یورپی بلاک کے وزرائے داخلہ کے درمیان امیگریشن کے نظام میں اصلاحات کے موضوع پر ہونے والے مذاکرات میں یورپی یونین کے کمشنر برائے مہاجرت دیمتریس اوراموپولوس کو اندازہ ہو گیا ہے کہ رکن ریاستوں کو مہاجرین کے حوالے سے برابر کی ذمہ داری اٹھانے میں رضامند کرنے کے لیے ابھی مزید وقت درکار ہو گا۔

اورامو پولوس نے ایک نیوز کانفرنس میں صحافیوں سے بات کرتے ہوئے کہا،’’ آخری بار اصلاحات متعارف کرانے میں آٹھ سال کا عرصہ لگا تھا تاہم مجھے یقین ہے کہ اس مرتبہ معاملات جلدی طے ہو جائیں گے۔‘‘

یورپ کا رخ کرنے والے تارکین وطن کی ایک بڑی تعداد اٹلی اور یونان کے راستے اس براعظم میں داخل ہوتی ہے۔ سن 2015 میں یہ سلسلہ اپنے عروج پر پہنچ گیا تھا۔ مہاجرین کے بحران نے نہ صرف یورپی اتحاد کو امتحان میں ڈالا ہے بلکہ متعدد ووٹرز کو مہاجرین مخالف جماعتوں کو ووٹ دینے کی جانب بھی مائل کیا ہے۔

روم حکومت کے سخت نظریات رکھنے والے نئے وزیر داخلہ ماتیو سالووینی اس ملاقات میں موجود ہونے کے بجائے ملکی سینیٹ میں نئے وزیراعظم کا خطاب سننے گئے تھے۔ سالووینی نے اسی ہفتے کہا تھا کہ اٹلی کو یورپ کے مہاجر کیمپ میں تبدیل نہیں کیا جا سکتا۔ اٹلی کی حکومت امیگریشن نظام کے لیے مجوزہ اصلاحات کو پہلے ہی مسترد کر چکی ہے۔

سیاسی پناہ کے قوانین میں اصلاحات کے ایک نئے مسودے پر گفتگو میں تعطل کے حوالے سے لکسمبرگ کے وزیر داخلہ ژاں ایسلبورن نے ازراہ مذاق کہا،’’ میرا اندازہ ہے کہ ہم اس معاملے پر ایسٹر تک متفق ہو جائیں گے لیکن کس سال کے ایسٹر تک، یہ میں نہیں جانتا۔‘‘

یورپ میں پناہ کے موجودہ قوانین کے تحت تارکین وطن صرف پہلی بار داخلے کے ملک میں ہی پناہ کی درخواست دائر کر دیتے ہیں۔ اس طرح اٹلی اور یونان وہ دو ممالک ہیں جو پناہ گزینوں کے حوالے سے سب سے زیادہ بوجھ برداشت کر رہے ہیں۔ یورپی یونین چاہتی ہے کہ ایسے مہاجرین جو جنگ زدہ ملکوں سے اپنی جان بچا کر آئے ہیں، انہیں بلاک کے تمام ممالک میں منصفانہ طور پر تقسیم کر دیا جائے۔

یونین کے رہنماؤں نے گزشتہ برس دسمبر کے مہینے میں یہ طے کیا تھا کہ آزائلم  پالیسی میں اصلاحات کا معاملہ اس برس جون تک نمٹا دیا جائے گا جبکہ گزشتہ ہفتے جرمن چانسلر انگیلا میرکل نے بھی اپنے ایک انٹرویو میں کہا تھا کہ آئندہ تین سے چار ہفتوں میں اتفاق رائے طے پا جائے گا۔

ص ح/ روئٹرز