سوئٹزرلينڈ کے وزير اقتصاديات يوہان شنائیڈر امّان نے اس دوطرفہ معاہدے کے نافذ العمل ہونے کے موقع پر شہر بازل ميں کہا کہ ان کا ملک چين کی وسيع تر منڈی کی طرف ديکھ رہا ہے جبکہ چين کو اس معاہدے کے ذريعے ٹیکنالوجی اور جدت کے لحاظ سے اعلیٰ درجے کے پارٹنر مليں گے۔ يورپی رياست سوئٹزرلينڈ کے سياستدان اور کاروباری شعبے سے تعلق رکھنے والے افراد اس فری ٹریڈ معاہدے کو دنيا کی دوسری سب سے بڑی معيشت کے ساتھ تعلقات مزید بہتر بنانے کے ليے اہم قرار دے رہے ہيں۔

چين اور سوئٹزرلينڈ کے درميان آزاد تجارتی معاہدہ قريب دو سالہ مذاکرات کے بعد 2013ء ميں طے پايا تھا۔ معاہدے کے تحت چين کے ليے سوئٹزرلينڈ کی صنعتی اور زرعی برآمدات پر ٹيکس اب ختم ہو چکا ہے اور سوئس برآمد کنندگان کے ليے 1.4 بلين کی آبادی والی چينی منڈی کے دروازے کھل گئے ہيں۔ چين سوئٹزرلينڈ سے زیادہ تر کيميکلز، ادويات، مشينری اور گھڑياں درآمد کرتا ہے اور آزاد تجارتی معاہدے سے چھوٹی اور درميانے درجے کی سوئس کمپنيوں کو فائدہ پہنچے گا۔ دوسری جانب چينی کاروباری اداروں کے ليے بھی اب سوئس مارکیٹ کے دروازے کھل چکے ہيں۔

سوئس کسٹمز سروس کے سربراہ روڈولف ڈيٹرش کا کہنا ہے، ’’کسٹمز ڈيوٹی پر بچت ان ملکوں سے تعلق رکھنے والے کاروباری حريفوں پر فيصلہ کن برتری دلوا سکتی ہے، جن کا چين کے ساتھ کوئی آزاد تجارتی معاہدہ نہيں ہے۔‘‘ ماہرين کا کہنا ہے کہ يہ ڈيل مستقبل ميں سوئٹزرلينڈ کو يورپ ميں چينی کمپنيوں کا گڑھ بھی بنا سکتی ہے۔

سوئس بزنس فيڈريشن ’اکانومی سوئس‘ کے سربراہ يان آٹسلانڈر نے اس بارے ميں کہا، ’’ماضی کے تجربات يہ بتاتے ہيں کہ آزاد تجارتی معاہدوں سے تجارت کو فروغ ملتا ہے۔‘‘ ان کے بقول يہ معاہدہ اس ليے بھی اہم ہے کہ اس سے اپنی منڈيوں کو کھولنے يا ان تک رسائی دينے کے چينی عزم کی نشاندہی ہوتی ہے، جو عالمی تجارت کے ليے ايک مثبت پيغام کی حيثيت رکھتا ہے۔

سوئٹزرلينڈ يورپی يونين کا رکن ملک نہيں ہے۔ اس سے قبل چين ايک اور يورپی ملک آئس لينڈ کے ساتھ بھی اپريل 2013ء ميں اسی طرز کا معاہدہ طے کر چکا ہے۔ آئس لينڈ بھی اٹھائيس رکنی يورپی بلاک کا حصہ نہيں ہے۔

يہ امر اہم ہے کہ يورپی يونين اور بيجنگ کے درميان اسی طرز کے معاہدے کو حتمی شکل ديے جانے کے سلسلے ميں مشاورتی عمل جاری ہے تاہم يورپی يونين کے رکن ممالک اس حوالے سے منقسم ہيں۔ برطانيہ چين کے ساتھ آزاد تجارت کے حق ميں ہے جبکہ فرانس اور اٹلی جيسے ملک اس کے خلاف ہيں۔ ان ملکوں کو خدشہ ہے کہ آزاد تجارت کے ايسے کسی ممکنہ معاہدے کے نتيجے ميں ان کی ملکی منڈياں چينی مصنوعات سے بھر جائيں گی۔ گزشتہ برس چين کے ليے يورپی يونين کی برآمدات کا حجم 192 بلين ڈالر رہا تھا جبکہ یونین میں چینی درآمدات کی ماليت 382 بلين ڈالر رہی تھی۔