پنجاب میں بچوں کے اغوا کی وارداتوں کے پیچھے کون ہے؟
7 اکتوبر 2022![Symbolbild Kindesmissbrauch](https://static.dw.com/image/61893656_800.webp)
لاہور میں ڈی ایچ اے کی رہائشی اسما نورین نے ڈی ڈبلیو سے گفتگو کرتے ہوئے بتایا کہ سوشل میڈیا کے ذریعے بچوں کے اغوا کی اطلاعات ملنے کے بعد وہ اب خوف اور پریشانی سے دوچار ہیں۔ ان افواہوں کے تناظر میں اسما نے اپنے بچوں کو اجنبیوں سے نہ ملنے اور انتہائی محتاط رہنے کو کہا ہے۔
سما نے بتایا، '' مجھے لگتا ہے کہ یہ اطلاعات درست ہیں کیونکہ میری ملازمہ نے اپنے علاقے میں ایسا کیس پکڑے جانے کی اطلاع دی ہے۔ اس کے علاوہ میں نے تلہ گنگ کے علاقے میں بھی ایسی وارداتوں کے بارے میں سنا ہے۔‘‘
بہت سے دیگر والدین بھی اسما نورین کی طرح بچوں کے اغوا کی خبروں پر تشویش میں مبتلا ہیں۔ کئی لوگوں نے کرائے کی گاڑیوں کی بجائے بچوں کو خود سکول چھوڑنا اور واپس لانا شروع کر دیا ہے۔
بچے اغوا کیے بھی جا رہے ہیں کیا؟
پاکستان میں انٹرنیٹ پر گردش کرنے والی کئی ویڈیوز ، آڈیوز اور ٹیکسٹ پیغامات میں بچوں کے اغوا کی اطلاعات شئیر کی جا رہی ہیں۔ واٹس ایپ پر گردش کرنے والی ایک پرانی ویڈیو میں سی سی ٹی وی فوٹیج کی مدد سے کراچی کے ایک علاقے میں ایک بچے کے اغوا کا منظر دکھایا گیا ہے۔
پاکستانی بچوں کے جنسی استحصال کے خلاف ایپ: ’میرا بچہ الرٹ‘
تین لاپتہ لڑکیوں کا سراغ اور پاکستان کا ٹوٹتا ہوا فیملی سسٹم
واٹس ایپ پر ایک آڈیو پیغام میں ایک خاتون بچوں کے اغوا کی واردات کی تفصیل بتا کر شہریوں کو محتاط رہنے کا مشورہ دے رہی ہیں۔ ایک اور پوسٹ میں فیصل آباد کے ایک علاقے میں بچے کو اغوا کرنے کے کوشش کرنے والے ایک شخص کو مار پیٹ کا نشانہ بنایا جا رہا ہے۔
یہ سب جھوٹ ہے، پنجاب پولیس کا دعوی
سوشل میڈیا پر ایسی جھوٹی خبریں شیئر کی جا رہی ہیں، جن میں دعوی کیا گیا ہے کہ سندھ کے کچے کے سیلاب زدہ علاقوں سے آنے والے جرائم پیشہ افراد ان وارداتوں میں ملوث ہیں۔
تاہم ڈی ڈبلیو کے ساتھ خصوصی گفتگو کرتے ہوئے پنجاب پولیس کے ڈی آئی جی آپریشنز وقاص نذیر کا کہنا تھا کہ سندھ کے سیلابی علاقوں سے آنے والے جرائم پیشہ افراد کی طرف سے پنجاب میں بچوں کو اغوا کرنے کے اطلاعات میں کوئی صداقت نہیں ہے۔
وقاص نذیر کے مطابق اب تک کی تحقیقات کے مطابق وائرل ہونے والی ویڈیوز میں بتائی جانے والی وارداتوں کی کوئی تصدیق نہیں ہو سکی ہے۔
