چلی کے جزیرے کاچاگوآ سے ملنے والی رپورٹوں کے مطابق ماہرین نے تنبیہ کی ہے کہ ہمبولٹ پینگوئنز کی دنیا بھر میں تعداد تیزی سے کم تر ہوتی جا رہی ہے۔ سائنسدانوں نے اس نسل کے پینگوئنز کو معدوم ہو جانے کے خطرے کا شکار حیوانی انواع میں شامل کر رکھا ہے۔

انٹارکٹیکا مین لینڈ میں پہلی بار ایک مہلک برڈ فلو کی موجودگی کی تصدیق

زمین پر پائی جانے والی آبی جانوروں کی طرح طرح انواع میں سے ہمبولٹ پینگوئنز ایسے جانداروں کی ان چند گنی چنی انواع میں شمار ہوتے ہیں، جو پہاڑی ساحلی خطوں اور مقابلتاﹰ زیادہ درجہ حرارت والے علاقوں میں رہتے ہیں۔

دنیا کے اسّی فیصد ہمبولٹ پینگوئنز صرف چلی کے ساحلی علاقوں میں

ہمبولٹ پینگوئنز کی خاص بات یہ ہے کہ دنیا بھر میں ان کی جتنی بھی آبادی ہے، اس کا 80 فیصد حصہ چلی کے بحرالکاہل سے جڑے ساحلی علاقوں میں پایا جاتا ہے۔

چلی کی یونیورسٹی آف کونسیپسیون کے حیاتیاتی ماہرین کے مطابق 1990ء کی دہائی میں وہاں ان کی مجموعی آبادی تقریباﹰ 45 ہزار بنتی تھی، جو اب نصف سے بھی کم رہ گئی ہے اور صرف قریب 20 ہزار بنتی ہے۔

تحفظ ماحول اور تحفط انواع کے لیے سرگرم بین الاقوامی تنظیموں کا مطالبہ ہے کہ ان پینگوئنز سے متعلق ہر طرح کی تجارتی مصروفیات پر پابندی ہونا چاہیے کیونکہ آبی جانداروں کی یہ نسل واقعی معدوم ہو جانے کے خطرے کا شکار ہے۔

کئی ملین سال پرانے پینگوئین کا ڈھانچا دریافت

اسی وجہ سے چلی کی وزارت تحفظ ماحول نے بھی گزشتہ ماہ سمندری پرندوں کی اس نسل کو دوبارہ باقاعدہ طور پر ''معدومیت کے خطرے کا شکار‘‘ قرار دے دیا تھا۔

لیکن ماہرین حیاتیات کا کہنا ہے کہ ان پرندوں سے متعلق یہ حکومتی موقف بھی ان کی نسل کو بچانے کے لیے کافی ثابت نہیں ہو گا اور خدشہ یہی ہے کہ ایسے پینگوئنز کی مجموعی آبادی مسلسل کم ہوتی جائے گی۔

آبادی میں کمی کے بڑے اسباب

حیاتیاتی اور ماحولیاتی ماہرین کا کہنا ہے کہ ہمبولٹ پینگوئنز کی مجموعی آبادی میں کمی کے رجحان کی کئی بڑی وجوہات ہیں۔ ان میں تجارتی ماہری گیری کی وجہ سے ایسے سمندری پرندوں کے لیے خوراک کی دستیابی کے حوالے سے پیدا ہو جانے والی مقابلہ بازی بھی شامل ہے اور ماحولیاتی آلودگی، ان کے ماحولیاتی نظام کی تباہی اور برڈ فلو جیسے بیماریاں بھی۔

کنگ پینگوئن ناپید ہونے کے قریب

اس بارے میں چلی کے قومی چڑیا گھر سے منسلک سمندری حیاتیات کے ماہر گیلیرمو کیوبیوس نے نیوز ایجنسی روئٹرز کو بتایا، ''ان پینگوئنز کی نوع کو درپیش خطرات کا ایک پورا سلسلہ ہے، جس میں گزشتہ برسوں میں کوئی کمی نہیں آئی۔‘‘

کیوبیوس نے بتایا، ''اگر یہ کئی متنوع خطرات آئندہ بھی موجود رہے، تو پینگوئنز کی اس نسل کو 'معدومیت کے خطرے کا شکار‘ سے 'معدومیت کے شدید خطرے کا شکار‘ قرار دینا پڑ جائے گا۔ ایسے کسی مقام پر پہنچ جانے کے بعد جانداروں کی کوئی بھی نسل اپنے حتمی طور پر ناپید ہو جانے کے دہانے پر آ جاتی ہے۔‘‘

سخت قانون سازی کی ضرورت

ہمبولٹ پینگوئنز پر تحقیق کرنے والی ماہر حیاتیات پاؤلینا آرکے کہتی ہیں کہ ایسے بہت سے پینگوئن تجارتی ماہی گیری کے لیے استعمال ہونے والے بحری جہازوں اور بڑی کشتیوں کی طرف سے سمندر میں پھینکے گئے جالوں میں پھنس کر بھی ہلاک ہو جاتے ہیں۔

نیوزی لینڈ میں بہت بڑے پینگوئن کے فوسلز کی دریافت

اس صورت حال کے تدارک کے لیے ضروری ہے کہ ایسی سخت قانون سازی کی جائے جو صنعتی اور چھوٹے پیمانے پر ماہی گیری، دونوں کو زیادہ ماحول دوست اور دیرپا بنائے جانے کو یقینی بنائے۔

اس خاتون سائنسدان نے کہا کہ اب تک جو اقدامات کیے گئے ہیں، وہ مؤثر طور پر کام نہیں کر رہے۔

سمندری حیات کی سب سے بڑی پناہ گاہ قطب جنوبی میں ہو گی

پاؤلینا آرکے کے الفاظ میں، ''ان سمندری پرندوں کو دوبارہ خطرات کا شکار نوع قرار دینا اس وقت تک بالکل بے نتیجہ رہے گا، جب تک کہ ایسے حالات کو یقینی نہ بنایا جائے، جن میں یہ نوع اپنے قدرتی ماحول میں پھل پھول سکے اور اس کے لیے کافی خوراک بھی موجود ہو۔‘‘

پاؤلینا آرکے نے کہا، ''فطرت کی انسانوں کے ساتھ اس بقائے باہمی کے لیے سخت قانون سازی ناگزیر ہے۔‘‘

ادارت: شکور رحیم