رفتار ریل گاڑی کی اسپیڈ کا اندازہ نہیں ہو سکا۔

پاکستان کے وزیر ریلوے شیخ رشید احمد نے حادثے پر تشیوش ظاہر کرتے ہوئے ہونے والی اموات پر گہرے دکھ کا اظہار کیا ہے۔ انہوں نے ٹرین اور بس کے حادثے کی فوری تفتیش کا حکم بھی جاری کیا ہے۔ انہوں نے یہ بھی کہا کہ انکوائری کے بعد ہی طے ہو سکے گا کہ غلطی کس کی ہے۔

ٹرین حادثے کے بعد سندھ اور بقیہ ملک کے درمیان ٹرین سروس معطل ہو کر رہ گئی تھی۔ امدادی کارروائیوں کی تکمیل کے بعد بس کا ملبہ ہٹايا گيا اور پھر ٹرین سروس کی بحالی ممکن ہوئی۔ ریل گاڑیوں کی آمد و رفت کے بحال ہونے کی ریلوے حکام نے تصدیق کر دی ہے۔

پاکستان میں ناقص ریل ٹریک بھی حادثات کا سبب بنتے ہیں۔ سن 2019 میں ہونے والے مختلف ریلوے حادثات میں ایک سو سے زائد انسانی جانیں ضائع ہوئی تھیں۔ ایسا بھی خیال کیا جاتا ہے کہ ریل گاڑیوں میں مناسب حفاظتی انتظامات کا بھی فقدان ہے۔ چند مہینے قبل ایک ریل گاڑی میں چولہا پھٹنے سے لگنے والی آگ میں پچاس سے زائد انسان جل مرے تھے۔

ع ح ⁄ ع س (ڈی پی اے)