پرنس فیلپ اور الزبتھ ثانی کا ازدواجی بندھن سات دہائیوں سے زائد عرصے پر محیط رہا۔ انہوں نے بطور ڈیوک آف ایڈنبرا کئی شاہی ذمہ داریوں کو بھی احسن انداز میں نبھایا۔ ان کی رحلت پر عالمی لیڈروں اور اہم شخصیات کی جانب سے خراجِ عقیدت کا سلسلہ جاری ہے۔ چند پیغامات درج ذیل ہیں:

برطانوی وزیراعظم

بورس جانسن نے پرنس فیلپ کے حوالے سے کہا کہ انہوں نے ایک مثالی زندگی بسر کی۔ برطانوی وزیراعظم نے ملکہ الزبتھ کو روانہ کیے گئے پیغام میں مزید کہا کہ پرنس فیلپ کو برطانیہ، دولتِ مشترکہ اور دیگر اقوام عالم کی کئی نسلوں کی جانب سے بے پناہ محبت حاصل ہوئی۔ بورس جانسن نے ایک شاندار زندگی گزارنے پر پوری قوم کی جانب سے ان کا شکریہ ادا کیا۔

امریکی صدر

صدر جوبائیڈن نے ڈیوک آف ایڈنبرا کو پرزور الفاظ میں خراجِ عقیدت پیش کرتے ہوئے انہیں برطانیہ اور عوام کی بھلائی چاہنے والا ایک بے غرض انسان قرار دیا۔ امریکی صدر نے مزید کہا کہ دوسری عالمی جنگ میں شرکت ہو یا ملکہ الزبتھ کے ساتھ تہتر برس کی رفاقت، ان کی زندگی سبھی کے سامنے ہے اور انہوں نے خوش دلی کے ساتھ اپنی زندگی برطانوی عوام، کامن ویلتھ اور اپنے خاندان کے لیے وقف کر رکھی تھی۔

برطانوی ملکہ الزبتھ کے شوہر پرنس فیلپ انتقال کر گئے

جرمن چانسلر

جرمنی کی قائدِ حکومت چانسلر انگیلا میرکل نے اپنے بیان میں کہا کہ پرنس فیلپ کی رحلت سے انہیں بہت دکھ ہوا ہے۔ میرکل نے ڈیوک آف ایڈنبرا کی جرمنی سے محبت، ان کی صاف و شفاف شخصیت اور فرائض کی ادائیگی کو باوقار قرار دیا۔

پاکستانی وزیر اعظم

پاکستان کے وزیراعظم عمران خان نے پرنس فیلپ کی رحلت پر ان کے پاکستان کے ساتھ لگاؤ کی خاص طور پر تعریف کی۔ انہوں نے اپنے بیان میں کہا کہ برطانیہ ایک ایسی دانشمند بزرگ شخصیت سے محروم ہو گیا ہے، جس میں انسانی خدمت کا جذبہ کوٹ کوٹ کر بھرا ہوا تھا۔

سابق امریکی صدور

سابق امریکی صدر ڈونلڈ ٹرمپ اور ان کی اہلیہ میلانیا نے پرنس فیلیپ کی رحلت کو ایک ناقابلِ تلافی نقصان قرار دیتے ہوئے شاہی خاندان کے ساتھ ہمدردی کا اظہار کیا۔ اسی طرح سابق امریکی صدر باراک اوباما نے اپنے فیس بک پیج پر لکھا کہ پرنس فیلپ نے ملکہ کے ساتھ بطور شوہر اپنی ذات سے ہٹ کر بے غرض کردار ادا کیا اور انہوں نے ثابت کیا کہ ایک طاقتور خاتون کے ساتھ ہمدرد شوہر کا کس انداز کا کردار ہونا چاہیے۔

برطانوی ملکہ کے شوہر پرنس فیلپ اب ڈرائیونگ لائسنس کے بغیر

آئرش وزیراعظم

آئرلینڈ کے وزیراعظم مائیکل مارٹن کا کہنا ہے کہ وہ پرنس فیلپ کی رحلت پر غم زدہ ہیں اور اس موقع پر آئرش عوام اور ان کی دعائیں بھی ملکہ الزبتھ اور برطانوی عوام کے ساتھ ہیں۔

آسٹریلوی وزیراعظم

آسٹریلیا کے وزیراعظم اسکاٹ موریسن نے ڈیوک آف ایڈنبرا کی رحلت پر کہا کہ دنیا میں کئی بڑی شخصیات عمر پوری کر کے رخصت ہو گئیں ہیں لیکن انہیں چند ایک کو زندگی میں دیکھنے کا موقع ملا اور پرنس فیلپ ان میں سے ایک ہیں۔ موریسن نے آسٹریلوی پرچم کو سرکاری عمارات پر سرنگوں کرنے کا حکم بھی جاری کیا ہے۔

فرانسیسی صدر

فرانس کے صدر ایمانوئل ماکروں نے بھی تعزیتی پیغام برطانوی ملکہ کے نام ارسال کیا۔ ماکروں نے کہا کہ پرنس فیلپ کی زندگی ایک مثالی تھی اور انہوں نے اسے بہادرانہ انداز میں بسر کیا، وہ زندگی بھر نوجوانوں اور ماحولیات کے لیے سرگرم رہے۔

ڈیوک آف ایڈنبرا کو خراج عقیدت پیش کرنے والی دوسری شخصیات میں کینیڈا کے وزیراعظم جسٹن ٹروڈو، بھارتی وزیراعظم نریندر مودی، اسرائیلی وزیراعظم بینجمن نیتن یاہو، کینیا اور اٹلی کے صدور بھی شامل ہیں۔

ع ح، ا ا (اے ایف پی)