’ویکٹر‘ نامی فیشن کمپنی دو سال پہلے برلن ہی میں قائم کی گئی تھی۔ یہ برانڈ کلاسیکی سفید، سیاہ اور پھیکے زرد رنگوں کے لباس تیار کرتا ہے۔ اس برانڈ کی تیار کردہ شرٹس ڈھیلی ڈھالی اور ہوا دار ہوتی ہیں اور ان میں سے جسم کے خدّ و خال بھی نظر آتے ہیں۔ اسے گرم موسم کے لیے مثالی لباس قرار دیا گیا ہے۔

نیا رجحان ’ویئرایبلز‘ کا ہے مثلاً ہاتھ میں پہنے جانے والے ایسے بازو بند، جو آپ کے قدموں کو شمار کرتے ہیں اور نبض کی رفتار ماپتے ہیں۔ یا پھر ایسی ٹوپیاں، جن کے اندر پہلے ہی سے ایک ہیڈ فون نصب ہوتا ہے۔ یہ ایک نئی مارکیٹ ہے، جس میں انفارمیشن ٹیکنالوجی اور فیشن کی صنعت دونوں کے لیے دلچسپی کا سامان موجود ہے۔ لیزا لاگن نامی خاتون ڈیزائنر کے ’روشن‘ ملبوسات کی سلائی میں ایل ای ڈی بلب استعمال کیے گئے ہیں۔

برلن فیشن ویک کا افتتاح ’سویاپولر‘ نامی برانڈ سے ہوا، جو مردوں کے ملبوسات تیار کرتا ہے اور جس کے ملبوسات میں جاپانی ثقافت کا رنگ جھلکتا ہے۔ مردوں کے ملبوسات اگلے سال کے موسم گرما میں گہرے سبز، سلیٹی یا سیدھے سیدھے سیاہ رنگ کے ہوں گے۔

ایک اور برانڈ ’پَرلی وونگ‘ ہے، جس کے ملبوسات پر ایشیا کی نمایاں چھاپ نظر آتی ہے۔ یہ بات باعثِ تعجب بھی نہیں ہے کیونکہ اس برانڈ کی بانی خاتون فیشن ڈیزائنر پرلی وونگ، جو نیویارک سے اعلیٰ تعلیم حاصل کر چکی ہیں، کا تعلق جنوب مشرقی ایشیا کے ملک ملائیشیا سے ہے۔ وہ بھی دو رنگوں سیاہ اور سفید میں کام کرتی ہیں۔

دیگر بہت سے ڈیزائنرز کے برعکس آسٹریا کی خاتون ڈیزائنر لینا ہوشیک کے تیار کردہ نئے ملبوسات میں مختلف بھڑکیلے رنگوں کا استعمال نظر آتا ہے۔ اِن ملبوسات میں پھولدار کپڑا استعمال کیا گیا ہے۔ اس تصویر میں ماڈل نے بیس ویں صدی کی پانچ ویں دہائی کی طرح کے اس پھولدار لباس کے ساتھ سر پر ’اسٹرا ہیٹ‘ بھی پہن رکھا ہے۔

برلن کے اس فیشن وِیک کا سب سے نمایاں چہرہ ہالینڈ کی سپر ماڈل دوتسن کروئس کا ہے لیکن اُن کی کیٹ واک میں ابھی کچھ دیر ہے۔ سرِدست مختلف جرمن اداکارائیں، ٹی وی اینکرز اور فیشن کے موضوع پر بلاگز لکھنے والی خواتین ہی ماڈل بن کر ملبوسات کی نمائش کر رہی ہیں۔ اس تصویر میں ’دی فینسی لائف سٹائل‘ نامی بلاگ لکھنے والی کاتھرینا بانزیمر اور کونسٹانسے لوئیسا سفید رنگ کے ملبوسات کی نمائش کر رہی ہیں۔

کارل لاگر فیلڈ فیشن کی دنیا کا سب سے بڑا نام ہیں لیکن وہ چونکہ پیرس فیشن ویک میں اپنے تیار کردہ نئے ملبوسات پیش کر رہے ہیں، اس لیے وہ برلن فیشن ویک میں شریک نہیں ہیں۔ اُن کی بجائے گیڈو ماریا کریچمر برلن فیشن ویک میں موجود ہیں، جو فیشن ملبوسات کی دنیا میں نمایاں مقام رکھتے ہیں اور اُنہوں نے بھی سیاہ لباس ہی زیبِ تن کر رکھا تھا۔

اس فیشن ویک کے سلسلے میں برلن کے سابقہ ہوائی اڈے ٹیمپل ہوف میں جو تجارتی نمائش سجی ہے، اُس میں بچوں کے لیے بھی فیشن مصنوعات رکھی گئی ہیں۔ ’نیچرینو‘ نامی کمپنی کے بچوں کے لیے تیار کردہ سنہری رنگ کے یہ چمکتے دمکتے جوتے یہیں دیکھے جا سکتے ہیں۔

اس تجارتی میلے میں لوگ فیشن کی دنیا میں نت نئے رجحانات دیکھ بھی رہے ہیں اور دکھا بھی رہے ہیں۔ لوگ نت نئے انداز کے ملبوسات کے ساتھ خود کو زیادہ سے زیادہ نمایاں کرنے کی کوشش کرتے ہیں جیسے کہ یہ شخص، جس نے ’نونیٹس‘ نامی جرمن کمپنی کی تیار کردہ شیر کی کھال کے ڈیزائن کی یہ چمکتی دمکتی عینک پہن رکھی ہے۔

کیٹ واک کرتے ہوئے خواتین ماڈلز تو ٹخنے دکھاتی ہی ہیں لیکن برلن کے ڈیزائنر مشائل مشالسکی کی تیار کردہ مصنوعات میں اب مرد ماڈلز پر بھی جرابوں کی پابندی نہیں۔ اس تصویر میں ایک مرد ماڈل نے اسی جرمن ڈیزائنر کے تیار کردہ جوتے پہن رکھے ہیں۔