پاکستانی صوبے بلوچستان میں نیشنل ڈیٹا بیس اینڈ رجسٹریشن اتھارٹی نادرا نےصوبےمیں قواعدو ضوابط کے برعکس بننے والے پنتالیس ہزار قومی شناختی کارڈ بلاک کرتے ہوئے کہا ہے کہ ان میں سے اکثر شناختی کارڈ جعل سازی کے ذریعے افغان مہاجرین اور دیگر غیرملکیوں کوجاری کیے گئے تھے۔

کوئٹہ میں نادرا کےایک سینیئر اہلکار وحید احمدنے بتایا کہ قومی دستاویزات کی جعل سازی میں ملوث نادرا اہلکاروں کے خلاف بڑے پیمانے پر محکمانہ تحقیقات کا آغاز کر دیا گیا ہے۔ ڈی ڈبلیو سے گفتگو کے دوران ان کا مزید کہناتھا:’’یہ تمام قومی شناختی کارڈ تحقیقات کے بعد بلاک کیے گئے ہیں۔ نادرا کے جن اہلکاروں پر جعل سازی کا جرم ثابت ہو گا، ان کے کیس ضروری کارروائی کے بعد نیب کو بھجوائے جائیں گے۔ اب بھی ہزاروں دیگر قومی شناختی کارڈ جانچ پڑتال کے مراحل میں ہیں اور ہمیں یہ شک ہے کہ وہ شناختی کارڈ بھی جعلی ہو سکتے ہیں۔‘‘

وحید احمد نے مزید بتایا کہ جن لوگوں کے شناختی کارڈ بلاک کیے گئے ہیں، نادرا کے ڈیٹا بیس میں ان کا کوئی ریکارڈ موجود نہیں ہے۔ ان کے بقول:’’ہمارا ڈیٹا بیس قومی سطح پر تمام جدید سہولیات سے ہم آہنگ ہے۔ اس کے ریکارڈ میں جعل سازی کے ذریعے ردّ و بدل کی کوشش کی گئی تھی، جو کہ محکمانہ تحقیقات کے دوران ناکام بنا دی گئی۔ جن لوگوں کو جعلی شناختی کارڈ جاری کیے گئے تھے، ان کے ناموں کا اندراج جعلی طریقے سے مقامی لوگوں کے خاندانوں میں کر دیا گیا تھا۔ رجسٹریشن کا عمل شفاف بنانے کے لیے تمام وسائل بروئے کار لائے جا رہے ہیں۔‘‘

نادرا میں جعل سازی کے متعدد کیس وفاقی تحقیقاتی ادارے ایف آئی اے میں بھی زیر تفتیش ہیں اور کچھ عرصہ قبل ایف آئی اے حکام نے کوئٹہ، تربت اور کراچی سے نادرا کے دو اعلیٰ افسران سمیت پانچ اہلکاروں کو گرفتار کیا تھا۔ ان اہلکاروں نے جعلی طریقے سے بھاری رقوم کے عوض غیر ملکیوں کو سینکڑوں شناختی کارڈ جاری کیے تھے۔

ایف ائی آے کے ڈپٹی ڈائریکٹر فواد احمد نےڈی ڈبلیوکو بتایا کہ جعل سازی میں ملوث نادرا اہلکاروں کے ایک درجن سے زائد کیس ایف آئی اے میں زیر تفتیش ہیں اور بعض کیسوں میں تحقیقات مکمل ہونے کے بعد نامزد ملزمان کو گرفتار بھی کیا گیا ہے، جن کے کیس اس وقت عدالتوں میں زیر سماعت ہیں۔ ان کے بقول ’بلوچستان میں سرکاری اہلکاروں کا ایک مخصوص گروہ منظم انداز میں افغان مہاجرین اور دیگر غیر ملکیوں کو بھاری رقوم کے عوض قومی شناختی کارڈ بنوا کر دیتا رہا ہے۔ اس گروہ کے کئی ملزم ہم گرفتار کر چکے ہیں، جن میں نادرا کے ساتھ ساتھ محکمہٴ پاسپورٹ کے افسران بھی شامل ہیں۔ یہ اہلکار ہزاروں لوگوں کو جعل سازی کے ذریعے بلوچستان سے جعلی شناختی کارڈ اور پاسپورٹ بنوا کر دے چکے ہیں۔ بد عنوانی میں ملوث ملزمان کے خلاف ایف آئی اے کی دو خصوصی ٹیمیں کوئٹہ میں کام کر رہی ہیں‘۔

رواں سال جنوری کے مہینے میں احتساب عدالت کوئٹہ نے نادرا بلوچستان کے دو سینیئر افسران سید علی احمد اور رضوان آفتاب کو جعلی شناختی کارڈ جاری کرنے کے جرم میں سات سال قید بامشقت اور 80 لاکھ روپے جرمانے کی سزا سنائی تھی۔

واضح رہے کہ بلوچستان کی بلوچ قوم پرست جماعت بلوچستان نیشنل پارٹی مینگل اور دیگرسیاسی جماعتیں بھی نادرا کے خلاف کوئٹہ میں کئی بار احتجاجی مظاہرے کر چکی ہیں۔ یہ سیاسی جماعتیں حکومت سے ان افغان مہاجرین کے خلاف کارروائی کا مطالبہ کرتی رہی ہیں، جنہیں ان کے بقول ماضی میں جعلی طریقے سے قومی شناختی کارڈ جاری کیے گئے تھے۔