پاک امریکا تعلقات، افغانستان: پومپیو کی جنرل باجوہ سے گفتگو
7 جون 2018
امریکی وزیر خارجہ مائیک پومپیو نے پاکستانی فوجی کے سربراہ سے ٹیلی فون پر گفتگو کی ہے۔ بتایا گیا ہے کہ اس دوران افغانستان میں سیاسی مصالحت اور دیگر معاملات پر تبادلہ خیال کیا گیا۔
تصویر: picture-alliance/AP Photo/J. S. Applewhite
اشتہار
امریکی اسٹیٹ ڈیپارٹمنٹ کی طرف سے جمعرات کے دن بتایا گیا کہ پومپیو اور جنرل قمر جاوید باجوہ نے امریکا اور پاکستان کے مابین باہمی تعلقات میں بہتری پیدا کرنے کے بارے میں بھی گفتگو کی۔
پاکستانی فوج کے سربراہ سے ٹیلی فون پر گفتگو کرتے ہوئے امریکی وزیر خارجہ نے شدت پسند اور دہشت گرد گروہوں کے خلاف بلاتفریق کارروائی کرنے پر بھی زور دیا۔ اس گفتگو میں دونوں نے افغانستان میں سیاسی مصالحت کی ضرورت پر بھی اتفاق کیا۔
ناقدین کے مطابق افغان حکومت اور طالبان کے مابین مکالمت میں پاکستان اہم کردار ادا کر سکتا ہے، اس لیے اس شورش زدہ ملک میں قیام امن کی خاطر اسلام آباد کو ساتھ ملانا ضروری ہے۔
سن 2015 میں اسلام آباد نے افغان طالبان اور کابل حکومت کے مابین مذاکرات کی میزبانی کی تھی جو طالبان رہنما ملا عمر کی ہلاکت کی خبر عام ہونے کے بعد ختم ہو گئے تھے۔ اس کے بعد سے امریکا بارہا افغانستان میں طالبان اور حکومت کے مابین امن مذاکرات کا تذکرہ کر چکا ہے۔ پاکستان کا کہنا ہے کہ وہ اس ہمسایہ ملک میں قیام امن کے لیے ہر ممکن تعاون کرے گا۔
رواں برس کے آغاز ہی میں امریکی صدر ڈونلڈ ٹرمپ نے اپنی ایک ٹوئٹ میں پاکستان پر دوہرا معیار اختیار کرنے کا الزام عائد کیا تھا۔ بعد ازاں پاکستان کو فراہم کی جانے والی عسکری امداد بھی بند کر دی گئی تھی۔ تب سے اب تک اسلام آباد اور واشنگٹن کے تعلقات مسلسل کشیدگی کا شکار ہیں۔
ش ح / ع ب (روئٹرز، اے پی، اے ایف پی)
پاکستان کو ترقیاتی امداد دینے والے دس اہم ممالک
2010ء سے 2015ء کے دوران پاکستان کو ترقیاتی امداد فراہم کرنے والے دس اہم ترین ممالک کی جانب سے مجموعی طور پر 10,786 ملین امریکی ڈالرز کی امداد فراہم کی گئی۔ اہم ممالک اور ان کی فراہم کردہ امداد کی تفصیل یہاں پیش ہے۔
تصویر: O. Andersen/AFP/Getty Images
۱۔ امریکا
سن 2010 سے 2015 تک کے پانچ برسوں کے دوران پاکستان کو سب سے زیادہ ترقیاتی امداد امریکا نے دی۔ ترقیاتی منصوبوں کے لیے ان پانچ برسوں میں امریکا نے پاکستان کو 3935 ملین ڈالر فراہم کیے۔
تصویر: picture-alliance/AP Photo/C.Kaster
۲۔ برطانیہ
برطانیہ پاکستان کو امداد فراہم کرنے والے دوسرا بڑا ملک ہے۔ برطانیہ نے انہی پانچ برسوں کے دوران پاکستان کو 2686 ملین ڈالر ترقیاتی امداد کی مد میں فراہم کیے۔