پولیس کے ڈی آئی جی آپریشنز کے بقول، '' بچوں کے اغوا کی خبروں کی تازہ لہر میں پہلی ویڈیو گوجرانوالہ سے آئی جہاں پر سندھ سے آئے ڈاکووں کی طرف سے بچے اغوا کرکے ان کے اعضا نکال کر فروخت کرنے کا ذکر کیا گیا۔ تفصیلی چھان بین کے بعد پتہ چلا کہ یہ ویڈیو بھارت کے ایک علاقے کی ہے لیکن لوگوں کی توجہ حاصل کرنے والوں نے معاملہ کچھ کا کچھ بنا دیا۔‘‘
فیک نیوز سے بچیں
وقاص نذیر نے مزید بتا یا کہ وائرل ہونے والی ایک اور ویڈیو منڈی بہاؤالدین کی تھی جس میں دکھایا گیا تھا کہ مبینہ طور پر بچے اغوا کرنے والی ایک عورت بچوں کو پنسلیں دے رہی تھی۔ وہاں پہنچے تو معلوم ہوا کہ وہ عورت اپنی والدہ کے انتقال پر بیرون ملک سے آئی تھی اور اپنے آبائی علاقے کے بچوں کے لیے سٹیشنری کی چیزیں لائی تھی۔ اس میں کوئی قابل اعتراض بات ہی نہ تھی لیکن کسی راہ چلتے نوجوان نے ویڈیو بنا کر بات کا بتنگڑ بنا ڈالا۔ یوں سب لوگ اس فیک نیوز کو شئیر کرنے لگے۔
’اغوا یا لاپتہ ہونےکی وبا‘ سے بچاؤ کی احتیاطی تدابیر
پاکستان میں سالانہ ہزار سے زائد بچے بچیوں کا ریپ، اسباب کیا؟
اس پولیس اہلکار نے ان جھوٹی خبروں کی تردید کرتے ہوئے مزید بتایا کہ لاہور میں ایک بھکاری عورت کو بچوں کے اغوا میں ملوث ہونے کے شبے میں تشدد کا نشانہ بنایا گیا۔ بعدازاں مقامی لوگوں نے اسے پہچان لیا اور گواہی دی کہ یہ خاتون تو برس ہا برس سے باقاعدگی سے اس علاقے میں آتی ہے اس کا کوئی کرمنل ریکارڈ نہیں۔ ‘‘
پولیس کے اعدادوشمار کیا بتاتے ہیں؟
ڈی آئی جی وقاص نذیر بتاتے ہیں کہ انہوں نے اغوا کی اطلاع ملتے ہی فوری طور پر مقدمہ درج کرنے کی ہدایت جاری کر رکھی ہے۔ ان کے مطابق پولیس ریکارڈ کے مطابق بچوں کے اغوا کے اٹھتر اعشاریہ آٹھ فی صد کیسز میں بچے اپنی مرضی کے ساتھ کہیں چلے جاتے ہیں اور خود سے ہی گھر واپس آ جاتے ہیں اور ان کے مقدمات کو خارج کرنا پڑتا ہے۔
انہوں نے بتایا کہ باقی بچ رہنے والے کیسز میں پندرہ فی صد بچے گھر سے ناراض ہونے کی وجہ سے گھر سے غائب ہو جاتے ہیں۔ صرف پانچ سے سات فی صد کیسز ایسے ہوتے ہیں جن میں جرائم پیشہ لوگ ملوث ہوتے ہیں۔
وقاص نذیر کے بقول، ''ہمارا ریکارڈ بتاتا ہے کہ لاہور میں روزانہ بچوں کے گھر سے چلے جانے کے دو یا تین واقعات رونما ہوتے ہیں۔ ایک سال میں بچوں کی گمشدگی یا غائب ہونے کے ایک ہزار کے قریب واقعات ہوتے ہیں۔ کچھ ایسی ہی صورتحال باقی پنجاب میں ہے۔ ‘‘
ایک سوال کے جواب میں وقاص نذیر کا کہنا تھا کہ اس سال لاہور میں گھر سے غائب ہو جانے والے بچوں میں سے آٹھ سو کے قریب واپس آ چکے ہیں جبکہ ستاون کیسز کی تحقیقات جاری ہیں۔
سازشی نظریات اور حقائق
