پاکستان میں عالمی بینک کے ڈائریکٹر ناجی بن حسائن نے اقوام متحدہ کے ترقیاتی پروگرام (یو این ڈی پی) کے سہ ماہی تحقیقاتی جریدے 'ڈیولپمنٹ ایڈوکیٹ پاکستان' کے تازہ شمارے میں تحریر کردہ پالیسی وژن مضمون میں لکھا ہے کہ پاکستان کا موجودہ اقتصادی ماڈل کام نہیں کررہا ہے۔ ملک میں غربت میں کمی میں پیش رفت اب مخالف سمت کی طرف جارہی ہے اور ترقی کے فائدے ایک چھوٹے سے اشرافیہ طبقے تک محدود رہ گئے ہیں۔

بن حسائن نے لکھا ہے،" اس بات پر وسیع تر اتفاق رائے ہے کہ ایسی پالیسیوں کو تبدیل کرنے کے لیے کارروائی کی ضرورت ہے جن سے ترقی متاثر ہوئی ہے، صرف چند افراد کو فائدہ ہوا ہے اور بہت اتارچڑھاو اور کم ترقی ہوئی ہے۔"

کیا پاکستان ورلڈ بینک کی تجاویز کے مطابق معاشی اصلاحات کر پائے گا؟

انہوں نے اس بات پر زور دیا کہ زرعی خوراک اور توانائی جیسے اہم شعبوں میں پالیسی کی ناکامیوں اور بگاڑ کو دور کیا جانا چاہئے۔ زراعت میں سبسڈیز اور قیمتوں کی پابندی کو ختم کرنے والے ان امور کی اصلاحا ت کی ضرورت ہے، جو چھوٹے کسانوں کو کم آمدنی والے کاشتکاری نظام میں مقید کردیتے ہیں اور زیادہ وسائل کے استعمال والے اور ماحول کو نقصان پہنچانے والے پیداواری طریقوں کی حوصلہ افزائی کرتے ہیں۔

اصلاحی اقدامات کو مخالفت کا سامنا ہوگا

عالمی بینک کے پاکستان کے کنٹری ڈائریکٹر کا کہنا تھا کہ ترقی کو روکنے والی پالیسیوں کو تبدیل کرنے کے لیے کارروائیوں کی اشد ضرورت ہے۔

انہوں نے کہا کہ توانائی کے شعبے میں اصلاحات سے مالی استحکام کی جانب پیش رفت مستحکم ہوگی، تقسیم کار کمپنیوں کی کارکردگی بہتر ہوگی۔ انہوں نے مزید کہا کہ نجی شراکت داروں کی تعداد میں اضافہ کیا جاناچاہئے اور قابل تجدید توانائی میں اضافے کے ذریعے بجلی کی پیداوار پر آنے والے بہت زیادہ اخراجات کو کم کیا جانا چاہئے۔

ماہر اقتصادیات کے مطابق گوکہ پالیسی میں اس طرح کی تبدیلیوں کی ضرورت کی افادیت ثابت ہوچکی ہے لیکن تجربہ بتاتا ہے کہ کسی بھی اصلاحی کوشش کو مخالفت کا سامنا کرنا پڑے گا۔

پاکستان میں مہنگائی پچاس سال کی بلند ترین سطح پر

ناجی بن حسائن کا کہنا تھا کہ "سوال یہ ہے کہ کیا ارباب حل وعقد موجودہ بحران سے پیدا ہونے والے مواقع کا فائدہ اٹھاتے ہوئے وہ کام کریں گے جس کی ضرورت ہے۔" انہوں نے زور دے کر کہا کہ اب وقت آگیا ہے کہ پاکستان ایک روشن، زیادہ خوشحال اور زیادہ پائیدار مستقبل کے مفادات کے لیے متحد ہو۔"

انہوں نے مزید کہا کہ مالیاتی نظام کو کافی حد تک بہتر کرنے کی ضرورت ہے۔ قرضوں کی فراہمی کے اخراجات اور ریونیو موبلائزیشن غیر پائیدار سطح پر ہیں، جب کہ انسانی ترقی اور بنیادی ڈھانچے میں سرمایہ کاری کرنے، اقتصادی چیلنجز سے نمٹنے اور بدلتے ہوئے ماحول کے مطابق ڈھالنے کے لیے وسائل ناکافی ہیں۔

ماہر اقتصادیات کا مشورہ

انہوں نے مشورہ دیا کہ حکومتی اخراجات کے معیار کو مستحکم اور بہتر بنانے کے لیے اصلاحات کی ضرورت ہے۔ اس کے لیے رجعت پسند اور تحریف آمیز سبسڈیز میں کمی اورغیر موثر سرکاری اداروں سے ہونے والے نقصانات کو کم کرنا ہوگا۔

پاکستان آئی ایم ایف کی سخت شرائط ماننے پر مجبور

انہوں نے مشورہ دیا کہ جائیداد پر ترقی پسند ٹیکس لگا کر اور ماحولیات کو نقصان پہنچانے والی سرگرمیوں کو ملنے والی ٹیکس رعایت میں کمی کرکے زیادہ ریونیو حاصل کیا جانا چاہئے۔

عالمی بینک کے عہدیدار کا مزید کہنا تھا کہ معیار زندگی میں بہتری کے لیے مضبوط ترقی اور زیادہ متحرک اور کھلی معیشت کی ضرور ت ہے لیکن بیوروکریسی کی جانب سے حائل کی جانے والی رکاوٹوں کو دور کرنا سب سے اہم ہے۔

ج ا/ ص ز (نیوز ایجنسیاں)