تصویر: picture-alliance/AP Photo/M. Dunham
۳۔ جاپان
تیسرے نمبر پر جاپان ہے جس نے سن 2010 سے 2015 تک کے پانچ برسوں کے دوران پاکستان کو 1303 ملین ڈالر امداد فراہم کی۔
تصویر: Farooq Ahsan
۴۔ یورپی یونین
یورپی یونین کے اداروں نے پاکستان میں ترقیاتی منصوبوں کے لیے مذکورہ عرصے کے دوران اس جنوبی ایشیائی ملک کو 867 ملین ڈالر امداد دی۔
تصویر: Getty Images/AFP/B. Katsarova
۵۔ جرمنی
جرمنی، پاکستان کو ترقیاتی امداد فراہم کرنے والا پانچواں اہم ترین ملک رہا اور OECD کے اعداد و شمار کے مطابق مذکورہ پانچ برسوں کے دوران جرمنی نے پاکستان کو قریب 544 ملین ڈالر امداد فراہم کی۔
تصویر: Imago/Müller-Stauffenberg
۶۔ متحدہ عرب امارات
اسی دورانیے میں متحدہ عرب امارات نے پاکستان کو 473 ملین ڈالر کی ترقیاتی امداد فراہم کی۔ یو اے ای پاکستان کو ترقیاتی کاموں کے لیے مالی امداد فراہم کرنے والے ممالک کی فہرست میں چھٹے نمبر پر رہا۔
تصویر: picture-alliance/dpa
۷۔ آسٹریلیا
ساتویں نمبر پر آسٹریلیا رہا جس نے ان پانچ برسوں کے دوران پاکستان میں ترقیاتی منصوبوں کے لیے 353 ملین ڈالر کی امداد فراہم کی۔
تصویر: picture-alliance/dpa/H. Bäsemann
۸۔ کینیڈا
سن 2010 سے 2015 تک کے پانچ برسوں کے دوران کینیڈا نے پاکستان کو 262 ملین ڈالر ترقیاتی امداد کی مد میں دیے۔
تصویر: Getty Images/V. Ridley
۹۔ ترکی
پاکستان میں ترقیاتی منصوبوں کے لیے امداد فراہم کرنے والے اہم ممالک کی فہرست میں ترکی نویں نمبر پر ہے جس نے انہی پانچ برسوں کے دوران پاکستان میں ترقیاتی منصوبوں کے لیے 236 ملین ڈالر خرچ کیے۔
تصویر: Tanvir Shahzad
۱۰۔ ناروے
ناروے پاکستان کو ترقیاتی امداد فراہم کرنے والا دسواں اہم ملک رہا جس نے مذکورہ پانچ برسوں کے دوران پاکستان میں ترقیاتی منصوبوں کے لیے 126 ملین ڈالر فراہم کیے۔
تصویر: Picture-alliance/dpa/M. Jung
چین
چین ترقیاتی امداد فراہم کرنے والی تنظیم کا رکن نہیں ہے اور عام طور پر چینی امداد آسان شرائط پر فراہم کردہ قرضوں کی صورت میں ہوتی ہے۔ چین ’ایڈ ڈیٹا‘ کے مطابق ایسے قرضے بھی کسی حد تک ترقیاتی امداد میں شمار کیے جا سکتے ہیں۔ صرف سن 2014 میں چین نے پاکستان کو مختلف منصوبوں کے لیے 4600 ملین ڈالر فراہم کیے۔
تصویر: picture-alliance/AP Photo/M. Schiefelbein
سعودی عرب
چین کی طرح سعودی عرب بھی ترقیاتی منصوبوں میں معاونت کے لیے قرضے فراہم کرتا ہے۔ سعودی فنڈ فار ڈیویلپمنٹ کے اعداد و شمار کے مطابق سعودی عرب نے سن 1975 تا 2014 کے عرصے میں پاکستان کو 2384 ملین سعودی ریال (قریب 620 ملین ڈالر) دیے۔
