پاکستان میں گزشتہ کئی برسوں سے توانائی کا بحران مسلسل سنگین ہوتا جا رہا ہے۔ اعداد و شمار کے مطابق اس وقت پاکستان میں بجلی کا شارٹ فال تقریباﹰ 6000 میگا واٹ تک ہے، جس پر آئندہ تین سالوں تک قابوپانا ممکن نہیں۔ یہی وجہ ہے کہ ملک بھر میں عوام کو بدترین لوڈشیڈنگ کا سامنا ہے۔

واپڈا کو گزشتہ پانچ سالوں میں تقریباً 90 بلین روپے کا خسارہ ملک میں بجلی کی چوری کی وجہ سے ہوا ہے۔ پشاور الیکٹرک سپلائی کمپنی ((PESCO بجلی کی چوری کو روکنے کے لیے ہر ممکن کوشش کر رہی ہے لیکن کوئی خاطرخواہ کامیابی حاصل نہیں ہوئی۔ یہی وجہ ہے کہ اب مختلف بینرز اور اشتہارات میں اللہ اور رسول کا واسطہ دے کر عوام کو بجلی چوری سے روکنے کی کوشش کی جا رہی ہے۔

گزشتہ سالوں میں شدید لوڈشیڈنگ کی وجہ سے پورے ملک میں جنریٹرزکے استعمال میں کافی اضافہ دیکھنے کو ملا تھا لیکن پٹرولیم مصنوعات کی قیمتوں میں مسلسل اضافے کی وجہ سے جنریٹرز کے استعمال میں بھی بہت حد تک کمی واقع ہوئی ہے۔

سال 2012ء تک پورے ملک میں یو پی ایس( UPS) اور انورٹرز کو کافی پذیرائی ملی تھی۔ دو گھنٹے مسلسل چارج ہونے کے بعد یہ بجلی کی عدم موجودگی میں تین سے چار گھنٹوں تک بجلی مہیاکر سکتے ہیں۔ لیکن شدید لوڈشیڈنگ میں پوری بجلی میسر نہ ہونے کی وجہ سے UPS بھی اب ناکام ہو گئے ہیں۔

CEMCO نامی ایک پرائیویٹ ادارے کے سربراہ محمد حیان شمسی توانائی کے بارے میں آگاہی مہم کے دوران اعلیٰ قسم کے سولر پینل اور اس سے چلنے والے آلات کے بارے میں بتا رہے ہیں۔ ان کے مطابق اس وقت پوری دنیا میں جرمنی کے سولر پینل سب سے زیادہ پائیدار ہیں۔

پشاور کی مختلف شاہراہوں پر شمسی توانائی سے چلنے والی سٹریٹ لائٹس نصب کی گئی ہیں، جو دن کو سورج کی روشنی سے چارج ہوکر پوری رات اجالا کرتی ہیں۔

پاکستان میں اوسطاﹰ تقریبا 16 گھنٹے سورج کی روشنی موجود رہتی ہے۔ ماہرین کے مطابق سورج کی روشنی کو اگر صحیح طریقے سے استعمال میں لایا جائے تو پاکستان شمسی توانائی سے سات لاکھ میگا واٹ تک بجلی حاصل کر سکتا ہے۔

سولر سسٹم کے استعمال میں اضافے کے پیش نظر پشاور کی مختلف مارکیٹوں خصوصاﹰ کارخانوں اور باڑہ مارکیٹ میں شمسی توانائی سے چلنے والے آلات کی کئی دکانیں نظر آتی ہیں۔ ان دکانوں میں 6 سے 12 واٹ پر چلنے والے پنکھے، بلب، روم کولر اور استریاں بھی دستیاب ہیں۔

خیبر ایجنسی کی تحصیل جمرود میں واقع سرکاری ریڈیو اسٹیشن ’خیبر ریڈیو‘ کو بھی شمسی توانائی سے چلایا جا رہا تھا لیکن یہ ان دنوں کچھ انتظامی معاملات کی وجہ سے بند ہے۔

لوڈشیڈنگ کے دوران تحصیل جمرود کے پریس کلب میں صحافی شمسی توانائی کے ذریعے یہاں موجود کمپیوٹرز وغیرہ کو چلاتے ہیں اور علاقے کی خبریں اخبارات اور دوسرے اداروں تک بھیجتے ہیں۔

پاکستان کے قبائلی علاقوں میں کبھی کبھی بجلی کئی کئی دنوں تک نہیں ہوتی، اس لیے ان علاقوں میں سولر سسٹم سے بجلی حاصل کرنے کا رجحان دوسرے علاقوں کے نسبت زیادہ ہے۔ خیبر ایجنسی میں تقریباﹰ ہر خاص و عام کے گھر کی چھت پر سولر پینل نظر آتے ہیں۔

پاکستان میں شمسی توانائی سے وابستہ ماہرین کا خیال ہے کہ جرمنی دنیا میں شمسی توانائی سے بجلی حاصل کرنے والا سب سے بڑاملک ہے، اس لیے وہاں سے درآمد کردہ سولر پینل بہترین کوالٹی کے ہوتے ہیں اور یہی وجہ ہے کہ وہ سب کو جرمنی کے سولر پینلز کا مشورہ دیتے ہیں۔

پشاور چھاوٴنی (مال روڈ) کا رات کا منظر، جہاں شمسی توانائی سے چلنے والی اسٹریٹ لائٹس روشن ہیں۔