پاکستان کو چین کی جانب سے سینوفارم ویکسین کی پانچ لاکھ خوراکیں دی گئی ہیں، جو فوج کے ایک خصوصی طیارے کے ذریعے پیر کو پاکستان پہنچیں۔ ویکسین پاکستان پہنچتے ہی حکومت نے پہلے مرحلے میں ڈاکٹروں اور طبی عملے کو ویکسین دینے کا کام شروع کر دیا ہے۔

 چند روز قبل پاکستانی ٹی وی چینلز پر عوام کے سوالات کے جوابات دیتے ہوئے  وزیراعظم عمران خان نے کہا تھا کہ ویکسینیشن کئی مرحلوں پر مبنی ہو گی اور اس میں سب سے پہلے کورونا وائرس کی وبا سے جنگ میں مصروف طبی عملے کو یہ ویکسین دی جائی گی۔

پاکستانی ٹوئٹر صارف صوفیہ سیفی کہتی ہیں کہ ٹی وی پر نظر آنے والے مناظر امید افزا ہیں۔ جہاں فرنٹ لائن ورکرز کو سینوفارم ویکسین دینے کا سلسلہ شروع ہو گیا۔

سندھ حکومت کی جانب سے بھی ایک ٹویٹ میں کورونا وائرس کے خلاف ویکسینیشن مہم کے باقاعدہ آغاز کا اعلان کیا گیا۔

تاہم پاکستان میں بعض حلقے اس بات پر اعتراض بھی کر رہے ہیں کہ پاکستان نے ویکسین امداد میں ملنے کا انتظار کیوں کیا اور اس ویکسین کی بروقت خریداری کے لیے کوشش کیوں نہ کی گئی۔