پاکستان تحریک انصاف کے اسلام آباد میں ڈی چوک پر حالیہ احتجاج کے ناخوشگوار اختتام کے بعد پارٹی کی قیادت میں اختلافات دیکھنے میں آرہے ہیں اور چند رہنما تو کھلے عام اس احتجاج کی ناکامی کے لیے ایک دوسرے کو مورد الزام ٹھہرا رہے ہیں۔

 اس دوران پی ٹی آئی کے سیکریٹری جنرل سلمان اکرم راجہ  بھی اپنے عہدے سے مستعفی ہو گئے ہیں۔ جبکہ پی ٹی آئی کی اہم اتحادی جماعت سنی تحریک پاکستان کے سربراہ  صاحبزادہ حامد رضا، جو پی ٹی آئی کی کور کمیٹی اور سیاسی کمیٹی کے رکن  بھی تھے، نے ان دونوں عہدوں سے استعفیٰ دے دیا ہے۔ انہوں نے احتجاج کی ناقص حکمت عملی اور ڈی چوک سے پیچھے ہٹنے پر اپنی ناراضگی کا اظہار کیا ہے۔ ان دونوں مستعفی رہنماؤں نے بہرحال یہ کہا ہے کہ وہ پی ٹی آئی کی حمایت جاری رکھیں گے۔

 سلمان اکرم راجہ نے کہا ہے کہ وہ پارٹی کی قانونی ٹیم کی سربراہی جاری رکھیں گے، لیکن سیاسی معاملات سے دور رہیں گے۔ کچھ رہنماؤں نے الزام لگایا ہے کہ بشریٰ بی بی نے پارٹی رہنماؤں کی تجاویز کے برخلاف لانگ مارچ کو ڈی چوک کی طرف دھکیل دیا۔ بیرسٹر گوہر بھی کہتے رہے ہیں کہ عمران خان سنگجانی میں احتجاج کرنے پر آمادہ تھے۔

 پی ٹی آئی کے سینئر رہنما شیر افضل مروت البتہ ٹی وی ٹاک شوز میں ان الزامات کی تردید کرتے ہوئے یہ کہتے رہے کہ ڈی چوک جانے کا فیصلہ پارٹی کا  تھا۔

پی ٹی آئی کے بعض حلقوں کی جانب سے مظاہرین کے خلاف حکومتی کریک ڈاؤن کے آغاز پر علی امین گنڈا پور اور بشریٰ بی بی کی جانب سے احتجاج کی قیادت چھوڑ کر چلے جانےکے اقدام پر بھی بھر پور تنقید کی جا رہی ہے۔ سوال اٹھایا جا رہا ہے کہ کیا بشریٰ بی بی نے گنڈا پور کے دباؤ میں آ کر احتجاجی مقام چھوڑا؟

 پی ٹی آئی کے رہنما رؤف حسن نے اس تاثر کو مسترد کیا اور کہا کہ بشریٰ بی بی، جو پارٹی کے بانی عمران خان کی اہلیہ ہیں، نے کے پی کے وزیر اعلیٰ علی امین گنڈا پور کے کہنے پر احتجاجی مقام نہیں چھوڑا۔

بشریٰ بی بی کی پارٹی معاملات میں مداخلت تنازع کی وجہ؟

مختلف مقدمات میں جیل سے ضمانت پر رہائی کے بعد یہ پہلا موقع تھا کہ بشریٰ بی بی نے پارٹی احتجاج کی قیاد ت کی۔ حکومتی رکاوٹیں عبور کرنے کے بعد جب پی ٹی آئی کا احتجاجی قافلہ اسلام آباد میں داخل ہوا تو اسے بشریٰ بی بی کی ایک بڑی سیاسی کامیابی کے طور پر دیکھا گیا اور یہاں تک کہ کئی مبصرین نے انہیں عمران خان کی عدم موجودگی میں پارٹی کی سربراہی تک کے لیے موزوں قرار دیا۔

اسلام آباد میں ڈی چوک کے قریب پہنچنے کے بعد بشریٰ بی بی کے کارکنوں سے دھواں دھار خطاب نے بھی انہیں سیاسی طور پر نمایاں کیا۔ انہوں نے کارکنوں کو یقین دلایا کہ وہ عمران خان کی رہائی کے بغیر یہا‌ں سے واپس نہیں لوٹیں گی، اور پھر انہوں نے کارکنوں سے بھی ایسا ہی کرنے کا حلف  لیا۔ تاہم پھر چھبیس نومبر کی رات حکومتی کریک ڈاؤن کے بعد ان کے کردار پر بھی بہت سے سوالیہ نشان اٹھنا شروع ہو گئے۔ کچھ سیاسی پنڈت تو  پارٹی قیادت کے درمیان اختلافات  کو بھی بشریٰ بی بی کے سیاسی معاملات میں کردار کی وجہ قرار دے رہے ہیں۔

