سن 1950 سے 1970ء تک کی دہائیوں میں پلاسٹک کم مقدار میں بنتا تھا۔ یہی وجہ ہے کہ اس وقت پلاسٹک کا کوڑا کرکٹ نہ ہونے کے برابر تھا اور یہ دنیا کے لیے بڑا مسئلہ نہیں تھا، جتنا پلاسٹک کوڑے تک پہنچتا تھا، اسے ٹھکانے لگا دیا جاتا تھا۔

سن 1990 کی دہائی تک پلاسٹک کی پیداوار تین گنا سے بھی زیادہ بڑھ چکی تھی۔ اسی طرح پلاسٹک کا کوڑا کرکٹ بڑھا اور آہستہ آہستہ یہ ایک مسئلہ بنتا گیا۔

سن 2000 کے اوائل میں پلاسٹک کی پیداوار بے تحاشہ بڑھ چکی تھی۔ ایک دہائی میں پلاسٹک کی پیداوار اتنی بڑھی، جتنی گزشتہ چار دہائیوں میں ملا کر بھی نہیں بڑھی تھی۔

آج دنیا بھر میں سالانہ بنیادوں پر تین سو ملین ٹن پلاسٹک کا کوڑا کرکٹ جمع ہوتا ہے۔ اگر دنیا کی مجموعی آبادی کا وزن کیا جائے، تو وہ پلاسٹک کے اس وزن سے کم ہو گا۔

سن 1950 سے لے کر اب تک قریب 8.3 بلین ٹن پلاسٹک تیار کیا گیا ہے۔ اس کے ساٹھ فیصد کو درست اور ماحول دوست طریقے سے ٹھکانے نہیں لگایا جا سکا، جس کی وجہ سے یہ پلاسٹک آج یا تو کوڑے کرکٹ کے پہاڑوں کی صورت میں موجود ہے یا ہمارے سمندروں، جنگلات اور ماحول کا حصہ بن کر انہیں تباہ کر رہا ہے۔

ایک تازہ سروے کے مطابق پلاسٹک کے کوڑے میں سب سے نمایاں سگرٹ کے فلٹر ہیں۔ پانی و مشروبات کی بوتلیں، بوتلوں کے ڈھکنے، کھانے پینے کی اشیاء کی پیکنگ، شاپنگ بیگز اور اسٹرا دیگر اشیاء ہیں، جو پلاسٹک کے کوڑے کرکٹ کا نمایاں حصہ ہیں۔

ہر سال آٹھ ملین ٹن پلاسٹک کا کوڑا ہمارے سمندروں کا حصہ بنتا ہے۔ سمندروں میں یہ پلاسٹک دریاؤں سے پہنچتا ہے۔ دنیا کے دس دریا، نوے فیصد پلاسٹک کا کوڑا پھیلانے کے ذمہ دار ہیں۔ پاکستان کا دریائے سندھ بھی ان میں شامل ہے، جس سے سالانہ 164,332 ٹن پلاسٹک سمندر میں پھیلتا ہے۔

اگر پلاسٹک کی پیداوار اور اس سے بننے والے کچرے پر کنٹرول نہیں کیا گیا اور معاملات اسی طرح جاری رہے، تو اقوام متحدہ کی ایک رپورٹ کے مطابق سن 2050 تک ہمارے سمندروں میں مچھلیوں سے زیادہ پلاسٹک پایا جائے گا۔

بیمار ہونا ایک قدرتی عمل ہے۔ جانور بھی یہی سمجھتے ہیں۔ بہت سے مختلف جانور اپنے زخموں سے چھٹکارا پانے یا طفیلی کیڑوں یا جراثیم سے چھٹکارا پانے کے لیے فطرت میں موجود قدرتی تریاق کا استعمال کرتے ہیں۔ جانوروں کا خود کو خود سے ٹھیک کرنے کے عمل کو ’زو فارما کوگنوسی‘ کہا جاتا ہے۔ حال ہی میں محققین نے افریقی ملک گبون میں مشاہدہ کیا کہ چیمپینزی کس طرح اپنے زخموں کا علاج کرتے ہیں۔

محققین نے لوانگو نیشنل پارک میں مشاہدہ کیا کہ چیمپینزیوں نے ہوا سے کیڑوں کو پکڑا، انہیں اپنے ہونٹوں کے درمیان پیسا اور پھر انہیں اپنے کھلے زخموں پر لگا دیا۔ اہم بات یہ تھی کہ وہ اس طرح نہ صرف اپنے زخموں کا بلکہ دوسرے چمپینزیوں کے زخموں کا بھی علاج کرتے دیکھے گئے۔ اس سے یہ بھی واضح ہوتا ہے کہ یہ مخلوق سماجی رویے رکھتی ہے جس سے دوسروں کو فائدہ پہنچ سکے۔

