پاکستان کی بدلتی سیاست: پنجاب کے گورنر چوہدری سرور برطرف
3 اپریل 2022![Muhammad Sarwar](https://static.dw.com/image/16998846_800.webp)
پاکستان میں گزشتہ چند ہفتوں سے پائی جانے والی سیاسی بے یقینی کی صورت حال اس وقت اپنے عروج پر ہے اور ملکی پارلیمان کے ایوان زیریں میں آج ہی پاکستان تحریک انصاف سے تعلق رکھنے والے وزیر اعظم عمران خان کے خلاف اپوزیشن کی طرف سے پیش کردہ تحریک عدم اعتماد پر ووٹنگ بھی ہونے والی ہے۔
چند روز قبل صوبہ پنجاب کے پی ٹی آئی سے تعلق رکھنے والے وزیر اعلیٰ عثمان بزدار نے اپنے عہدے سے استعفیٰ دے دیا تھا، جس کے بعد لاہور میں پنجاب کی صوبائی اسمبلی میں نئے وزیر اعلیٰ کا انتخاب بھی ہو رہا ہے۔
اسی دوران پاکستانی وزیر اطلاعات فواد چوہدری نے ٹوئٹر پر اپنے ایک پیغام میں اتوار کی صبح یہ غیر متوقع اعلان بھی کر دیا کہ صوبائی گورنر چوہدری سرور کو وفاقی حکومت نے ان کے عہدے سے برطرف کر دیا ہے۔ فواد چوہدری نے اپنی اس ٹویٹ میں وفاقی حکومت کے اس اقدام کی کوئی وجہ نہیں بتائی۔
چوہدری سرور کی برطرفی کا اعلان اسلام آباد میں قومی اسمبلی میں وزیر اعظم عمران خان کے خلاف تحریک عدم اعتماد پر پارلیمانی ارکان کی طرف سے رائے دہی سے چند ہی گھنٹے پہلے کیا گیا۔
وزیر اطلاعات فواد چوہدری نے اپنی ٹویٹ میں لکھا، ''پنجاب کے نئے گورنر کا اعلان بعد میں کیا جائے گا، اور آئین کے مطابق پنجاب اسمبلی کے ڈپٹی اسپیکر تب تک قائم مقام گورنر ہوں گے۔‘‘
چوہدری سرور ماضی میں ایک برطانوی شہری کے طور پر برطانوی پارلیمان کے رکن بھی رہے ہیں اور انہوں نے 2013ء میں سابق وزیر اعظم نواز شریف کی جماعت پاکستان مسلم لیگ ن میں شمولیت کا فیصلہ کیا تھا، جس کے بعد انہیں پنجاب کا گورنر بنا دیا گیا تھا۔
جنوری 2015ء میں چوہدری سرور نے پنجاب کے گورنر کے عہدے سے استعفیٰ دے کر عمران خان کی تحریک انصاف میں شمولیت اختیار کر لی تھی۔ اس کے بعد سمتبر 2018ء میں انہیں دوبارہ پنجاب کا صوبائی گورنر بنا دیا گیا تھا اور اس عہدے سے آج انہیں برطرف کر دیا گیا۔