پشاور: خودکش حملہ، 34 افراد ہلاک
9 مارچ 2011پولیس افسر زاہد خان کے مطابق پشاور کے قریب ادیزئی کے علاقے میں ایک طالبان مخالف امن لشکر کے رہنما کی اہلیہ کے جنازے میں یہ خود کش حملہ ہوا ہے۔ پولیس کے مطابق اس جنازے میں تقریباً 150 افراد شریک تھے، جن میں سے 34 ہلاک ہو گئے ہیں اور 50 سے زائد زخمی ہیں۔ پولیس نے مزید بتایا کہ خود کش بمبار نے جنازے میں شریک ہو کر خود کو دھماکے سے اڑا لیا۔
خیبر پختونخوا کے کئی دیگر علاقوں کی طرح ادیزئی میں بھی کئی قبائلی گروپس طالبان عسکریت پسندوں کے خلاف برسرپیکار ہیں۔ اس سلسلے میں انہیں پاکستانی حکومت کی سر پرستی بھی حاصل ہے۔
دھماکے کے فوراًبعد قانون نافذ کرنے والے اداروں نے علاقے کو گھیرے میں لے لیاجبکہ جائے وقوعہ پر امدادی کارروائیاں شروع کردی گئی ہیں۔ دھماکے کے زخمیوں کو پشاور کے لیڈی ریڈنگ ہسپتال پہنچایا گیا ہے، جہاں بعض زخمیوں کی حالت تشویشناک ہے۔ ہلاکتوںمیںاضافے کا خدشہ ہے۔
رپورٹ: امتیاز احمد/ خبر رساں ادارے
ادارت: افسر اعوان