ماہرین پر مشتمل عالمی ادارے کے ایک پینل نے اس رپورٹ میں کہا ہے کہ اُس کے جائزوں سے یہ نتیجہ سامنے آیا ہے کہ 2014 ء کے وسط سے لے کر 2015 مارچ کے دوران اسلامک اسٹیٹ میں شامل ہونے والے غیر ملکی عسکریت پسندوں کی تعداد میں71 فیصد کا اضافہ ہوا ہے۔ اقوام متحدہ کا یہ پینل القاعدہ پر لگنے والی پابندیوں کی نگرانی کے فرائض انجام دیتا ہے۔

عالمی ادارے کی اس رپورٹ میں یہ بھی کہا گیا ہے کہ ان مسائل میں گزشتہ تین برسوں کے دوران واضح اضافہ ہوا ہے اور غیر ملکی جہادیوں کے بہاؤ کی موجودہ شرح اس وقت جتنی بڑھی ہوئی ہے اتنی اس سے پہلے تاریخ میں کبھی نہیں بڑھی تھی۔

اقوام متحدہ کی سکیورٹی کونسل کو اس پینل کی طرف سے پیش کی گئی رپورٹ میں کہا گیا ہے کہ،"غیر ملکی جنگجوؤں کی مجموعی تعداد میں گزشتہ ایک عشرے کے دوران ہزاروں کا اضافہ ہوا ہے اور اب ان کی تعداد 25 ہزار تک پہنچ چُکی ہے"۔ رپورٹ کے مطابق محض عراق اور شام پہنچنے والے غیر ملکی جہادیوں کی تعداد 20 ہزار سے زائد ہے۔ یہ بالخصوص اسلامک اسٹیٹ گروپ میں شمولیت کے لیے عراق اور شام پہنچے ہیں تاہم اکثر النصرہ فرنٹ میں بھی شامل ہوئے ہیں۔

اس پینل نے یہ بھی کہا ہے کہ عراق اور شام ہزاروں غیر ملکی جنگجوؤں کے لیے ’دہشت گردی کی ایسی بین الاقوامی تربیت گاہ کی حیثیت رکھتے ہیں‘ جیسا کہ 1990 کی دہائی میں افغانستان ہوا کرتا تھا۔

اقوام متحدہ کے اس پینل میں شامل ماہرین کا ماننا ہے کہ عراق اور شام میں اسلامک اسٹیٹ گروپ کی فوجی شکست، دنیا بھر میں متشدد دہشت گردوں کے پھیلاؤ پر غیر ارادی طور پر اثر انداز ہو سکتی ہے۔ اس پینل نے خدشہ ظاہر کیا ہے کہ عراق اور شام سے لوٹنے والے جہادیوں میں سے بعض کے اذہان پر گہرے صدمے کے اثرات موجود ہوتے ہیں۔ انہیں نفسیاتی علاج اور طبّی امداد کی ضرورت ہوتی ہے تاہم اس امر کا بھی قوی امکان ہے کہ لوٹنے والے جہادیوں کو مجرم پیشہ نیٹ ورکس اپنے گینگ میں بھرتی کر لیں۔

شام اور عراق کے علاوہ افغانستان کی سکیورٹی فورسز نے بھی کہا ہے کہ مارچ کے ماہ میں چھ ہزار پانچ سُو غیر ملکی جہادی ہندو کش کی اس ریاست میں فعال رہے ہیں۔ اقوام متحدہ کے پینل نے مزید کہا ہے کہ ہزاروں غیر ملکی دہشت گرد یمن، لیبیا اور پاکستان میں سرگرم ہیں جبکہ 100 کے قریب صومالیہ میں فعال ہیں اور دیگر شمالی افریقی ممالک اور فلپائن میں سرگرم ہیں۔

عالمی ادارے کی رپورٹ میں یہ بھی کہا گیا ہے کہ ان غیر ملکی جنگجوؤں میں سے ایک بڑی تعداد تیونس، مراکش، فرانس اور روس کے جنگجوؤں کی ہے۔ مالدیپ، فن لینڈ اور ٹوباگو کے جنگجوؤں کی تعداد میں بھی اضافہ ہوا ہے۔