چاڈ کے سرکاری ریڈیو کے مطابق دارالحکومت انجامینامیں قائم پولیس ہیڈ کوارٹر اور پولیس اکیڈمی کے باہر ہونے والے ان خود کش حملوں میں سو سے زائد افراد زخمی ہیں، جن میں سے متعدد کی حالت سنگین ہے۔ تفصیلات کے مطابق حملہ آور موٹر سائیکلوں پر سوار تھے اور ان افراد نے ایک مختصر کے وقفے سے ان عمارتوں کو نشانہ بنایا۔ ابھی تک کسی بھی گروپ نے ان حملوں کی ذمہ داری قبول نہیں کی ہے تاہم حکام کوشبہ ہے کہ ان واقعات کے پیچھے بوکو حرام کا ہاتھ ہے۔

چاڈ کا شمار ان ممالک میں ہوتا ہے، جو شدت پسند تنظیم بوکو حرام کے خلاف بنائی جانے والی مشترکہ فوج میں شامل ہے۔ حکام کے بقول یہ حملے اسی کا رد عمل بھی ہو سکتے ہیں۔ پڑوسی ملک نائجیریا میں موجود شدت پسند تنظیم بوکو حرام اس سے قبل بھی سرحد پر موجود چاڈ کے کئی دیہات کو نشانہ بنا چکا ہے۔

چاڈ کے وزیر اطلاعات حسن سائلا بکری نے پیر کے روز ہونے والے حملے کو ایک انتہائی وحشیانہ کارروائی قرار دیا۔’’ یہ حملے چاڈ حکومت کے بوکو حرام کے خلاف ارادوں کو کمزور کرنے اور شہریوں میں خوف و ہراس پیدا کرنے کے لیے کیے گئے ہیں تاہم حکومت دہشت گردی کے خاتمے کے اپنے ارادوں پر قائم رہے گی۔

بوکو حرام شمالی نائجیریا میں ایک مسلم ریاست کے قیام کی کوششوں میں ہے اور اس دوران اس شدت پسند تنظیم نے اپنے حملوں کا دائرہ پڑوسی ممالک چاڈ، نائجر اور کیمرون تک بڑھا دیا ہے۔ اس کے بعد فرانس کی سابق نوآبادی چاڈ نے ان ممالک کے ساتھ مل کر عسکریت پسندی پر قابو پانے کے لیے ایک مشترکہ حکمت عملی پر اتفاق رائے کیا تھا۔ پیرس حکومت نے بھی ان حملوں کی شدید مذمت کی ہے۔ فرانسیسی وزارت خارجہ کے بیان میں کہا گیا ’’ اس موقع پر فرانس چاڈ اور ان ساتھیوں کے ساتھ کھڑا ہے، جو دہشت گردی کے خلاف لڑائی میں مصروف ہیں۔‘‘ پیر کے روز بوکو حرام نے شمال مشرقی نائجیریا دو خود کش حملے کیے، جن کی زد میں آ کر کم از کم گیارہ افراد کی ہلاکت کی اطلاع ہے۔