جرمن شہر ہینوور میں ایس پی ڈی کی خصوصی پارٹی کانگریس میں شریک مندوبین میں سے تقریباً 94 فیصد نے شٹائن بروک کے حق میں ووٹ دیے۔ اس ووٹنگ ميں ان کے خلاف کوئی کھڑا نہيں ہوا تھا۔ اس طرح ستمبر 2013ء میں مجوزہ انتخابات میں پیئر شٹائن بروک موجودہ چانسلر انگیلا میرکل کا مقابلہ کریں گے، جو 2005ء سے اس عہدے پر براجمان چلی آ رہی ہیں۔ شٹائن بروک سابقہ گرينڈ کوليشن کے دور ميں سن 2005 سے 2009 تک ميرکل کی حکومت ميں بطور ملکی وزير خزانہ خدمات انجام دے چکے ہيں۔

پارٹی کانگریس سے اپنے خطاب کے دوران سابق وزير خزانہ نے چانسلر ميرکل کے خلاف متحد ہونے کی ضرورت پر زور ديا اور کہا کہ وہ معاشرے ميں زيادہ انصاف پر زور ديں گے۔ شٹائن بروک کا کہنا تھا، ’’اقتصادی بحران نے ہميں دکھا ديا ہے کہ يورپ، جرمنی اور خاص کر ہمارے معاشرے ميں بہت سی چيزيں اپنا توازن کھو بيٹھی ہيں۔‘‘ يہ پينسٹھ سالہ سياستدان جرمنی ميں متوسط طبقے پر زيادہ ٹيکس اور کم سے کم تخواہ کی ايک حد مقرر کرنے کے حامی ہيں۔ جبکہ چانسلر ميرکل ان دونوں معاملات پر مختلف رائے کی حامل ہيں۔ پیئر شٹائن بروک کے بقول وہ تبديلی کے خواہاں ہيں اور جرمنی ميں تبديلی کا وقت آ گيا ہے۔

جرمنی ميں سياسی تجزيہ نگاروں کا ماننا ہے کہ پیئر شٹائن بروک کے ليے چانسلر ميرکل کو ہرانا کافی مشکل کام ہے۔ انگيلا ميرکل چانسلرشپ کی تيسری مدت کی خواہاں ہيں اور رائے عامہ کے جائزے اس بات کی نشاندہی کرتے ہيں کہ ان کی جماعت سی ڈی يو اور اس کی ايک اور حامی جماعت کرسچن سوشل يونين کے اتحاد کو حريف گروپ ايس پی ڈی پر دس پوائنٹس، جو تيس سے چاليس فيصد کے برابر ہے، کی برتری حاصل ہے۔

خبر رساں ادارے روئٹرز کی رپورٹ ميں سياسی تجزيہ نگاروں کے حوالے سے يہ بھی بتايا گيا ہے کہ ان کا ماننا ہے کہ موجودہ صورتحال کو ديکھتے ہوئے ايک گرينڈ کوليشن کے قيام کے امکانات ہيں۔ تاہم پیئر شٹائن بروک نے کسی بھی ايسے بڑے اتحاد کا حصہ بننے سے انکار کر ديا۔ ان کا کہنا تھا، ’’ميں حکومت کی جزوی تبديلی نہيں چاہتا۔ ميں چاہتا ہوں کہ ايک بالکل ہی نئی حکومت ہو۔ ميں ايس پی ڈی اور گرينز کی حکومت چاہتا ہوں۔ ميں کسی گرينڈ کوليشن کے ليے دستياب نہيں ہوں۔‘‘

(as/ng (Reuters