  تاہم بعض تجزیہ کاروں کا کہنا ہے کہ عمران خان کے جیل میں جانے کے بعد سے ہی پی ٹی آئی اندرونی طور پر تنازعات کا شکار ہو گئی تھی۔ سیاسی  تجزیہ کار ضیغم خان کہتے ہیں، ''پارٹی میں کوئی ڈھانچہ نہیں ہے اور یہی پارٹی کے اندرونی اختلافات اور معاملات کی بدنظمی کی بڑی وجہ ہے۔‘‘ انہوں نے مزید کہا کہ بشریٰ بی بی کا کردار بھی متنازع ہے،’’احتجاج کی ناکامی کے بعد پی ٹی آئی کے رہنما اپنے ووٹرز کی شدید تنقید کا سامنا کر رہے ہیں اور اپنے انتخابی حلقوں میں شرمندگی اٹھا رہے ہیں۔‘‘

کچھ میڈیا رپورٹس کے مطابق بشریٰ  بی بی  نے احتجاج شروع ہونے سے قبل ایک پارٹی میٹنگ میں جماعت کے بعض رہنماؤں کی موجودگی میں ان کے خلاف سخت الفاظ استعمال کیے اور ان پر اپنی ذمہ داریاں صحیح طریقے سے پوری نہ کرنے کے الزامات بھی لگائے۔

سیاسی امور کی رپو‌ٹنگ کرنے والے صحافی اور پشاور پریس کلب کے صدر ارشد عزیز ملک کا کہنا ہے، ’’بشریٰ بی بی پارٹی کے معاملات کنٹرول کرنے کی کوشش کر رہی ہیں اور پارٹی کے بعض رہنماؤں کے مطابق وہ  لوگوں پر غیر ضروری دباؤ ڈال رہی ہیں۔ یہاں تک کہ ایک موقع پر سلمان اکرم راجہ کو یہ تک کہنا پڑا کہ ہم پارٹی کے لوگ ہیں، کسی کے ذاتی ملازم نہیں۔‘‘

ارشد ملک کا مزید کہنا تھا کہ  پی ٹی آئی میں منصوبہ بندی کا فقدان عیاں ہے اور اس کی وجہ کسی متحد  قیادت کی کمی ہے۔ انہوں نے کہا،''عمران خان جیل میں ہیں اور ان کا ٹوئٹر اکاؤنٹ بھی بشریٰ بی بی کے کنٹرول میں ہے لہذا یہ جاننا بھی مشکل ہے کہ ان (عمران خان) کا مختلف معاملات پر کیا مؤقف ہے۔‘‘

کیا حکومت پی ٹی آئی میں پھوٹ ڈالنے میں کامیاب ہو گئی؟

پی ٹی آئی کی پے درپے ناکام احتجاجوں کے سلسلے کو دیکھتے ہوئے بعض حلقے اسے حکومت کی بہتر سیاسی حکمت عملی سے بھی تعبیر کر رہے ہیں۔ البتہ تجزیہ کار ضیغم خان کہتے ہیں کہ سیاسی مخالفین کا کام ہے کہ وہ چالیں چلتے ہیں لیکن ایک سیاسی جماعت کو بھی یہ سمجھنے کی ضرورت ہے کہ اس کی حکمت عملی میں کیا خامی ہے۔ انہوں نے کہا کہ حکومت  پی ٹی آئی کی قیادت کو اپنے کارکنوں کو چھوڑ کر احتجاج سے نکلنے کا  موقع تو دے سکتی ہے لیکن وہ انہیں زبردستی ایسا کرنے پر مجبور نہیں کر سکتی۔

ضیغم خان کا کہنا تھا، ''ا پی ٹی آئی کی قیادت کو خود سوچنا چاہیے کہ وہ اس جال میں کیوں پھنس رہی ہے؟‘‘ انہوں نے مزید کہا کہ حالیہ احتجاج کی ناکامی  پی ٹی آئی کی قیادت پر اعتماد ختم کرنے کا سبب بن رہی ہے اور جب اعتماد نہیں ہوگا، تو پارٹی آئے روز احتجاج بھی نہیں کر سکے گی۔