پاکستانی وزیر اعظم شہباز شریف نے حزب اختلاف کی جماعت پاکستان تحریک انصاف کی جانب سے اسلام آباد میں حالیہ احتجاج کو ملکی اقتصادی ترقی کو سبوتاژ کرنے کی کوشش قرار دیا ہے۔ شہباز شریف کی جانب سے آج آٹھ اکتوبر بروز منگل وفاقی کابینہ کے اجلاس کے بعد جاری کیے گئے سرکاری اعلامیے میں کہا گیا کہ شنگھائی تعاون کی تنظیم  ایس سی او کے اجلاس سے قبل اسلام آباد میں پولیس کے ساتھ پی ٹی آئی کی جھڑپیں ''متعلقہ رہنے‘‘ کے لیے کی گئیں۔

وزیر اعظم کا کہنا تھا کہ ایسا اس لیے کیا جا رہا ہےکیونکہ، بقول شہباز شریف، ملکی معیشت بہتر ہو رہی ہے۔ انہوں نے کہا، ''یہ وہی اقدامات دوبارہ کر رہے ہیں کیونکہ آئی ایم ایف پروگرام کامیابی سے شروع کیا گیا ہے، مہنگائی کم ہوئی ہے اور برآمدات میں اضافہ ہو رہا ہے۔‘‘ انہوں نے مزید کہا کہ ان کے ''ملکی ترقی کے پروگرام کو سبوتاژ کیا جا رہا ہے۔‘‘

اس سے قبل وزیر اعظم نے وفاقی کابینہ کے اجلاس کے شرکاء کو بتایا کہ پاکستان اور سعودی عرب کے مابین دو ارب ڈالر مالیت کی سرمایہ کاری کے منصوبوں پر جلد ہی دستخط کر دیے جائیں گے۔  شہباز شریف کا کہنا تھا کہ ان معاہدوں پر دستخط رواں ماہ ایک سعودی وفد کے دورہ پاکستان کے دوران کیے جائیں گے۔

انہوں نے کہا کہ شنگھائی تعاون کی تنظیم (ایس سی او) کے اس اجلاس سے قبل  ہی سعودی عرب سے ایک وفد کی ملک میں آمد متوقع ہے، جس کی میزبانی پاکستان 15 سے 16 اکتوبر تک کر ے گا۔

سعودی وزیر سرمایہ کاری خالد بن عبدالعزیز الفالح کی قیادت میں سعودی وفد نو  سے گیارہ اکتوبر تک پاکستان کا دورہ کرنے والا ہے۔ اس میں حکومتی اداروں اور نجی شعبے دونوں کے نمائندے شامل ہونے کی توقع ہے جو کہ پاکستانی سعودی اقتصادی تعلقات کو مزید وسعت دینے کی طرف اشارہ ہو گا۔

اسلام آباد میں وفاقی کابینہ کے اجلاس کی صدارت کرتے ہوئے وزیر اعظم شہباز شریف نے متعدد مثبت پیش رفتوں سے متعلق ایک  فہرست بھی پیش کی، جس میں بین الاقوامی مالیاتی فنڈ (آئی ایم ایف) کے پروگرام کے کامیابی سے حصول میں مدد فراہم کرنے کے لیے چین، متحدہ عرب امارات اور سعودی عرب کی جانب سے مدد اور ضروری مالیاتی یقین دہانیوں کی بروقت تصدیق شامل تھی۔

اس موقع  پاکستانی وزیر اعظم  کا کہنا تھا کہ ملائیشیا کے وزیر اعظم کی حالیہ پاکستان آمد ایک ''بہت کامیاب دورہ‘‘ تھی اور یہ کہ اب  ایک سعودی وفد بھی پاکستان کا دورہ کرنے والا ہے۔

ش ر⁄ م م (روئٹرز)