امریکی سیاہ ریچھ اوشا نامی پودے کی جڑوں میں شفایابی کی طاقت جانتے ہیں۔ ماہر طبیعات شان سیگسٹیٹ جنہوں نے نیو میکسیکو کے شمالی حصے میں جانوروں کا مشاہدہ کیا کہ یہ ریچھ جوڑوں کی سوزش یا آرتھرائٹس کی تکلیف کے علاج کے لیے ان جڑوں کا استعمال کرتے ہیں۔ ان کا کہنا ہے کہ مقامی لوگ کئی صدیاں قبل ریچھوں کو اس پودے کی جڑیں استعمال کرتے دیکھ کر اس کی شفایابی کی صلاحیت سے متعارف ہوئے۔

اگر آپ نے کبھی کتا پالا ہے تو آپ نے ان کے اپنا علاج کرنے کا مشاہدہ بھی کیا ہو گا۔ کتوں کا جب پیٹ گڑ بڑ ہو تو وہ گھاس کھاتے ہیں۔ وہ عام طور پر الٹی کر کے اس نکال دیتے ہیں یا پھر یہ گھاس ہضم ہوئے بنا جلد ہی ان کے پاخانے سے خارج ہو جاتا ہے۔ یہ گھاس ان کے لیے پیراسائٹس یا نقصان دہ جراثیم سے نجات پانے کا طریقہ ہے۔

ریسرچر اس بات سے آگاہ ہیں کہ پرندوں کی 200 سے زائد اقسام ایسی ہیں، جو چیونٹیوں کی رہائش پر بیٹھتی ہیں اور اپنے پروں سے غسل کرنے جیسی حرکات کرتے ہیں تاکہ چیونٹیاں ان سے چمٹ جائیں۔ اس طریقے کو ’اینٹنگ‘ کہا جاتا ہے اور اس میں پرندے فارمک ایسڈ کے ذریعے اپنے پروں کو انتہائی چھوٹے نقصان دہ کیڑوں، فنگس اور بیکٹیریا وغیرہ سے پاک کرتے ہیں۔

مڈغاسکر کے لیمور نامی مادہ حاملہ بندر انجیر اور املی کے درختوں کی چھال یا پتے چباتی ہیں۔ ان میں ایسے اجزاء ہوتے ہیں جو لیمور میں دودھ کی پیداوار بڑھاتے ہیں، جراثیم وغیرہ کو مارتے ہیں اور بچے کی پیدائش کے عمل کو سہل بناتے ہیں۔

ہاتھی 22 ماہ کے حمل کے بعد بچے کو جنم دیتی ہے۔ یہ کسی بھی جانور کا طویل ترین عرصہ ہے۔ کینیا میں حمل کے آخری عرصے میں ہتھنیاں اپنے معمول کے راستوں کو چھوڑ کر ایسے راستے اختیار کرتی ہیں جہاں وہ بروجینیسیائی یا نیلے پھولوں والے پودوں کی قسم کے درختوں کے پتے کھاتی ہیں جس کے کچھ وقت بعد وہ بچے کو جنم دیتی ہیں۔ کینیا کی خواتین بھی ان پتوں کو اسی مقصد کے لیے استعمال کرتی ہیں۔

جانور خود سے علاج کے علاوہ نشے کے لیے بھی قدرت سے رجوع کرتے ہیں۔ فِن لینڈ اور سائبیریا کے رینڈیئر اس مقصد کے لیے امانیتا مسکاریا نامی مشرومز کھاتے ہیں۔

ایک ڈاکومینٹری کی ریکارڈنگ کے دوران محققین نے ڈولفن مچھلیوں کو پفر مچھلیوں سے کھیلتے ہوئے دیکھا۔ وہ ان مچھلیوں کو نصف گھنٹے تک ایک دوسرے کی طرف پھینکتیں اور ہوا میں اچھالتیں جس کے بعد پفر مچھلیوں کو چھوڑ دیا گیا۔ پفر مچھلیاں شدید دباؤ میں ایک زہریلا مادہ خارج کرتی ہیں جس سے ڈولفن مچھلیاں نشے کی کیفیت میں چلی جاتی ہیں۔