وسطی پرتگال میں ہفتہ پانچ اگست کو مسیحییوں کے روحانی پیشوا پوپ فرانسس کا استقبال کیتھولک نوجوانوں نے پُر جوش طریقے سے کیا۔ حکام کے مطابق ہجوم جس کا تخمینہ 200,000 لگایا گیا تھا، پرتگال میں مزار فاطمہ کے وسیع چوک میں جمع ہوا اور 86 سالہ پوپ کا پُر جوش استقبال کیا۔ پوپ کو لزبن سے بذریعہ  ہیلی کاپٹر اس مقام پر پہنچایا گیا۔

سفید کاساک میں ملبوسپوپ فرانسس  اپنے قافلے کے ساتھ  آہستہ آہستہ مزار فاطمہ چوک کی طرف بڑھنے کے دوران کئی مرتبہ رکے اور انہوں نے ان بچوں کو بوسے دیے اور ان کے سر پر دست شفقت پھیرا، جنہیں ان تک لایا گیا تھا۔ پوپ فرانسس نے اس مقام پرقائم چیپل میں بیمار اور معذور نوجوانوں کے ساتھ مل کر مقدس کتاب بائبل کی تلاوت کی۔ مسیحی عقیدے میں اس مقام کو خاص اہمیت دی جاتی ہے کیونکہ اس سے روایت ہے کہ یہاں 'ورجن مریم‘ یا کنواری مریم سن1917 میں چرواہے کے تین بچوں کے ساتھ نمودار ہوئی تھیں اور انہوں نے اسی جگہ ایک تقریر کی تھی۔

اس 'مزار فاطمہ‘ کی زیارت کے لیے دنیا بھر سے لاکھوں عازمین کھنچے چلے آتے ہیں جن میں اکثریت مسیحی عقیدے کے ماننے والوں کی ہوتی ہے۔

پوپ فرانسس  اس بڑے ایونٹ کے بعد واپس لزبن جائیں گے جہاں وہ ہفتے کی شام ’’واٹر فرنٹ پارک ٹیجو‘‘ میں شب بیداری اور عبادت کی تقریب کی قیادت کریں گے۔ چرچ منتظمین توقع کر رہے ہیں کہ ان تقریبات میں ایک ملین تک افراد شریک ہوں گے۔

پوپ فرانسس جن کی صحت تیزی سے گر رہی ہے،اب تمام ایونٹس پر ویل چیئیر یا واکنگ چھڑی کے سہارے ہی نظر آتے ہیں۔ انہیں جون میں نو راتیں ہسپتال میں گزارنا پڑی تھیں کیونکہ ان کا ہرنیا کا آپریشن ہوا تھا۔ پوپ اپنی جسمانی کمزوری اور طبعیت کی ناسازی کے باوجود پُرتگال میں منعقدہ ’’ورلڈ یوتھ ڈے‘‘ کی چھ روزہ تقریبات میں شرکت کے لیے پہنچے جہاں ان کا لاکھوں افراد نے نہایت پُر جوش خیر مقدم کیا۔ گزشتہ جمعرات کو پوپ کے استقبال کی سرکاری تقریب کے لیے لزبن کے ایک پارک میں ڈیڑھ ملین نوجوانوں نے پوپ کے لیے نعرے لگائے اور اپنی خوشی کا اظہار کیا تھا۔

پوپ فرانسس اپنے پرتگال کے ای دورے کے آخری دن اتوار چھ اگست کو پارک ٹیجو میں ایک بڑے دعائیہ اجتماع سے خطاب کریں گے۔ مقامی حکام نے تاہم عازمین کو ہدایات دی ہیں کہ وہ انتہائی گرمی اور تپش سے بچنے کا بندوبست رکھیں اور زیادہ سے زیادہ پانی پیئیں کیونکہ اتوار کو پرتگال کے اس مقام پر درجہ حرارت 39 ڈگی سینٹی گریڈ تک جانے کی پیشگوئی کی جا رہی ہے۔

 

’مسائل کے سمندر‘ کا مقابلہ کریں، ہمت نہ ہاریں: پوپ فرانسس

ورلڈ یوتھ ڈے دراصل دنیا بھر کے مسیحییوں کا سب سے بڑا اجتماع ہوتا ہے۔ اس کی بنیاد 1986ء میں پوپ جان پال دوم نے رکھی تھی۔ اس میں دعائیہ سیشنز کے علاوہ بہت سے رنگا رنگ پروگراموں کا انعقاد کیا جاتا ہے۔ 2022ء اگست کے لیے اس پروگرام کے انعقاد کی منصوبہ بندی کی گئی تھی تاہم اُسے کورونا کی عالمی وبا کے تحت ملتوی کر دیا گیا تھا۔ پرتگال میں اس نوعیت کا یہ چوتھا اجتماع ہو رہا ہے۔

ک م/ا ب ا (اے اف پی)