خبر رساں ادارے اے ایف پی کے مطابق شمالی وزیر ستان کے علاقے ڈانڈے درپہ خیل میں واقع ایک گھر پر منگل اور بدھ کی درمیانی شب امریکی جاسوس طیاروں نے چار میزائل فائر کیے، جس کے نتیجے میں 17 افراد موقع پر ہی ہلاک ہوگئے۔ اس واقعے میں دیگر متعدد کے زخمی ہونے کی بھی اطلاعات ہیں۔ عینی شاہدین کے مطابق ان ڈرون حملوں سے قبل علاقے میں ڈرون طیاروں کی پروازیں دیکھی گئی تھیں، جس کے باعث علاقے کے لوگوں میں کافی خوف ہراس پیدا ہوگیا تھا۔ بتایا گیا ہے کہ یہ ڈرون پروازیں اس حملے بعد بھی جاری رہیں۔

اس حملے کی تفصیلات بتاتے ہوئے خبر رساں ادارے اے ایف پی کا کہنا تھا کہ اس حملے میں ایک کمپاؤنڈ اور ایک گاڑی کا نشانہ بنایا گیا۔ جس کے باعث کمپاؤنڈ اور گاڑی مکمل طور پر تباہ ہوگئی۔ اس واقعے میں زخمی ہونے والے افراد کو مقامی لوگوں نے اپنی مدد آپ کے تحت مقامی ہسپتال پہنچایا۔

پاکستان میں میاں نواز شریف کے برسرِاقتدار آنے کے بعد سے یہ دوسرا ڈرون حملہ ہے۔ وزیر اعظم نواز شریف نے حکومت سنبھالتے ہی ڈرون حملوں کو ملکی خودمختاری اور سالمیت کی خلاف ورزی قرار دیتے ہوئے انہیں فوری طور پر بند کرنے کا مطالبہ کیا تھا۔ نواز شریف کی سیاسی جماعت مسلم لیگ (ن) پاکستان میں دائیں بازو کی ایک بڑی سیاسی جماعت سمجھی جاتی ہے۔ اس جماعت کے انتخابی نعروں میں سے ایک ڈرون حملوں کو رکوانا بھی تھا۔

نواز شریف حکومت کو اس حوالے سے فوری طور پر اس وقت مشکلات کا سامنا کرنا پڑا تھا، جب اس کے اقتدار سنبھالنے کے محض دو روز بعد ہی ملک میں ایک اور ڈرون حملہ کیا گیا تھا۔ سات جون کو ہونے والے اس ڈرون حملے میں سات شدت پسند ہلاک اور تین زخمی ہوگئے تھے۔ یہ ڈرون حملہ شمالی وزیرستان کی تحصیل شوال میں کیا گیا تھا۔