دو سو چودہ کے معمولی اسکور کے تعاقب میں وہاب ریاض نے اپنے پہلے اوور میں وارنر اور دوسرے میں کلارک کو آؤٹ کر کے سنسنی پھیلا دی۔ آسٹریلوی ٹیم سخت دباؤ میں لگ رہی تھی لیکن اس موقع پر راحت علی نے شین واٹسن کا فائن لیگ پرآسان کیچ گرا کر پاکستان کی میچ میں واپسی کا راستہ بند کر دیا۔

چار رنز پر نئی زندگی ملنے کے بعد شین واٹسن نے ہی چونتیسویں اوور میں جب سہیل خان کی گیند پر میچ وننگ شاٹ کھیلا تو وہ سات چوکوں اور ایک چھکے کی مدد سے چونسٹھ رنز بنا چکے تھے۔ انسٹھ پر تین وکٹیں گرنے کے بعد واٹسن اور اسٹیو سمتھ نے اسکور میں قیمتی نواسی رنز کا اضافہ کیا۔ سمتھ نے پینسٹھ رنز کی ذمہ دارانہ اور فیصلہ کن اننگز کھیلی۔

وہاب ریاض نے تیز باؤلنگ کا شاندار مظاہرہ کر کے آسٹریلوی بیٹسمینوں کے ہوش اڑا دیے تھے مگر رہی سہی کسر ان کے دوسرے اسپیل میں سہیل خان نے میکسویل کا کیچ گرا کر پوری کر دی۔ وہاب نے چون رنز دے کر دو وکٹیں حاصل کیں۔

آسٹریلوی کپتان مائیکل کلارک نے بھی میچ کے بعد وہاب ریاض کی باؤلنگ کو سراہا اور کہا کہ انہوں نے اتنی تیز بالنگ اپنے کیریئر میں کم ہی کھیلی ہے۔ میچ کے بعد نامہ نگاروں سے گفتگو کرتے ہوئے کلارک کا کہنا تھا، ’’وہاب جیسی باؤلنگ مچل جانسن نے ایشیز میں کی تھی۔ لیکن یہ ہماری خوش نصیبی تھی کہ فیلڈرز نے ان کا ساتھ نہ دیا۔‘‘ کلارک نے اعتراف کیا کہ اگر واٹسن کا کیچ پکڑ لیا جاتا تو آسٹریلیا کو بہت مشکل ہوتی۔

اس سے پہلے جمعہ بیس مارچ کی سہ پہر پینتیس ہزار تماشائیوں کے سامنے پاکستانی کپتان مصباح الحق نے ٹاس جیت کر بیٹنگ کا فیصلہ کیا۔ ایک موقع پاکستان کا اسکور دو وکٹ پر ستانوے تھا لیکن مصباح الحق جب تیسرا چھکا لگانے کی کوشش میں میکسویل کی گیند پر کیچ آؤٹ ہوئے تو پاکستان کی بیٹنگ مسمار ہو گئی۔ مصباح اپنے کیریئر کے آخری میچ میں چونتیس رنز بنا سکے۔ پاکستان کے ٹاپ اسکورر حارث سہیل جانسن کی گیند پر وکٹ کیپر کو کیچ دے بیٹھے۔ دیگر کھلاڑیوں میں عمر اکمل بیس، صہب مقصود انتیس اور شاہد آفریدی تئیس رنز بنا سکے۔ یہ تمام کھلاڑی غیر ذمہ دارانہ انداز میں کھیل کر آؤٹ ہوتے رہے۔

آسٹریلیا کی طرف سے فاسٹ میڈیم باؤلر جَوش ہیزل وُڈ نے چار وکٹیں لیں اور انہیں میچ کا بہترین کھلاڑی قرار دیا گیا۔ میکسویل اور مچل اسٹارک نے دو دو کھلاڑی آؤٹ کیے۔

پاکستانی کپتان مصباح الحق نے میچ میں ناکامی کا ذمہ دار بیٹنگ کو ٹھہراتے ہوئے کہا کہ جب کسی ٹیم کے پہلے چھ بیٹسمین رنز نہ بنائیں تو باؤلرز کے لیے ہدف کا دفاع کرنا مشکل ہو جاتا ہے۔ ’’ہم نے ہر میچ میں درمیان کے اوورز میں وکٹیں گنوائیں اور ہائی اسکورنگ ٹورنامنٹ میں صرف ایک سنچری بنا سکے، جو ناکامی کا سبب رہا۔‘‘ کپتان مصباح کا کہنا تھا کہ ایک موقع پر پاکستانی ٹیم میچ میں واپس آگئی تھی لیکن پھر خراب فیلڈنگ نے ساری محنت پر پانی پھیر دیا۔

مصباح نے اپنی ریٹائرمنٹ کے فیصلے پر نظرثانی کرنے سے انکار کرتے ہوئے کہا کہ ان کا کیریئر اطمینان بخش رہا ہے۔ وہ اس عرصے میں اتار چڑھاؤسے لطف اندوز ہوتے رہے۔ ’’اب نوجوان کھلاڑیوں کی باری ہے۔ اب انہیں پوری ذمہ داری لینا ہوگی۔‘‘