خبر رساں ادارے اے ایف پی کے بقول افغان فوج کے سربراہ جنرل شیر محمد کریمی کا کہنا ہے کہ افغانستان اور پاکستان کے مابین اعتماد سازی کا فقدان ہے، جس کی وجہ سے مسائل جنم لے رہے ہیں۔ اس فرانسیسی نیوز ایجنسی نے بتایا ہے کہ جنرل کریمی نے برطانوی نشریاتی ادارے کو انٹرویو دیتے ہوئے مزید کہا ہے کہ پاکستان نے اپنے ہاں مدرسوں کو بند کرنے کے بعد طالبان کو افغانستان روانہ کر دیا۔ ان کا کہنا تھا کہ ایسے مدرسے اسلامی انتہا پسندی کو فروغ دینے کے لیے ابتدائی درسگاہ ثابت ہوتے ہیں۔

جب افغان نیشنل آرمی کے چیف آف اسٹاف جنرل کریمی سے پوچھا گیا کہ اگر پاکستان چاہے تو کیا وہ کابل حکومت کے خلاف ہونے والے طالبان کے حملے رکوا سکتا ہے تو انہوں نے کہا، ’’جی ہاں، یہ کچھ ہفتوں میں ہو سکتا ہے۔‘‘ ان کا کہنا تھا کہ طالبان پاکستان کے کنٹرول میں ہیں اور اسلام آباد چاہے تو امن عمل کو آگے بڑھانے کے لیے بہت کچھ کر سکتا ہے۔ یہ امر اہم ہے کہ حکومت پاکستان بارہا ایسے الزامات مسترد کرتی آئی ہے کہ اس کے طالبان کے ساتھ روابط ہیں۔ جنرل کریمی کے بقول اگر پاکستان اور امریکا چاہتے ہیں تو افغانستان میں سکیورٹی کی ابتر صورتحال میں بہتری لائی جا سکتی ہے۔

ڈرون حملوں میں پاکستان بھی شریک ہے

جنرل کریمی نے پاکستان کی صورتحال پر تبصرہ کرتے ہوئے کہا، ’’اب پاکستان بھی داخلی سطح پر دہشت گردی سے ویسے ہی تنگ ہے جیسا کہ افغانستان۔ ہم دونوں مل کر اس برائی کے خلاف مؤثر طریقے سے جنگ کر سکتے ہیں لیکن اس کے لیے ضروری ہے کہ جو ہم کر رہے ہیں، وہ خلوص دل کے ساتھ کریں۔‘‘ اے ایف پی نے بتایا ہے کہ جنرل کریمی کا یہ انٹرویو ہفتے کے دن کابل میں ریکارڈ کیا گیا تھا۔

جنرل کریمی نے کہا ہے کہ ڈرون حملے امریکا نے اپنے طور پر شروع نہیں کیے تھے بلکہ اسلام آباد نے واشنگٹن کو ایسے جنگجوؤں کی فہرست دی تھی، جن کو وہ نشانہ بنانا چاہتا تھا۔ انہوں نے مزید کہا کہ یہ ڈرون حملے صرف پاکستانی طالبان پر کیے جاتے ہیں، ’’ حقانی گروپ یا افغان طالبان کے خلاف ایسے حملے کبھی بھی نہیں کیے گئے ہیں۔‘‘

افغان فوج کے سربراہ نے مزید کہا، ‘‘ افغانستان میں قیام اسی وقت قائم ہو سکتا ہے جب ہم اور پاکستان دونوں امن کے خواہاں ہوں گے۔‘‘ ان کا کہنا تھا کہ خطے میں قیام امن پاکستان، امریکا اور افغانستان کی مشترکہ کوششوں سے ہی ممکن ہو سکتا ہ پاکستان کے مقامی حکام کا کہنا ہے کہ بدھ کی صبح پاکستانی قبائلی علاقے میں ہونے والا ڈرون حملہ بھی طالبان اور القاعدہ سے وابستہ جنگجوؤں کے ٹھکانے پر کیا گیا ہے۔