وقاص نذیر کا کہنا تھا کہ بچوں کے حوالے سے جرائم کی شرح گنجان آبادی والے بڑے شہروں میں زیادہ ہے۔ دیہات میں کسی بچے کے غائب ہو جانے پر عموما وہاں کا مقامی نظام محدود علاقوں میں گھر سے بھاگ جانے والے بچے کو خود سے ہی تلاش کر لیتا ہے۔
یاد رہے دو ہزار سترہ میں بھی بچوں کے اغوا کی وارداتوں میں تیزی آئی تھی۔ اس دوران بیان کی جانے والی سازشی نظریات میں پہلے ایک موبائل فون کمپنی پر الزام لگا تھا کہ وہ بچوں کی نقل و حمل کی نگرانی کرنے والی ایک سٹریپ (جسے کلائی پر باندھا جاتا تھا) کی سیل میں اضافے لے لیے ایسی خبروں کو بڑھاوا دلوا رہی ہے۔
پاکستان زینت شہزادی کی جبری گمشدگی کی تحقیقات کرے، ایمنسٹی
’جنسی زیادتی‘: چودہ سالہ بچے نے خود کشی کر لی
انہی دنوں یہ بھی سننے میں آیا تھا کہ لاہور میں پوسٹنگ کا متمنی پنجاب پولیس کا ایک اعلی افسر ایسی خبروں کے پیچھے تھا۔ نہیں معلوم کے بچوں کے اغوا کی بڑھتی ہوئی تازہ خبروں کے پیچھے اب کون اپنا کھیل کھیل رہا ہے۔
ان واقعات کا ذمہ دار کون ہے؟
اس سوال کے جواب میں وفاقی تحقیقاتی ایجنسی کے ایک اعلی افسر نے اپنا نام نہ ظاہر کرنے کی شرط پر بتایا کہ ایسی خبروں میں پاکستان کے ایک ہمسایہ ملک کے ملوث ہونے کے شواہد بھی ملے ہیں تاہم ان کا کہنا تھا کہ بہت سے پاکستانی بھی زیادہ صارفین کی توجہ حاصل کرنے کے لیے ایسی باتیں آگے بڑھا رہے ہیں۔
انہوں نے مزید کہا کہ سوشل میڈیا کے معاملات پنجاب پولیس کے دائرہ اختیار میں نہیں آتے اس لیے ایف آئی اے ایسی فیک نیوز پھیلانے والوں کی تلاش میں ہے۔ ڈی ڈبلیو کو دستیاب اطلاعات کے مطابق عنقریب بچوں کے اغوا کی فیک خبریں گھڑنے اور پھیلانے والوں کو گرفتار کر کے عوامی آگاہی کے لیے منظر عام پر لایا جائے گا۔
اس مسئلے کا حل کیا ہے؟
ماہرین کے مطابق ایسے مسائل کے حل کے لیے شہریوں، میڈیا، قانون نافذ کرنے والے اداروں اور سول سوسائٹی سب کو مل جل کر کوششیں کرنا ہوں گی ۔ ان کے مطابق عوام کو ان امور کے حوالے سے آگاہی فراہم کرنے کے ساتھ ساتھ سوشل میڈیا کے ذمہ دارانہ استعمال کو بھی یقینی بنانا ہوگا۔
پاکستان میں انفارمیشن ٹیکنالوجی کی وفاقی وزارت میں ممبر لیگل کے طور پر خدمات سر انجام دینے والے پاکستان کے ممتاز قانون دان بابر سہیل نے ڈی ڈبلیو کو بتایا کہ شہریوں کے آزادی اظہار کے حق کو متاثر کیے بغیر سوشل میڈیا کے ذمہ دارانہ استعمال کو یقینی بنانے کے لیے ضروری قواعد و ضوابط تیار کیے جا رہے ہیں ، انہیں امید ہے کہ اس طرح فیک نیوز کے پھیلاو میں ضرور کمی آ سکے گی۔